ក្នុងដំណើរឆ្ពោះទៅសង្គមពុទ្ធិ កម្ពុជាត្រូវពង្រឹងវិស័យអប់រំដើម្បីឱ្យពលរដ្ឋរបស់ខ្លួនដែលឆ្លងកាត់ប្រព័ន្ធអប់រំមានកញ្ចប់សមត្ថភាពនៃសតវត្សរ៍ទី ២១។ ដូចនេះ គ្រូបង្រៀនត្រូវត្រៀមខ្លួនដើម្បីឆ្លើយតបប្រកបដោយប្រសិទ្ធភាព និងភាពស័ក្ដិសិទ្ធិទៅនឹងតម្រូវការសិក្សារបស់សិស្ស។ ក្នុងន័យនេះ ក្រសួងអប់រំ យុវជន និងកីឡាដាក់ចេញនូវការការបណ្ដុះបណ្ដាល និងពង្រឹងសមត្ថភាពរបស់គ្រូបង្រៀនតាមរយៈយុទ្ធសាស្ត្រមួយចំនួន។
អត្ថបទសម្រាប់ខែតុលា ឆ្នាំ ២០២១ ផ្ដោតលើការបណ្ដុះបណ្ដាលជាស៊េរី (webinar series) តាមប្រព័ន្ធអនឡាញស្ដីពីការប្រើប្រាស់បច្ចេកវិទ្យាថ្មីដើម្បីបង្រៀនពីចម្ងាយ ក្របខ័ណ្ឌគុណវឌ្ឍិជាតិកម្ពុជា ក្របខ័ណ្ឌគន្លងអាជីពគ្រូបង្រៀន និងការជ្រើសរើសគ្រូបង្រៀនល្អសម្រាប់ផ្ដល់ពានរង្វាន់ សម្ដេចតេជោសែន។
នៅក្នុងបរិការណ៍នៃវិបត្តិជំងឺកូវីដ ១៩ ទាំងក្នុងព្រះរាជាណាចក្រកម្ពុជា និងក្នុងពិភពលោក ការបង្រៀន និងរៀនតាមប្រព័ន្ធអេឡិចត្រូនិក និងពីចម្ងាយក្លាយទៅជាមធ្យោបាយថ្មី និងចាំបាច់បំផុតសម្រាប់វិស័យអប់រំ។
ឆ្លើយតបទៅនឹងស្ថានភាពនេះ ក្រសួងអប់រំ យុវជន និងកីឡាដែលមាននាយកដ្ឋានបច្ចេកវិទ្យាព័ត៌មានជាសេនាធិការ បានរៀបចំវគ្គបណ្ដុះបណ្ដាលជាស៊េរី (webinar series) តាមប្រព័ន្ធអនឡាញ ដើម្បីជួយគាំទ្រដល់បុគ្គលិកអប់រំ លោកគ្រូ អ្នកគ្រូ ក្នុងការបន្តនិរន្តរភាព និងពង្រឹងគុណភាពនៃការផ្ដល់សេវាអប់រំដល់សិស្សានុសិស្ស។ ក្នុងឆ្នាំ ២០២១ នេះ ក្រសួងអប់រំ យុវជន និងកីឡា បាននឹងកំពុងរៀបចំវគ្គបណ្ដុះបណ្ដាលជាស៊េរី (webinar series) តាមប្រព័ន្ធអនឡាញក្រោមប្រធានបទសំខាន់ៗមួយចំនួនដូចជា៖ (១) វេទិការអប់រំអេឡិចត្រូនិកសម្រាប់បឋមសិក្សា និងមធ្យមសិក្សា (២) វិធីសាស្ត្របង្រៀនពីចម្ងាយតាមប្រព័ន្ធអេឡិចត្រូនិកដោយប្រើប្រាស់ Google Workspace for Education (៣) ការប្រើប្រាស់បច្ចេកវិទ្យាជំរុញដល់ការសិក្សាបែបចម្រុះក្នុងបរិបទកូវីដ ១៩ (៤) របៀបងាយៗក្នុងការផលិតមាតិកាអប់រំឌីជីថល (៥) មូលដ្ឋានគ្រឹះនៃអក្ខរកម្មទិន្នន័យ និង (៦) ការរក្សាសុវត្ថិភាពលើបណ្ដាញអ៊ីនធឺណិតក្នុងបរិបទកូវីដ ១៩។ វគ្គបណ្ដុះបណ្ដាលពីចម្ងាយជាស៊េរីតាមប្រព័ន្ធអេឡិចត្រូនិកនេះត្រូវបានរៀបចំឡើងដើម្បីផ្ដល់ជូន បុគ្គលិកអប់រំនៅតាមមន្ទីរ និងការិយាល័យអប់រំ យុវជន និងកីឡាទូទាំងប្រទេស គណៈគ្រប់គ្រងសាលារៀន និងលោកគ្រូ អ្នកគ្រូចាប់ពីកម្រិតបឋមសិក្សារហូតដល់កម្រិតមធ្យមសិក្សាទុតិយភូមិ ដែលស្ថិតក្នុងក្របខ័ណ្ឌក្រសួងអប់រំ យុវជន និងកីឡា។
តាមរយៈកិច្ចខិតខំប្រឹងប្រែងរបស់ក្រសួងអប់រំ យុវជន និងកីឡា វគ្គបណ្ដុះបណ្ដាលជាស៊េរី (webinar series) តាមប្រព័ន្ធអនឡាញដែលបានដាក់ឱ្យដំណើរការចាប់តាំងពីខែមីនា ឆ្នាំ ២០២១ មកនេះទទួលបានសមិទ្ធផលជាផ្លែផ្កា ប្រកបដោយជោគជ័យគួរឱ្យកត់សម្គាល់ ក្នុងនោះសិក្ខាកាមដែលបានចូលរួមទទួលបានចំណេះដឹងសំខាន់ៗ និងចាំបាច់មួយចំនួន សម្រាប់យកទៅបម្រើដល់ដំណើរការបង្រៀន និងរៀនជាមួយសិក្សានុសិស្សនៅតាមសាលារៀន ឬស្ថាប័នរបស់ខ្លួនដែលកំពុងបម្រើការ ដូចជា (១) ការប្រើប្រាស់ Google Workspace for Education សម្រាប់គ្រប់គ្រងមាតិកាអប់រំឌីជីថល រៀបចំមេរៀនសម្រាប់បង្រៀន រៀបចំកម្រងសំណួរសម្រាប់ធ្វើតេស្តប្រចាំខែ និងប្រចាំឆមាស និងរៀបចំបង្រៀនសិស្សពីចម្ងាយតាមប្រព័ន្ធអេឡិចត្រូនិក (២) ការប្រើប្រាស់អ៊ីមែលផ្លូវការដែលផ្ដល់ជូនដោយក្រសួងអប់រំ យុវជន និងកីឡា បានត្រឹមត្រូវ (៣) ការប្រើប្រាស់ E-Learning Platform តាមរយៈកុំព្យូរទ័រ និងទូរស័ព្ទដៃ (៤) ការប្រើប្រាស់ និងការផ្លាស់ប្ដូរគណនីលើកម្មវិធី MoEYS E-Learning App របស់ក្រសួងអប់រំ យុវជន និងកីឡា និងផ្សព្វផ្សាយបន្តដល់សិស្សានុសិស្ស (៥) ការស្វែងរកមាតិកាអប់រំជាភាសាខ្មែរនៅក្នុងអនុគេហទំព័រ Krou Cambodia (krou.moeys.gov.kh) និងជាភាសាអង់គ្លេសនៅក្នុងគេហទំព័រ Open Education Resources (oer.moeys.gov.kh) របស់ក្រសួងអប់រំ យុវជន និងកីឡា (៦) ការស្វែងរកបានយ៉ាងងាយស្រួលនូវវីដេអូនៃការបង្រៀនសម្រាប់កម្រិតបឋមសិក្សា និងមធ្យមសិក្សាទៅតាមកម្រិតថ្នាក់ និងតាមមុខវិជ្ជា តាមរយៈគេហទំព័រ Youtube (youtube.com/moeyscambodia) របស់ក្រសួងអប់រំ យុវជន និងកីឡា (៧) ការប្រើប្រាស់បណ្ដាញសង្គមផ្លូវការរបស់ក្រសួងអប់រំ យុវជន និងកីឡា រួមទាំងទំព័រហ្វេសប៊ុកផ្លូវការ Krou Cambodia បានយ៉ាងល្អប្រសើរ (៨) ការចែករំលែកបន្ត និងការចូលក្រុម Telegram Channel របស់ក្រសួងអប់រំ យុវជន និងកីឡា ដើម្បីទទួលបានឯកសារបង្រៀន និងវីដេអូថ្មីៗ។
ដើម្បីចូលរួមរក្សាឱ្យមានសង្គតិភាពនៃការអប់រំ និងការបណ្ដុះបណ្ដាលនៅក្នុងព្រះរាជាណាចក្រកម្ពុជា ក្របខ័ណ្ឌគុណវុឌ្ឍិជាតិកម្ពុជា គឺជាធាតុសំខាន់ចាំបាច់មួយនៅក្នុងប្រព័ន្ធធានា និងទទួលស្គាល់គុណភាពអប់រំ។ គោលបំណងនៃការបង្កើតក្របខ័ណ្ឌគុណវុឌ្ឍិជាតិកម្ពុជាគឺ (១) ផ្ដល់នូវការទទួលស្គាល់លើលទ្ធផលសិក្សាដែលបានបញ្ចប់តាមកម្រិតគុណវឌ្ឍិនីមួយៗប្រកបដោយសង្គតិភាពជាតិ (២) ជួយបង្កើតច្រកអាចបត់បែនបានដែលបង្កភាពងាយស្រួលដល់អ្នកសិក្សា ក្នុងការផ្លាស់ប្ដូររវាងវិស័យអប់រំឧត្តមសិក្សា និងអប់រំបណ្ដុះបណ្ដាលបច្ចេកទេស និងវិជ្ជាជីវៈ និងរវាងវិស័យទាំង ២ ជាមួយនឹងទីផ្សារការងារតាមរយៈការផ្ដល់នូវមូលដ្ឋានសម្រាប់ការទទួលស្គាល់ការសិក្សាដែលមានពីមុនរួមមាន ការផ្ទេរក្រេឌីត និងការទទួលស្គាល់លើបទពិសោធ និងសមត្ថភាពបច្ចុប្បន្ន (៣) ផ្ដល់ភាពបត់បែនទៅតាមគោលបំណងផ្សេងៗគ្នានៃការអប់រំ និងការបណ្ដុះបណ្ដាល (៤) លើកទឹកចិត្តឱ្យមានការធ្វើវឌ្ឍនកម្មចំណេះដឹង ជំនាញតាមរយៈការអប់រំ និងការបណ្ដុះបណ្ដាលដោយកែលម្អឱ្យមានភាពច្បាស់លាស់នូវការជ្រើសរើសគុណវុឌ្ឍិ ការកំណត់ផលសម្រេច និងការរួមចំណែកក្នុងការសិក្សាពេញមួយជីវិត (៥) ជំរុញការផ្ដល់គុណភាពអប់រំ និងការបណ្ដុះបណ្ដាលឧត្តមសិក្សា បច្ចេកទេសវិជ្ជាជីវៈ តាមរយៈគុណវឌ្ឍិដែលឆ្លើយតបទៅនឹងតម្រូវការរបស់បុគ្គល ទីកន្លែងការងារ និងវិជ្ជាជីវៈដែលរួមចំណែកជួយដល់ការអភិវឌ្ឍសេដ្ឋកិច្ចជាតិ (៦) លើកកម្ពស់ការទទួលស្គាល់គុណវឌ្ឍិដែលចេញនៅក្នុងព្រះរាជាណាចក្រកម្ពុជាកម្រិតជាតិ និងអន្តរជាតិ និង (៧) សម្រួលដល់ចលនាកម្លាំងពលកម្មនៅក្នុងតំបន់។ ក្របខ័ណ្ឌគុណវឌ្ឍិជាតិនេះផ្ដល់ការបកស្រាយលើលក្ខណៈរួម និងភាពផ្សេងគ្នាសំខាន់ៗមួយចំនួននៃវិស័យ ២ គឺ ការអប់រំឧត្តមសិក្សា និងការអប់រំបណ្ដុះបណ្ដាលបច្ចេកទេស និងវិជ្ជាជីវៈ។
កម្រិតគុណវឌ្ឍិអប់រំបណ្ដុះបណ្ដាល និងវិជ្ជាជីវៈត្រូវបានកំណត់ជា ៨ កម្រិតគឺ៖ ៤ កម្រិតដំបូងអាចទទួលជាវិញ្ញាបនបត្រវិជ្ជាជីវៈ និងសញ្ញាបត្របច្ចេកទេស និងវិជ្ជាជីវៈ ១,២ និង ៣ ហើយត្រូវបានផ្ដល់តម្លៃសមមូលទៅនឹងការអប់រំមធ្យមសិក្សា ចំណែក ៤ កម្រិតបន្តពីនេះត្រូវបានចាត់ទុកជាគុណវឌ្ឍិក្រោយមធ្យមសិក្សាដែលអាចទទួលបានជា សញ្ញាប័ត្រជាន់ខ្ពស់/បរិញ្ញាបត្ររងបច្ចេកទេស/ឯកទេស បរិញ្ញាបត្របច្ចេកវិទ្យា/ឯកទេសសញ្ញាបត្រវិស្វករ បរិញ្ញាបត្រជាន់ខ្ពស់បច្ចេកវិទ្យា/ឯកទេស និងបណ្ឌិតបច្ចេកវិទ្យា/ឯកទេស។ កម្រិតចូលទៅកាន់ការអប់រំឧត្តមសិក្សា គឺជាការបញ្ចប់ដោយជោគជ័យនៅមធ្យមសិក្សាទុតិយភូមិ។ កម្រិតគុណវឌ្ឍិអប់រំឧត្តមសិក្សាមាន ៤ កម្រិតដែលអាចទទួលបានជា សញ្ញាប័ត្របរិញ្ញាប័ត្ររង សញ្ញាប័ត្របរិញ្ញាប័ត្រ សញ្ញាប័ត្របរិញ្ញាប័ត្រជាន់ខ្ពស់ និងសញ្ញាបត្របណ្ឌិត។
ក្នុងគោលដៅពង្រឹងគុណភាពបុគ្គលិកអប់រំជាពិសេសគ្រូបង្រៀន គណៈគ្រប់គ្រងសាលារៀន និងអ្នកឯកទេសអប់រំ ក្រសួងអប់រំ យុវជន និងកីឡា បានរៀបចំឡើងនូវក្របខណ្ឌគន្លងអាជីពគ្រូបង្រៀន តាមនិន្នាការនៃការអនុវត្តគន្លងអាជីពនៅប្រទេសអភិវឌ្ឍ និងក្នុងតំបន់ ដើម្បីឆ្លើយតបនឹងការប្រែប្រួលសង្គម និងសេដ្ឋកិច្ចជាតិ និងអន្តរជាតិ និងដោះស្រាយបញ្ហាប្រឈមក្នុងវិស័យអប់រំ។
ក្របខណ្ឌគន្លងអាជីពគ្រូបង្រៀនដើរតួនាទីជាឧបករណ៍គតិយុត្ត សម្រាប់ផ្ដល់ការលើកទឹកចិត្តបន្ថែមចំពោះគ្រូបង្រៀនដែលនៅកន្លែងលើសគ្រូបង្រៀនឱ្យទៅបម្រើការងារនៅសាលារៀនដែលខ្វះគ្រូផងដែរ។ គន្លងអាជីពគ្រូបង្រៀនកម្ពុជាត្រូវបានបែងចែកជា ៣ គន្លងគឺ (១) គន្លងគ្រូបង្រៀន (២) គន្លងគណៈគ្រប់គ្រង និង (៣) គន្លងអ្នកឯកទេសអប់រំ។
សម្រាប់អាជីពគ្រូបង្រៀន គន្លងអាជីពគ្រូបង្រៀនត្រូវបានរៀបចំសម្រាប់គ្រូបង្រៀនដែលមានឧបនិស្ស័យបង្រៀនសិស្សក្នុងថ្នាក់រៀន មានឆន្ទៈមោះមុត និងការប្ដេជ្ញាចិត្តខ្ពស់ ដើម្បីឱ្យសិស្សមានការរីកចម្រើននៅក្នុងជីវិតសិក្សា និងការងារ។ គន្លងអាជីពគ្រូបង្រៀនបែងចែកជា ៣ កម្រិត ដូចជា៖ (១) គ្រូល្អ (២) គ្រូឈានមុខ និង (៣) គ្រូឆ្នើម។ ដើម្បីឈានទៅដល់ការដំឡើងឋានៈវិជ្ជាជីវៈ គ្រូបង្រៀនត្រូវទទួលបានការវាយតម្លៃតាមរយៈយន្តការចំនួន ២ គឺ (១) ការវាយតម្លៃប្រចាំឆ្នាំ ដោយបែងចែកចេញជា ៤ ដំណាក់កាល និងផ្ដោតលើសមត្ថភាពវិជ្ជាជីវៈ និងសមិទ្ធផលនៃការអនុវត្តការអភិវឌ្ឍវិជ្ជាជីវៈប្រចាំឆ្នាំ និង (២) ការវាយតម្លៃគន្លងអាជីព ដោយផ្អែកលើលក្ខណៈវិនិច្ឆ័យចំនួន ៥ ដូចជា កម្រិតគុណវុឌ្ឍិ បទពិសោធ ឬអតីតភាពការងារ ស្នាដៃការងារ គុណផលការងារ និងលទ្ធផលសិក្សាសិស្ស និងការប្រតិបត្តិវិជ្ជាជីវៈ។ យន្តការនៃការវាយតម្លៃនីមួយៗត្រូវបានកំណត់ដោយសូចនាករលម្អិត។
ដើម្បីជាការលើកទឹកចិត្តបន្ថែមទៀតដល់គ្រូបង្រៀនល្អដែលមានស្នាដៃ និងពង្រឹងការបង្រៀនឱ្យមានគុណភាព និងប្រសិទ្ធភាព ក្រសួងអប់រំ យុវជន និងកីឡាបានដាក់ចេញ ប្រកាសលេខ ៧៦១ អយក.ប្រក ចុះថ្ងៃទី ២៦ ខែកក្កដា ឆ្នាំ ២០១៦ ស្ដីពី « ការកំណត់គោលការណ៍ លក្ខណៈវិនិច្ឆ័យ និងនីតិវិធីនៃការវាយតម្លៃ នាយក នាយិកាសាលារៀនល្អ និងគ្រូបង្រៀនល្អសម្រាប់ផ្ដល់ពានរង្វាន់ និងថវិកាអមពានរង្វាន់លើកទឹកចិត្តក្នុងសន្និបាតអប់រំ»។ ជារៀងរាល់ឆ្នាំសិក្សានីមួយៗ ក្រសួងអប់រំ យុវជន និងកីឡាធ្វើការជ្រើសរើសគ្រូបង្រៀនល្អចំនួន ៥ (ប្រាំ) រូប សម្រាប់ផ្ដល់ពាន់រង្វាន់ និងថវិកាអមពានរង្វាន់។ ពានរង្វាន់ជ័យលាភីប្រចាំឆ្នាំសិក្សានីមួយៗត្រូវបានកំណត់ឈ្មោះថា «ពានរង្វាន់ សម្ដេចតេជោសែន»។ ការវាយតម្លៃ និងជ្រើសរើសគ្រូបង្រៀនល្អត្រូវអនុវត្តតាមនីតិវិធីចំនួន ២ គឺ (១) ការបង្កើតគណៈកម្មការវាយតម្លៃ ដើម្បីផ្ដល់ពានរង្វាន់លើកទឹកចិត្ត និងជំរុញការអនុវត្តការងារឱ្យមានប្រសិទ្ធភាពខ្ពស់ ដោយឈរលើមូលដ្ឋាននៃស្ដង់ដារវិជ្ជាជីវៈគ្រូបង្រៀន (អត្ថបទស្ដីពី «ស្ដង់ដារវិជ្ជាជីវៈគ្រូបង្រៀន» ត្រូវបានចុះផ្សាយក្នុងកាសែតភ្នំពេញប៉ុស្ដិ៍កាលពីថ្ងៃទី ០៧ ខែកក្កដា ឆ្នាំ ២០២១) និង (២) ដំណាក់កាលនៃការវាយតម្លៃគ្រូបង្រៀនល្អ។
សូមបញ្ជាក់ផងដែរថា សមាសភាព និងតួនាទីភារកិច្ចនៃគណៈកម្មការវាយតម្លៃ និងនីតិវិធីនៃការដំណើរការវាយតម្លៃ ត្រូវបានកំណត់នៅក្នុងប្រកាសលេខ ៧៦១ អយក.ប្រក នេះផងដែរ។
សរុបសេចក្ដីមក ក្រសួងអប់រំ យុវជន និងកីឡាយកចិត្តទុកដាក់យ៉ាងខ្លាំង និងពិនិត្យយ៉ាងហ្មត់ចត់លើការបន្តការពង្រឹងគុណវឌ្ឍិគ្រូបង្រៀនដោយបានដាក់ចេញនូវក្របខណ្ឌគុណវឌ្ឍិជាតិកម្ពុជា គន្លងអាជីពគ្រូបង្រៀន ការជ្រើសរើសគ្រូបង្រៀនល្អដែលមានស្នាដៃសម្រាប់ផ្ដល់ពានរង្វាន់ សម្ដេចតេជោសែន នៅរៀងរាល់ឆ្នាំសិក្សានីមួយៗរួមទាំងការបណ្ដុះបណ្ដាលជាស៊េរី (webinar series) តាមប្រព័ន្ធអនឡាញស្ដីពីការប្រើប្រាស់ បច្ចេកវិទ្យាថ្មីដើម្បីបង្រៀនពីចម្ងាយ ដែលបាននិងកំពុងដើរតួនាទីយ៉ាងសំខាន់នៅក្នុងចូលរួមការអនុវត្តកំណែទម្រង់វិស័យអប់រំរបស់ព្រះរាជាណាចក្រកម្ពុជា៕