.jpg)
សត្វគោងាប់នៅលើផ្លូវលំ ក្រោយពីស៊ីស្មៅក្នុងស្រែ។ រូបថត នគរបាល
កំពង់ធំៈ សមត្ថកិច្ចបាននិងកំពុងព្យាយាមសម្របសម្រួលរកដំណោះស្រាយឱ្យប្រជាពលរដ្ឋដែលជាម្ចាស់គោ និងម្ចាស់ស្រែ ករណីគោ ១៧ ក្បាលងាប់ ដោយហេតុស៊ីស្មៅ ដែលម្ចាស់ស្រែបានបាញ់ថ្នាំសម្លាប់ស្មៅ។
លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខប្រមាញ់ និងនេសាទខេត្តកំពង់ធំ ប្រាប់ ភ្នំពេញ ប៉ុស្តិ៍ នៅរសៀលថ្ងៃទី ១៣ តុលាថា សត្វគោដែលទៅស៊ីស្មៅនៅវាលស្រែហើយពុលថ្នាំបាញ់ស្មៅងាប់ ១៧ ក្បាល កាលពីថ្ងៃទី ៦ តុលា ឆ្នាំ ២០២១ ត្រូវបានដោះស្រាយជាសំណងបានចំនួន ៧ ក្បាលហើយ។ នៅសល់ ១០ ក្បាលទៀត សមត្ថកិច្ចអាវុធហត្ថកំពុងហៅម្ចាស់គោ និងម្ចាស់ស្រែ មកសម្របសម្រួលគ្នាបន្តទៀត។ ក្នុងការរកដំណោះស្រាយនេះម្ចាស់ដីស្រែបានចេញសង ២ លានរៀល ក្នុងគោ ១ ក្បាល។
លោក វណ្ណរិទ្ធ ថា៖ «បើនិយាយទៅកំហុសនេះគ្មានអ្នកណាចង់ខុសទេ។ ការចិញ្ចឹមសត្វត្រូវមើលថែវា តែយើងលែងចោលអីចឹង»។
លោក កង ស៊ន នាយប៉ុស្តិ៍នគរបាលសង្កាត់ស្រយ៉ូវ ឱ្យដឹងនៅរសៀលថ្ងៃទី ១៣ តុលាថា ដីស្រែនោះមានទីតាំងស្ថិតនៅភូមិរលួស សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ។ ចំណែកម្ចាស់គោដែលមានប្រមាណជា ៥ ទៅ ៦ គ្រួសារនោះ ក៏រស់នៅក្នុងភូមិ-សង្កាត់នេះដែរ។
លោកបន្តថា ដីស្រែនោះមានទំហំប្រហែលជា ២០០ ហិកតា ហើយគ្រប់គ្រងដោយឈ្មោះ ឈាង បូរ៉ា អាយុ ៤៥ ឆ្នាំ។ ដីស្រែនោះក៏មានព័ទ្ធរបងឈើដែរ ប៉ុន្តែមូលហេតុដែលសត្វគោចូលទៅក្នុងដីស្រែនោះ បានដោយសារនៅមុខផ្លូវចូលទៅមានការរបើកទ្វារ។ លោកបន្តថា ក្នុងដីស្រែនោះម្ចាស់ដីបានបាញ់ថ្នាំសម្លាប់ស្មៅឱ្យងាប់ ដើម្បីធ្វើស្ រែប៉ុន្តែចៃដន្យសត្វគោបានចូលទៅស៊ីស្មៅពុលងាប់ទៅ។ នៅថ្ងៃកើតហេតុភ្លាមៗថ្ងៃទី ៦ តុលា ឆ្នាំ ២០២១ លោករួមនឹងចៅសង្កាត់ស្រយ៉ូវបានចុះទៅពិនិត្យឃើញមានគោងាប់ចំនួន ១៧ ក្បាល។
លោក កង ស៊ន ថា៖ «សមត្ថកិច្ច និងអាជ្ញាធរយើងរង់ចាំធ្វើការដោះស្រាយរឿងនេះដែរ ដំបូងតែក្រោយមកម្ចាស់គោបានទៅប្តឹងខាងអាវុធហត្ថវិញ។ យ៉ាងណាក៏ជាការសម្រេចចិត្តរបស់ពលរដ្ឋទេ»៕
វីដេអូ៖
