ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈស្នើម្ចាស់រោងចក្រ សហគ្រាស អនុញ្ញាតឱ្យកម្មករនិយោជិតឈប់សម្រាក ១ ថ្ងៃ ដោយមានប្រាក់ឈ្នួលនៅថ្ងៃដែលពួកគេទៅចាក់វ៉ាក់សាំងដូសជំរុញ ខណៈកម្មករនិយោជិតនៅខេត្តកោះកុង ៤ ពាន់នាក់ ត្រូវបានធ្វើតេស្តរហ័សរកកូវីដ ១៩ ក្រោយបុណ្យភ្ជុំបិណ្ឌ។
សេចក្តីជូនដំណឹងរបស់រដ្ឋមន្ត្រីក្រសួងការងារ ចុះថ្ងៃទី ១១ ខែតុលា បានឱ្យដឹងថាយោងតាមយុទ្ធសាស្ត្ររបស់រាជរដ្ឋាភិបាល ដែលមានចក្ខុវិស័យច្បាស់លាស់ក្នុងការគ្រប់គ្រង បង្ការ និងទប់ស្កាត់ការរីករាលដាលនៃជំងឺកូវីដ ១៩ ក៏ដូចជា រក្សាបាននូវស្ថិរភាពខ្សែចង្វាក់ផលិតកម្ម និងសុខភាពរបស់កម្មករនិយោជិតនៅតាមរោងចក្រ សហគ្រាសចាប់ពីថ្ងៃទី ១១ ខែ តុលា ឆ្នាំ ២០២១ តទៅ កងយោធពលខេមរភូមិន្ទនឹងរៀបចំយុទ្ធនាការចាក់វ៉ាក់សាំងកូវីដ ១៩ ដូសជំរុញជូនប្រជាពលរដ្ឋ និងបងប្អូនកម្មករនិយោជិតដោយឥតគិតថ្លៃ។
ក្រសួងបន្តថា «ដើម្បីចូលរួមក្នុងយុទ្ធនាការ ដែលជាផលប្រយោជន៍របស់ម្ចាស់ ឬនាយករោងចក្រសហគ្រាសនេះក្រសួងស្នើម្ចាស់ ឬនាយករោងចក្រ សហគ្រាស អនុញ្ញាតឱ្យកម្មករនិយោជិតឈប់សម្រាក ១ ថ្ងៃ ដោយមានប្រាក់ឈ្នួលនៅថ្ងៃដែលកម្មករនិយោជិតត្រូវចាក់វ៉ាក់សាំងដូសជំរុញ»។
ក្រសួងការងារ សង្ឃឹមថា ម្ចាស់ ឬនាយករោងចក្រសហគ្រាសនឹងអនុវត្តតាមសេចក្តីជូនដំណឹងនេះឱ្យមានប្រសិទ្ធភាពខ្ពស់។
ចំណែកប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តកោះកុង លោក យក់ សង្វាត ប្រាប់ ភ្នំពេញ ប៉ុស្តិ៍ថា បន្ទាប់ពីបុណ្យភ្ជុំបិណ្ឌ មានរោងចក្រជាង ៩០ ភាគរយ ហើយដែលបានអនុវត្តធ្វើតេស្តរហ័សរកមេរោគកូវីដ ១៩ លើកម្មករ។
លោកបានថ្លែងថា៖ «ដោយគិតជាលទ្ធផលរោងចក្រចំនួន ៦ មានរោងចក្រ ៥ ហើយបានធ្វើតេស្តរហ័សលើកម្មករនិយោជិតនៅសល់តែរោងចក្រ ១ ប៉ុណ្ណោះ»។ កម្មករដែលបានធ្វើតេស្តរួចហើយសរុបមានជិត ៤ ពាន់នាក់ ខណៈរោងចក្រ ១ ទៀតដែលមិនទាន់បានធ្វើតេស្តមានកម្មករសរុបជាង ៧ ពាន់នាក់ ប៉ុន្តែនៅតែអនុញ្ញាតឱ្យកម្មករចូលធ្វើការធម្មតា។
លោកបានបន្តថា៖ «ប៉ុន្តែរោងចក្រ ១ ទៀតមានកម្មករច្រើនជាងគេជាង ៧ ពាន់ឯណោះ ហើយខាងរោងចក្រនោះ បានប្រាប់មកយើងថាគាត់កំណត់ការធ្វើតេស្តរហ័សលើកម្មករគឺថ្ងៃទី ២១,២២,២៣ និងថ្ងៃទី ២៥ ខែតុលា ដោយសារគាត់កុម្ម៉ង់ឧបករណ៍តេស្តរហ័សមិនទាន់មកដល់ ព្រោះគាត់កុម្ម៉ង់ច្រើន»។
លោកបន្តទៀតថា អាជ្ញាធរអត់មានវិធានការហាមឃាត់មិនឱ្យកម្មករចូលធ្វើការទេ ប៉ុន្តែនៅពេលដែលមានករណីធ្វើតេស្តមានវិជ្ជមាន ដោយប្រការណាមួយ អាជ្ញាធរនឹងមានវិធានការ ទៅតាមវិធានការសុខាភិបាល។ លោក យក់ សង្វាត បានបញ្ជាក់ថា ក្នុងចំណោមកម្មករ-កម្មការិនីជិត ៤ ពាន់នាក់ ដែលបានធ្វើតេស្តរហ័សនោះ ដោយលទ្ធផលអវិជ្ជមានទាំងអស់។
កាលពីថ្ងៃទី ៥ ខែតុលា ក្រសួងការងារបានចេញសេចក្តីណែនាំដល់ម្ចាស់រោងចក្រ សហគ្រាសឱ្យធ្វើតេស្តរហ័សរកមេរោគកូវីដ ១៩ ចំពោះកម្មករនិយោជិតនៅតាមរោងចក្រ សហគ្រាសនៅទូទាំងប្រទេសក្រោយពេលឈប់សម្រាកក្នុងពិធីបុណ្យភ្ជុំបិណ្ឌ ដើម្បីចូលរួមចំណែកទប់ស្កាត់ការឆ្លងរាលដាលទ្រង់ទ្រាយធំនៃជំងឺកូវីដ ១៩ នៅតាមរោងចក្រសហគ្រាសក៏ដូចជាការរៀនរស់នៅតាមគន្លងប្រក្រតីភាពថ្មី និងការត្រៀមបើកសកម្មភាពសេដ្ឋកិច្ចឡើងវិញ។
ក្នុងសេចក្តីណែនាំបន្តថា «ការធ្វើតេស្តរហ័សរកមេរោគកូវីដ ១៩ នេះគឺផ្អែកលើគោលការណ៍ស្ម័គ្រចិត្ត និងមិនមានការផាកពិន័យទៅលើម្ចាស់ ឬនាយករោងចក្រ សហគ្រាស និងកម្មករនិយោជិតឡើយ»៕
វីដេអូ៖