ភ្នំពេញៈ ក្រសួងធនធានទឹក និងឧតុនិយមកាលពីព្រឹកថ្ងៃអង្គារ បានប្រកាសថា បាតុភូតភ្លៀងលាយឡំខ្យល់កន្ត្រាក់ និងរលកសមុទ្រនឹងបន្តកើតមានសាជាថ្មីម្ដងទៀត នៅក្នុងតំបន់វាលទំនាបកណ្ដាល និងតំបន់មាត់សមុទ្រ ដែលអាចបង្កជាហានិភ័យមួយចំនួនប៉ះពាល់ដល់ជីវភាពប្រចាំថ្ងៃរបស់ប្រជាពលរដ្ឋ ជាពិសេសប្រជានេសាទសមុទ្រ។
ការប្រកាសនេះ បានធ្វើឡើងបន្ទាប់ពីក្រុមមន្ត្រីជំនាញអាកាសធាតុ បានពិនិត្យឃើញថា ព្យុះទី១៨ ឈ្មោះ KOMPASU ដែលកំពុងស្ថិតនៅសមុទ្រចិនខាងត្បូង បានវិវត្តខ្លួនទៅជាវិសម្ពាធ ហើយខ្យល់មូសុងនិរតីកំពុងបង្កើនឥទ្ធិពលកាន់តែខ្លាំងឡើង ខណៈទ្រនុងសម្ពាធខ្ពស់ពីប្រទេសចិន កំពុងរំកិលចុះមកក្រោមគ្របដណ្ដប់លើភាគខាងជើងនៃប្រទេសកម្ពុជា។
តាមរយៈការពិនិត្យអង្កេតនេះ ក្រុមមន្ត្រីជំនាញផ្នែកអាកាសធាតុនៃក្រសួងធនធានទឹក និងឧតុនិយមបានព្យាករថា ចាប់ពីថ្ងៃទី ១៣ ដល់ថ្ងៃទី ១៩ ខែតុលា ខាងមុខនេះ រាជធានី-ខេត្តចំនួន ៨ ដែលស្ថិតនៅភាគកណ្ដាល និងភាគខាងត្បូងនៃប្រទេសកម្ពុជា ជាប់ព្រំប្រទល់ប្រទេសវៀតណាម រួមទាំងខេត្តដែលស្ថិតនៅជាប់តំបន់ជួរភ្នំក្រវាញ នឹងមានភ្លៀងធ្លាក់ខ្លាំង ព្រមទាំងមានខ្យល់កន្ត្រាក់បក់បោកក្នុងល្បឿនលឿន ដែលអាចបង្កឱ្យកើតមាននូវហានិភ័យមួយចំនួនប៉ះពាល់ដល់ការរស់នៅរបស់ប្រជាពលរដ្ឋ។
លោក អ៊ុំ រីណា ប្រធាននាយកដ្ឋានអាកាសធាតុ និងឧតុនិយមបានប្រាប់ ភ្នំពេញ ប៉ុស្តិ៍ថា នៅថ្ងៃទី ១៣ ដល់ថ្ងៃទី ១៥ ខែតុលា បណ្ដាខេត្តជាប់មាត់សមុទ្រនឹងមានភ្លៀងធ្លាក់ច្រើន ព្រមទាំងមានខ្យល់កន្ត្រាក់ក្នុងល្បឿនខ្លាំង និងរលកសមុទ្រខ្ពស់ៗកើតឡើង ដែលត្រូវបង្កើនការប្រុងប្រយ័ត្នខ្ពស់ចំពោះបាតុភូតភ្លៀងលាយឡំខ្យល់កន្ត្រាក់ និងរលកសមុទ្រ។
លោក រីណា ក៏បានអំពាវនាវផងដែរថា៖ «ក្នុងស្ថានភាពនេះសូមបងប្អូនប្រជាពលរដ្ឋ ជាពិសេសបងប្អូនប្រជានេសាទសមុទ្រ ត្រូវបង្កើនការប្រុងប្រយ័ត្នខ្ពស់ ចំពោះបាតុភូតនៃគ្រោះធម្មជាតិទាំងនេះ»។
ជាមួយគ្នានេះ អាជ្ញាធរខេត្តជាប់មាត់សមុទ្របានធ្វើការផ្សព្វផ្សាយជូនដំណឹងបន្តដល់ប្រជាពលរដ្ឋនៅតាមមូលដ្ឋាន ដោយដាក់ចេញនូវវិធានការមួយចំនួន ដើម្បីទប់ស្កាត់នូវគ្រោះភ័យនានា ដែលអាចកើតមាន ឬបង្កឡើងពីបាតុភូតគ្រោះធម្មជាតិទាំងនេះ។
លោក ហេង សុភណ្ឌរិទ្ធ ប្រធានមន្ទីរធនធានទឹក និងឧតុនិយម ខេត្តព្រះសីហនុបានប្រាប់ ភ្នំពេញ ប៉ុស្តិ៍ថា នៅពេលនេះរដ្ឋបាលខេត្តព្រះសីហនុបានហាមឃាត់ជាបណ្ដោះអាសន្នការធ្វើចរាចរណ៍តាមផ្លូវទឹក ព្រោះនៅពេលនេះក្នុងលម្ហសមុទ្រ កំពុងមានសភាពអាប់អួ ដោយមានភ្លៀងធ្លាក់ និងរលកសមុទ្រធំៗ។
លោកបានបញ្ជាក់ថា៖ «នៅពេលនេះ ក្នុងលម្ហសមុទ្រនៅពុំទាន់មានខ្យល់បក់បោកខ្លាំងនោះទេ ប៉ុន្តែផ្ទៃមេឃមានសភាពអាប់អួ ដោយសារមានភ្លៀងធ្លាក់ច្រើនថ្ងៃជាប់គ្នា និងមានរលកសមុទ្រធំៗ។ នៅក្នុងស្ថានភាពនេះ រដ្ឋបាលខេត្តយើងក៏បានអំពាវនាវដល់ប្រជានេសាទ និងអ្នកប្រកបរបរអាជីវកម្មទូកទេសចរណ៍ឱ្យផ្អាកជាបណ្ដោះអាសន្ននូវការធ្វើអាជីវកម្មរបស់ខ្លួន ដើម្បីចៀសវាងគ្រោះថ្នាក់កើតឡើង»។
បើតាមលោក សុភណ្ឌរិទ្ធ នៅពេលនេះ ក្រុមមន្ត្រីជំនាញកំពុងតាមដានស្ថានភាព កម្ពស់ទឹកនៅស្ទឹងសំរោងក្នុងស្រុកកំពង់សិលា កំពុងហក់ឡើងគួរឱ្យកត់សម្គាល់ផងដែរ ដោយគិតត្រឹមរសៀលថ្ងៃទី ១២ ខែ តុលា ឆ្នាំ ២០២១ នេះ ទឹកមានកម្ពស់ ៤,៧៥ ម៉ែត្រ ដែលកម្ពស់ទឹកត្រូវប្រកាសឱ្យមានការប្រុងប្រយ័ត្ន គឺ ៦,០០ ម៉ែត្រ។
ក្នុងករណីភ្លៀងនៅតែបន្តធ្លាក់ខ្លាំងដូចតាមការព្យាកររបស់ក្រសួងធនធានទឹក និងឧតុនិយមក្នុងរយៈពេល ៣ ថ្ងៃខាងមុខទៀតនេះ វានឹងធ្វើឱ្យកម្ពស់ទឹកស្ទឹងនេះនឹងជន់ឡើងបន្ថែមទៀត ឬ អាចលិចនៅផ្នែកខ្លះ ដែលស្ថិតនៅទំនាបជាប់មាត់ស្ទឹង ពិសេសនៅចំណុចភូមិអូរបាក់រទេះ។
លោក ស សូរិន្ទ នាយខណ្ឌជលផលខេត្តកំពតបានប្រាប់ ភ្នំពេញ ប៉ុស្តិ៍ថា ក្រុមប្រជានេសាទ បានផ្អាកសកម្មភាពនេសាទរបស់ខ្លួន ២ ថ្ងៃមកហើយដោយសារមានភ្លៀងធ្លាក់ខ្លាំង។ យ៉ាងណាក៏ដោយ នៅមានប្រជានេសាទមួយចំនួន នៅតែបន្តចេញទូកនេសាទនៅតាមតំបន់ប្រជុំកោះតូចៗជាប់ដៃសមុទ្រ ដើម្បីដោះស្រាយជីវភាពគ្រួសាររបស់ពួកគេ។
លោកថា៖ «ដោយសារប្រព័ន្ធបច្ចេកវិទ្យាទំនើប ពួកគេអាចទទួលបានព័ត៌មានទាន់ហេតុការណ៍ស្ដីពីស្ថានភាពអាកាសធាតុ ហើយពួកគេដឹងច្បាស់ថា តំបន់ណាពួកគេអាចចេញទៅនេសាទបាន។ ប៉ុន្តែយើងក៏ចាំបាច់ត្រូវរំឭកពួកគេឱ្យបង្កើនការប្រុងប្រយ័ត្នបន្ថែមទៀត ដើម្បីចៀសវាងការភ្លាំងភ្លាត់ ដែលអាចបង្កឱ្យមានគ្រោះថ្នាក់»។
កាលពីរសៀលថ្ងៃទី ១១ ខែតុលា អាជ្ញាធរខេត្តកំពតបានសម្រេចបើកទ្វារទឹកនៃអាងស្តុកទឹកវារីអគ្គិសនីកំចាយ ចំនួនមួយដើម្បីរំដោះទឹកចេញពីអាង ការពារបាក់ស្រុតទំនប់វារីអគ្គិសនី។ ទឹកដែលហូរធ្លាក់ពីអាងទំនប់វារីអគ្គិសនីនេះ បានធ្វើឱ្យផ្នែកនៃឃុំមាក់ប្រាង ស្រុកទឹកឈូ ដែលស្ថិតនៅខ្សែទឹកខាងក្រោមនៃតំបន់ទឹកឈូមានការជន់លិចដោយអន្លើ ប៉ុន្តែមិនទាន់ប៉ះពាល់ដល់លំនៅ ឬផលដំណាំរបស់ប្រជាកសិករណាម្នាក់នៅឡើយទេ។ នេះបើតាមការអះអាងរបស់លោក សេង ឆាយ មេឃុំមាក់ប្រាង។
លោកថ្លែងថា៖ «នៅផ្នែកខាងក្រោមព្រែកទឹកឈូ ក្នុងភូមិសាស្ត្រឃុំមាក់ប្រាង យើង មានការជន់លិចដោយអន្លើ ប៉ុន្តែមិនទាន់បង្កផលប៉ះពាល់ដល់លំនៅឋាន និងដំណាំចម្ការរបស់ប្រជាពលរដ្ឋនោះទេ។ សមត្ថកិច្ចយើងកំពុងបន្តឃ្លាំមើលស្ថានភាពទឹកនៅក្នុងព្រែក និងត្រៀមអន្តរាគមន៍ជួយដល់ពលរដ្ឋ ក្នុងករណីមានទឹកជំនន់កើតឡើង»។
លោកថា ក្រុមមន្ត្រីបច្ចេកទេសកំពុងសហការឃ្លាំមើលទំនប់៕
វីដេអូ៖