កណ្ដាលៈ សមត្ថកិច្ចខេត្តកណ្តាល បានបញ្ចូនជនសង្ស័យចំនួន ៣ នាក់ ដែលជាថៅកែដេប៉ូសាំងទៅតុលាការពាក់ព័ន្ធនឹងបទល្មើសបំផ្លិចបំផ្លាញ ឬគៃបំបាត់វត្ថុតាងបន្ទាប់ពីត្រូវបានឃាត់ខ្លួនកាលពីថ្ងៃទី ១២ តុលា ក្រោយពួកគេមិនសហការជាមួយសមត្ថកិច្ចពេលចុះទៅពិនិត្យការរ៉ាស់សាំងរបស់ពួកគេ។
ជនសង្ស័យទាំង ៣ នាក់ ដែលត្រូវបានឃាត់ខ្លួនបញ្ចូនទៅតុលាការ គឺមានឈ្មោះ ថូ សុផាត ឈ្មោះ ហ៊ុយ សុខហ៊ាង និងឈ្មោះ នួត វ៉ាន់ឌឿន ដែលត្រូវបានស្គាល់ថា ជាដេប៉ូសាំងឈ្មោះ ម៉ាក់ ម៉ីម៉ី និងដេប៉ូសាំងឈ្មោះ ចាន់ ធឿន ស្ថិតក្នុងភូមិព្រែកខ្សេវ សង្កាត់រកាខ្ពស់ ក្រុងតាខ្មៅ ខេត្តកណ្តាល។
លោក ឡាក់ ម៉េងធី ប្រធានការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលលខេត្តកណ្តាល បានប្រាប់ ភ្នំពេញ ប៉ុស្តិ៍ នៅថ្ងៃទី ១៣ តុលាថា ក្រោយការឃាត់ កាលពីថ្ងៃទី ១២ តុលា ពួកគេ ទាំង ៣ នាក់ ត្រូវបានកសាងសំណុំរឿងពាក់ព័ន្ធនឹងបទល្មើសបំផ្លិចបំផ្លាញ ឬគៃបំបាត់វត្ថុតាងនៅល្ងាចថ្ងៃទី ១៣ តុលា។
លោកថ្លែងថា៖ «យើងបានបញ្ចូនពួកគេទៅតុលាការហើយក្រោយសួរនាំចប់ ព្រោះតែពួកគេមិនសហការជាមួយសមត្ថកិច្ចនៅពេលកើតហេតុមន្ត្រីបានចុះត្រួតពិនិត្យដេប៉ូសាំងរបស់ពួកគេហើយរកឃើញថា ការលក់សាំងរបស់ពួកគេមិនបានអនុលោមភាពតាមបទប្បញ្ញត្តិច្បាប់។ ក្រោយមកមន្ត្រីបានផ្អាកដេប៉ូគាត់បណ្តោះអាសន្នតែពួកគាត់ បានហែកស្លាកបោះត្រារបស់សមត្ថកិច្ចចោល»។
កាលពីថ្ងៃទី ១១ តុលា មន្ត្រីសាខាអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) ខេត្តកណ្តាល បានចុះទៅពិនិត្យទីតាំងដេប៉ូសាំងរបស់ជនសង្ស័យទាំង ៣ នាក់ ដោយក្នុងនោះបានរកឃើញថា ដេប៉ូសាំងទាំង ២ នេះ បានបន្លំអតិថិជនដោយយកសាំងធម្មតាបន្លំជាសាំងស៊ុបពែរ។ នេះបើតាមលោក តូច ចៅកុយ ប្រធានសាខា ក.ប.ប ខេត្តកណ្តាល បានប្រាប់ ភ្នំពេញ ប៉ុស្តិ៍ នៅថ្ងៃទី ១៣ តុលា។
លោក តូច ចៅកុយ បានអះអាងបន្តថា មន្ត្រី ក.ប.ប ក៏បានរកឃើញទៀតថា ដេប៉ូសាំងទាំង ២ នេះ បានកេងបន្លំសាំងទៅលើអតិថិជន ដោយក្នុងមួយ ១០០ លីត្របាត់អស់ ចន្លោះ ៥ ទៅជិត ១០ លីត្រ ដែលល្មើសនឹងច្បាប់ស្តីពីកិច្ចការពារអ្នកប្រើប្រាស់ត្រូវបានបង្កើតឡើងក្នុងបំណងធានាឱ្យមានកិច្ចការពារអ្នកប្រើប្រាស់ និងចូលរួមលើកកម្ពស់ការប្រកួតប្រជែងដោយសុចរិត។
លោកបានរៀបរាប់ថា៖ «ដោយសារតែគាត់មិនសហការជាមួយយើងក៏យើងសុំគោលការណ៍ពីព្រះរាជអាជ្ញា ដើម្បីធ្វើការផាកពិន័យជាអន្តរកាលក្នុងដំណាក់កាលដំបូង។ តែគាត់ មិនព្រមជាមួយហើយគាត់ប្រមាថមន្ត្រីសាធារណៈដូច្នេះយើងក៏អនុវត្តតាមច្បាប់ ដើម្បីផ្អាកបណ្តោះអាសន្នតែគាត់ រារាំងនិងបំផ្លាញត្រារបស់យើង»។
បើតាមលោក តូច ចៅកុយ បានឱ្យដឹងថា តាមច្បាប់ស្តីពីកិច្ចការពារអ្នកប្រើប្រាស់ដេប៉ូសាំងទាំង ២ នេះគឺនៅតែទទួលការពិន័យជាអន្តរកាលដដែលចន្លោះពី ១០ លាន ទៅ ២០ លានបើទោះជាពួកគេត្រូវបានបញ្ចូនទៅតុលាការពាក់ព័ន្ធនឹងការប្រព្រឹត្តបទល្មើសព្រហ្មទណ្ឌ៕
វីដេអូ៖