ឧត្តរមានជ័យៈ មន្ទីរកសិកម្មខេត្តឧត្តរមានជ័យ បានកំពុងបន្តចែកពូជកង្កែប ត្រី និងមាន់ ជូនពលរដ្ឋក្រីក្រនិងពលករខ្មែរដែលទើបវិលត្រឡប់មកពីធ្វើការនៅប្រទេសថៃហើយមិនទាន់មានការងារធ្វើប្រមាណ ៩០០ គ្រួសារ សម្រាប់ចិញ្ចឹម ដើម្បីដោះស្រាយជីវភាពខ្វះខាតក្នុងអំឡុងពេលរីករាលដាលនៃជំងឺកូវីដ ១៩។
ប្រធានមន្ទីរកសិកម្មរុក្ខាប្រមាញ់និងនេសាទខេត្តឧត្តរមានជ័យ លោក សូត្រ ស៊ីសុខឃាង បានថ្លែងថា ស្របពេលពលរដ្ឋកំពុងជួបប្រទះវិបត្តិសេដ្ឋកិច្ច ដោយសារការឆ្លងរាលដាលជំងឺកូវីដ ១៩ ក្រសួងកសិកម្ម តែងតែយកចិត្តទុកដាក់ក្នុងការដោះស្រាយស្បៀង ក៏ដូចជាជីវភាពរបស់ពួកគាត់។ បច្ចុប្បន្នក្រសួងកំពុងអនុវត្តគម្រោង GIZ របស់ប្រទេសអាល្លឺម៉ង់ ដើម្បីលើកកម្ពស់ជីវភាពប្រជាពលរដ្ឋតាមរយៈការផ្តល់ជូនពូជកង្កែប ត្រី និងពូជមាន់ ។
លោកបានបន្តថា៖ «គម្រោងនេះមានរយៈពេល ៤ ខែ ដោយគិត ចាប់ពីខែ មិថុនា ដល់ខែតុលា ឆ្នាំ ២០២១ ដោយចែកជូនដល់ពលរដ្ឋ ៩០០ គ្រួសារ ដែលគាំទ្រទៅលើបីផ្នែក គឺផ្នែកចិញ្ចឹមកង្កែប ផ្នែកចិញ្ចឹមត្រីអណ្តែង និងផ្នែកចិញ្ចឹមមាន់»។
តាមរយៈគម្រោង GIZ នេះ គឺជួយទៅលើប្រជាពលរដ្ឋក្រីក្រ ៩០០ គ្រួសារ ក្នុងនោះ ៣០០ គ្រួសារចិញ្ចឹមកង្កែប ៣០០ គ្រួសារចិញ្ចឹមត្រីអណ្តែង និង ៣០០ គ្រួសារទៀត ចិញ្ចឹមមាន់។ ក្នុងនោះមួយគ្រួសារទទួលបានពូជកង្កែបចំនួន ២៥០ ក្បាល រីឯគ្រួសារចិញ្ចឹមត្រីអណ្តែងទទួលបានពូជត្រីចំនួន ៤៥០ ក្បាល និងគ្រួសារចិញ្ចឹមមាន់ទទួលបានពូជមាន់ចំនួន ១២ ក្បាល។
លោកបានគូសបញ្ជាក់ថា ក្រៅពីការផ្តល់ពូជលោកក៏បានផ្តល់ចំណីមួយការុង តង់សម្រាប់ចិញ្ចឹម រួមនឹងការផ្តល់ការបណ្តុះបណ្តាលបច្ចេកទេស ដើម្បីឱ្យគាត់យល់ដឹងពីបច្ចេកទេសក្នុងការចិញ្ចឹម ការដាក់ចំណី និងការដូរទឹកផងដែរ ។
ប៉ុន្តែលោកថា ក្នុងគម្រោង GIZ នេះទើបតែផ្តល់ជូនបាន ៦០០ គ្រួសារទេ គឺចែកពូជកង្កែប និងពូជត្រីអណ្តែង ដោយឡែកពូជមាន់មិនទាន់បានចែកទេដោយរង់ចាំមាន់ទាំងនោះទទួលបានការចាក់វ៉ាក់សាំងការពារជំងឺសិន។
លោកថា៖«៣០០ គ្រួសារទៀត ដែលនឹងទទួលពូជមាន់មិនទាន់ចែកទេដោយសារមាន់នៅមិនទាន់ចាក់វ៉ាក់សាំងហើយ ប៉ុន្តែយើងនឹងត្រូវបញ្ចប់ចាក់វ៉ាក់សាំងមាន់ក្នុងសប្តាហ៍នេះ ព្រោះយើងមិនអាចឱ្យពូជមាន់ទៅកសិករដោយគ្មានចាក់វ៉ាក់សាំងទេ ចៀសវាងគាត់ចិញ្ចឹមទៅមាន់មានជំងឺធ្វើឱ្យមាន់ងាប់ ហើយប្រឈមការខាតបង់ពេលវេលា»។
លោក ស៊ីសុខឃាង បានបន្តទៀតថា ពូជសត្វដែលផ្តល់ជូនដល់ពលរដ្ឋទាំងនោះសុទ្ធតែជាជម្រើសល្អសម្រាប់ចិញ្ចឹមលក្ខណៈគ្រួសារធ្វើជាស្បៀង ឬអាចលក់បានទៀតផង។
លោកថា៖ «ព្រោះពូជកង្កែបធំលឿន ចិញ្ចឹមតែជាង ១ ខែបានផល ហើយត្រីអណ្តែងយ៉ាងយូរ ២ ខែហូបបាន ចំណែកមាន់វិញចិញ្ចឹម ២ ឬ ៣ ខែ អាចហូបបាន ឬលក់បានហើយ»។ មួយវិញទៀតមន្ទីរកសិកម្ម ក៏រៀបចំឱ្យមានសហគមន៍រង់ចាំទិញមាន់ពីប្រជាជនផងដែរ៕