.jpg)
លោក ស ខេង (ឆ្វេង) ក្នុងពិធីផ្ទេរតំណែងអភិបាលខេត្តរតនគិរី និងមណ្ឌលគិរីពីថ្ងៃទី ១២ តុលា។ រូបថត Sar Kheng Page
ភ្នំពេញៈ លោក ស ខេង ឧបនាយករដ្ឋមន្ត្រីនិងជារដ្ឋមន្ត្រីក្រសួងមហាផ្ទៃបានណែនាំឱ្យអភិបាលខេត្ដដែលទើបតែងតាំងថ្មីក្នុងខេត្ដរតនគិរី និងមណ្ឌលគិរី រួមនឹងមន្ដ្រីពាក់ព័ន្ធទាំងអស់រួមគ្នាថែរក្សាការពារធនធានជាតិដីធ្លី ព្រៃឈើដែលជាសម្បត្ដិសាធារណៈរបស់រដ្ឋដែលនៅសល់ឱ្យបានគង់វង្ស ខណៈកន្លងមកមានមន្ដ្រីមួយចំនួនបាន រំលោភយកសម្បត្ដិរបស់រដ្ឋ ហើយត្រូវបានដកហូតតំណែង។
លោក ស ខេង ថ្លែងបែបនេះ នៅពេលអញ្ជើញជាអធិបតីក្នុងពិធីប្រកាសចូលកាន់តំណែង លោក ញ៉ែម សំអឿន ជាអភិបាលនៃគណៈអភិបាលខេត្តរតនគិរី និងលោក ថង សាវុន ជាអភិបាលនៃគណៈអភិបាលខេត្តមណ្ឌលគិរី នៅថ្ងៃទី ១២ តុលា ឆ្នាំ ២០២១។
លោកបានលើកឡើងថា ទាក់ទងនឹងការគ្រប់គ្រងធនធានធម្មជាតិខេត្ដរតនគិរី និងខេត្ដមណ្ឌលគិរី ជាខេត្ដមួយសម្បូរទៅដោយធនធានធម្មជាតិអំណោយផលច្រើន។ដូច្នេះការលើកកម្ពស់ការគ្រប់គ្រងធនធានធម្មជាតិ គឺជាភារកិច្ចជាប្រចាំរបស់ខេត្ដ ពិសេសការការពារព្រៃឈើឧទ្យានជាតិដែលបានកំណត់ដោយធ្វើយ៉ាងណារក្សាឱ្យបានគង់វង្សសម្រាប់ទាញយកផលប្រយោជន៍នាពេលអនាគតដល់កូនចៅជំនាន់ក្រោយ។
លោកបានថ្លែងថា បញ្ហាកន្លងទៅនៅក្នុងខេត្ដមណ្ឌលគិរី ក៏មានបញ្ហាប្រឈមទាក់ទិននឹងការរំលោភ កាន់កាប់នូវធនធានធម្មជាតិរបស់រដ្ឋ និងទ្រព្យសម្បត្ដិសាធារណៈរបស់រដ្ឋតំបន់ការពារ មានដី មានព្រៃឈើជាដើម។ ប៉ុន្ដែរដ្ឋាភិបាលបានដោះស្រាយក្នុងរយៈពេលកន្លងទៅនេះ។ ប្រសិនបើមិនបានដោះស្រាយទេបញ្ហាទាំងនោះ មកដល់ពេលនេះប្រហែលជាមានភាពអនាធិបតេយ្យ កាន់តែធ្ងន់ធ្ងរឡើង គ្មានឱកាសដើម្បីនឹងដោះស្រាយបាន ឬពិបាកនឹងដោះស្រាយបានតែម្ដង។
លោក ស ខេង បញ្ជាក់ថា៖ «មន្ដ្រីមួយចំនួន ដូចយើងបានដឹងស្រាប់ហើយ មានការសោកស្ដាយណាស់ ដែលមានកំហុសឆ្គង ទាក់ទងនឹងបញ្ហារំលោភ ប្រើអំណាច ដោយរំលោភក្នុងការទៅយកដី យកធ្លី ទ្រព្យសម្បត្ដិរបស់រដ្ឋ អាហ្នឹងគឺថា ដោយសារភាពលោភលន់ របស់មន្ដ្រីយើងមួយចំនួនដែលយើងមានការសោកស្ដាយ»។
អីចឹងទេលោកសង្ឃឹម ជឿជាក់ថា លោក ថង សាវុន រួមជាមួយនឹងសហការីទាំងអស់បន្តការពារនូវធនធានធម្មជាតិ របស់យើងដែលមាន ជាពិសេសទ្រព្យសម្បត្ដិរបស់រដ្ឋ។ មិនរំលោភ មិនបំពាន ហើយទន្ទឹមនេះ ក៏ត្រូវតែខិតខំដើម្បីគោរពការពារផលប្រយោជន៍របស់ប្រជាពលរដ្ឋផងដែរ។ ដីធ្លីភូមិឋានរបស់ប្រជាពលរដ្ឋនៅទីនេះតែងតែមានព័ត៌មានពីការរំលោភជាបន្តបន្ទាប់។ នេះជាបញ្ហាដែលលោកស្នើឱ្យមានការយកចិត្ដទុកដាក់ដើម្បីនឹងដោះស្រាយ។
លោកបានរំឭកបន្ថែមថា៖ «រឿងដែលសំខាន់ជាងគេ ឥឡូវការគ្រប់គ្រងធនធានធម្មជាតិ នៅមណ្ឌលគិរីនឹងហើយ នេះជារឿងមួយប្រឈមធំណាស់។ទោះបីថាកន្លងទៅមន្ដ្រីមួយចំនួនដើរជំពប់ដួលឬក៏ត្រូវដកទៅនេះដកទៅនោះអីចឹង ក៏ប៉ុន្ដែមិនទាន់ចប់ទេ។ អ៊ីចឹងហើយសូមឱ្យបន្តយកចិត្ដទុកដាក់ ពិសេសគឺតំបន់ដែលយើងការពារ ឧទាហរណ៍ដូចកន្លែងលក់កាបូនលក់ដីជាដើម»។
លោក ស ខេង ក៏បានណែនាំដល់រដ្ឋបាលខេត្ដទាំង ២ ទាក់ទងនឹងបញ្ហាគ្រប់គ្រង និងការអភិវឌ្ឍតំបន់ព្រំដែន ដែលជាកិច្ចការជាប់ជាប្រចាំផងដែរ ខណៈខេត្ដរតនគិរីមានព្រំប្រទល់ជាប់ប្រទេសវៀតណាម និងឡាវ។
លោកបានលើកឡើងថា សំណូមពរសំខាន់បំផុតនៃទំនាក់ទំនងប្រទេសជិតខាងនេះ គឺការការពារបូរណភាពទឹកដីឱ្យបាន ការពារអធិបតេយ្យឱ្យបាន ដែលនេះគឺសំណូមពរចាំបាច់ទី១។ ទន្ទឹមនោះសូមសំណូមពរ ធ្វើឱ្យមានការអភិវឌ្ឍដោយសន្ដិភាព នៅតាមព្រំដែន អភិវឌ្ឍសេដ្ឋកិច្ច សង្គម ដើម្បីមានផលប្រយោជន៍ទាំងសងខាងរវាងកម្ពុជាជាមួយវៀតណាម ឬរវាងកម្ពុជាជាមួយឡាវ។
លោក ស ខេង បញ្ជាក់ថា៖«អ្វីដែលធ្វើទៅវាស្របច្បាប់ ដែលធ្វើទៅវាមានប្រយោជន៍ យើងលើកទឹកចិត្ដនិងជំរុញ។តែយើងក៏ប្រឆាំងនឹងបទល្មើសផ្សេងៗនៅតាមព្រំដែន ឧទាហរណ៍ថា ការរត់ពន្ធមនុស្ស ឬក៏ការរត់ពន្ធគ្រឿងញៀនឬក៏រត់ពន្ធទំនិញគេចពន្ធផ្សេងៗជាដើម។អាហ្នឹងយើងត្រូវតែអនុវត្ដហើយសហការជាមួយប្រទេសជិតខាង»។
លោកបានឱ្យដឹងថា កន្លងទៅតាមរយៈការប្រជុំខេត្ដជាប់ព្រំដែនជាមួយនឹងឡាវក្ដី ជាមួយនឹងវៀតណាមក្ដី ក៏បានឯកភាពគ្នាថា មានបញ្ហាអី អាចអភិបាលខេត្ដ ឬអភិបាលស្រុក ឬឃុំជួបគ្នា ឬប៉ូលិស និងប៉ូលិស អាចជួបប្រជុំគ្នា ដើម្បីផ្លាស់ប្ដូរផ្ដល់ព័ត៌មាន អំពីមុខសញ្ញា។
លោកបន្តថា៖ «អីចឹង ការគ្រប់គ្រងព្រំដែន និងការអភិវឌ្ឍព្រំដែន ឈរលើគោលការណ៍ទាំងឡាយនេះ ជាមួយនឹងការពង្រឹងពង្រីកកិច្ចសហប្រតិបត្ដិការក្នុងនាមជាប្រទេសភូមិផងរបងជាមួយឱ្យបានផង ហើយដោះស្រាយបញ្ហាដោយសន្ដិវិធីផង ជំរុញការអភិវឌ្ឍលើគ្រប់វិស័យឱ្យបានផង ហើយការការពារបូរណភាពទឹកដី និងការការពារនូវអធិបតេយ្យភាពបានផង។ នេះសំណូមពរសំខាន់យ៉ាងដូចច្នេះឯង»។
នៅក្នុងឱកាសនោះ លោក ថង សាវុន បានថ្លែងប្ដេជ្ញាចិត្ដ ក្នុងពេលឡើងកាន់តំណែងជាអភិបាលខេត្ដមណ្ឌលគិរីថ្មីថា លោកនឹងខិតខំទប់ស្កាត់ និងលុបបំបាត់នូវភាពអសកម្មនានា ដែលប៉ះពាល់ និងបង្កការគ្រោះថ្នាក់ដល់ប្រជាពលរដ្ឋដោយយកចិត្ដទុកដាក់ដោះស្រាយទុក្ខលំបាក និងសំណូមពរ កង្វល់របស់ប្រជាពលរដ្ឋ។ កាត់បន្ថយអំពើរំលោភ បំពានអំណាច អយុត្តធម៌សង្គម ដោយប្រកាន់ភ្ជាប់នូវអភិក្រមទាំង ៥ របស់លោកនាយករដ្ឋមន្ត្រី គឺឆ្លុះកញ្ចក់ ងូតទឹក ដុះក្អែល ព្យាបាល និងវះកាត់។
លោកប្ដេជ្ញាថា៖ «យកចិត្ដទុកដាក់ក្នុងការអនុវត្ដគោលនយោបាយភូមិ ឃុំ មានសុវត្ថិភាព ឱ្យកាន់តែមានប្រសិទ្ធភាពខ្ពស់ ដើម្បីថែរក្សា ពង្រឹងសន្ដិភាព ស្ថិរភាព នយោបាយ ធានាបាននូវ សន្ដិសុខ សណ្ដាប់ធ្នាប់ សាធារណៈ និងខិតខំទប់ស្កាត់បទល្មើសនានាជាពិសេសបទល្មើសធនធានធម្មជាតិការកាប់ទន្ទ្រាន់ដីព្រៃធ្វើជាកម្មសិទ្ធិខុសច្បាប់ បទល្មើសគ្រឿងញៀន អាវុធជាតិផ្ទុះខុសច្បាប់ ព្រមទាំងការដោះស្រយបញ្ហាវិវាទដីធ្លីដែលកើតមានឡើង»។
លោក គ្រើង តុលា សកម្មជនការពារព្រៃឈើ ក្នុងខេត្តមណ្ឌលគិរីបានលើកឡើងថា កន្លងទៅថ្នាក់ដឹកនាំជាន់ខ្ពស់រាជរដ្ឋាភិបាលក៏ធ្លាប់បានដាក់បទបញ្ជានិងសន្យាការពារធនធានធម្មជាតិឱ្យបានដែរ។ ប៉ុន្ដែករណីកាប់ឈើ ការរំលោភបំពាន់ដីរដ្ឋយកធ្វើជាកម្មសិទ្ធិនៅតែកើតមានឡើង។ ដូច្នេះដើម្បីឱ្យមានប្រសិទ្ធភាពលើការការពារធនធានធម្មជាតិដែលនៅសេសសល់នេះ គឺត្រូវតែអនុវត្ដច្បាប់ចំពោះជនល្មើសទាំងពលរដ្ឋ និងមន្ដ្រីឬអ្នកមានលុយមានអំណាចឱ្យបានស្មើគ្នា។
លោកបន្តថា៖ «ខ្ញុំឃើញថា សព្វថ្ងៃ ករណីកាប់ព្រៃឈើលែងសូវមានហើយ ដោយសារតែវាអស់ព្រៃឈើ។ ប៉ុន្ដែករណីការរំលោភបំពានទន្ទ្រានយកដីរដ្ឋធ្វើជាកម្មសិទ្ធិនៅក្នុងខេត្ដមណ្ឌលគិរីគឺកើតមានស្ទើររាល់ថ្ងៃ។ឥឡូវនេះ មិនមែនតែមួយតំបន់ទេ គឺនៅទូទាំងខេត្ដមណ្ឌលគិរីគឺមានការទិញលក់ដីព្រៃរបស់រដ្ឋ គឺកើតមានឡើងរាល់ថ្ងៃ»៕
