.jpg)
កិច្ចប្រជុំតាមអនឡាញនៅក្រសួងការងារពីថ្ងៃ ១២ តុលា។ រូបថត ក្រសួងការងារ
ភ្នំពេញៈ រដ្ឋមន្ត្រីក្រសួងការងារប្រកាសបើកដំណើរការឡើងវិញនូវគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ ក្រោមឱវាទក្រសួង ដើម្បីធានាបាននូវការបណ្តុះបណ្តាលប្រកបដោយគុណភាព និងប្រសិទ្ធភាព ក្រោយមានការឯកភាពពីប្រមុខរាជរដ្ឋាភិបាល។
ការប្រកាសបើកដំណើរការឡើងវិញគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ (អ.ប.វ) នេះបានធ្វើឡើងនៅថ្ងៃទី ១២ តុលា ឆ្នាំ ២០២១ តាមរយៈប្រព័ន្ធវីដេអូ (Zoom) ដោយមានអ្នកពាក់ព័ន្ធចូលរួមជិត ២០០ នាក់។
ទំព័រហ្វេសប៊ុករបស់ក្រសួងការងារបានបញ្ជាក់ថា៖ «ការបើកដំណើរការឡើងវិញគ្រឹះស្ថាន អ.ប.វ គឺមានភាពចាំបាច់ណាស់ ដើម្បីធានាបាននូវការបណ្តុះបណ្តាលប្រកបដោយគុណភាព និងប្រសិទ្ធភាពនៃកម្លាំងពលកម្មជំនាញ ឱ្យឆ្លើយតបទៅនឹងតម្រូវការទីផ្សារការងារ»។ ជាងនេះទៅទៀត ការអប់រំបណ្តុះបណ្តាលបច្ចេកទេស និងវិជ្ជាជីវៈ គឺជាឧបករណ៍ដ៏សំខាន់មួយរបស់រាជរដ្ឋាភិបាលកម្ពុជាក្នុងការស្តារសេដ្ឋកិច្ចជាតិឡើងវិញ បន្ទាប់ពីទទួលរងផលប៉ះពាល់ពីជំងឺកូវីដ ១៩។
លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានថ្លែងនៅក្នុងពិធីប្រកាសបើកដំណើរការឡើងវិញគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈនេះថា មុននឹងឈានដល់ការទទួលការអនុញ្ញាតឱ្យបើកដំណើរការសិក្សាឡើងវិញពីប្រមុខរាជរដ្ឋាភិបាលនេះ គឺអនុគណៈកម្មការវាយតម្លៃ ផែនការ និងយុទ្ធសាស្ត្រនៃគណៈកម្មការអន្តរក្រសួងប្រយុទ្ធនឹងជំងឺកូវីដ ១៩ បានពិនិត្យ និងវាយតម្លៃលើការរៀបចំគោលការណ៍ប្រតិបត្តិស្តង់ដា (SOP) រួចដាក់ឆ្លងការប្រជុំសម្រេចពីគណៈប្រចាំការនៃគណៈកម្មការជាតិប្រយុទ្ធនឹងជំងឺកូវីដ ១៩ (គ.ប.ក) កាលពីថ្ងៃទី ៤ តុលា ឆ្នាំនេះ។
លោកបន្តថា ការវាយតម្លៃនេះគឺផ្អែកលើហេតុផល ២ គឺទី ១ ក្រសួងបានរៀបចំគោលការណ៍ប្រតិបត្តិស្តង់ដា (SOP) ដែលមានលក្ខណៈគ្រប់ជ្រុងជ្រោយធានាបាននូវការបង្ការ ទប់ស្កាត់ ការរីករាលដាលនៃជំងឺកូវីដ ១៩ ជាពិសេសមានយន្តការច្បាស់លាស់ក្នុងការពិនិត្យវាយតម្លៃហានិភ័យ លក្ខណវិនិច្ឆ័យក្នុងការបិទ និងបើក និងមានប្រព័ន្ធរាយការណ៍ច្បាស់លាស់។
ចំណែកទី ២ លោកថា គឺគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈក៏ដូចគ្នានឹងស្ថាប័នឧត្តមសិក្សានៃក្រសួងអប់រំដែរ។ ម្យ៉ាងទៀតបុគ្គលិក សាស្ត្រាចារ្យ គ្រូបច្ចេកទេស ព្រមទាំងសិក្ខាកាម សិស្ស និស្សិត (មានអាយុចាប់ពី ១៥ ឆ្នាំឡើងទៅ) បានទទួលវ៉ាក់សាំងស្ទើរតែ ១០០ ភាគរយ និងកំពុងបន្តទទួលដូសទី ៣។
លោក អ៊ិត សំហេង បានបញ្ជាក់ថា៖ «ដើម្បីជួយសង្គ្រោះអាយុជីវិតប្រជាជន ការពារនូវសុខភាព និងសេចក្តីសុខរបស់ប្រជាជនរួចផុតពីជំងឺរាតត្បាតជាសកលកូវីដ ១៩ ហើយយើងអាចរៀបចំដំណើរការ សកម្មភាពសេដ្ឋកិច្ចរបស់យើងជាបណ្តើរៗឡើងវិញ ធានាបាននូវការរស់នៅមួយដែលយើងអាចរៀនរស់នៅជាមួយជំងឺកូវីដ ១៩ តាមគន្លងប្រក្រតីភាពថ្មី»។
បច្ចុប្បន្នក្រសួងការងារមានគ្រឹះស្ថាន អ.ប.វ ចំនួន ១៩៩ ស្ថាប័នក្នុងនោះគ្រឹះស្ថាន អ.ប.វ សាធារណៈចំនួន ៣៨ និងឯកជន អង្គការ/សមាគម ចំនួន ១៦១ ដែលមានសិក្ខាកាម សិស្ស និស្សិតប្រមាណជាង ៦០ ០០០ នាក់ បានបញ្ចប់ការសិក្សា និងចូលទៅក្នុងទីផ្សារការងារជារៀងរាល់ឆ្នាំ។
ក្នុងបរិបទនៃការរីករាលដាលនៃជំងឺកូវីដ ១៩ ក្រសួងការងារបានអនុញ្ញតឱ្យគ្រឹះស្ថាន អ.ប.វ ផ្តល់ការបណ្តុះបណ្តាលនៅគ្រប់កម្រិតសិក្សាទាំងរយៈពេលខ្លី មធ្យម និងវែងពីចម្ងាយ ឬតាមអនឡាញ និងបានបំពាក់ឧបករណ៍ សម្ភារ បរិក្ខារមូលដ្ឋានបច្ចេកវិទ្យា ព្រមទាំងការពង្រឹងសមត្ថភាពគ្រូបច្ចេកទេស ការកែលម្អ និងអភិវឌ្ឍកញ្ចប់ស្តង់ដាបណ្តុះបណ្តាល ដើម្បីគាំទ្រដល់កម្មវិធីបណ្តុះបណ្តាលនៅពេលបើកដំណើរការឡើងវិញ។ ក៏ប៉ុន្តែក្រសួងបានអះអាងថា គុណភាពនៃការអប់រំបណ្តុះបណ្តាលបច្ចេកទេស និងវិជ្ជាជីវៈពីចម្ងាយ ឬអនឡាញនៅមានកម្រិត ដោយសារតែសិក្ខាកាម សិស្ស និស្សិត ពុំបានអនុវត្តការងារជាក់ស្តែងនៅតាមរោងជាង៕
