ភ្នំពេញៈ អភិបាលខណ្ឌដូនពេញ លោក សុខ ពេញវុធ បានដាក់បទបញ្ជាឱ្យបណ្តាសង្កាត់ទាំង ១១ ដែលស្ថិតនៅចំណុះឱ្យខណ្ឌដូនពេញ ចុះប្រមូលជនអនាថា និងអ្នកប្រើប្រាស់គ្រឿងញៀនទាំងអស់យកមកធ្វើតេស្តស្វែងរកមេរោគកូវីដ ១៩ ដើម្បីបង្ការ និងទប់ស្កាត់ការរីករាលដាលនៃជំងឺនេះនៅក្នុងរាជធានីភ្នំពេញ។
លោក សំ សារិទ្ធិ ចៅសង្កាត់រងទី២ នៃសង្កាត់ផ្សារកណ្តាលទី១ ប្រាប់ ភ្នំពេញ ប៉ុស្តិ៍ នៅថ្ងៃទី ១៣ ខែតុលាថា នៅក្នុងខណ្ឌដូនពេញនេះ សម្បូរទៅដោយជនអនាថា និងអ្នកញៀនគ្រឿងញៀន ដែលតម្រូវឱ្យលោកអភិបាលខណ្ឌមានវិធានការឱ្យសង្កាត់ទាំងអស់ដើរចុះប្រមូលជនទាំងនេះ ដើម្បីធ្វើតេស្តរកជំងឺកូវីដ ១៩។ នៅថ្ងៃទី ១៤ តុលា អាជ្ញាធរសង្កាត់ផ្សារកណ្តាលទី១ នឹងចាប់ផ្តើមប្រមូលហើយ ខណៈនៅសង្កាត់ផ្សេងៗបាននិងកំពុងអនុវត្តបណ្តើរៗដោយប្រមូលបានជនអនាថា និងអ្នកប្រើគ្រឿងញៀនជាច្រើននាក់យកមកធ្វើតេស្តស្វែងរកជំងឹកូវីដ ១៩។ បើអវិជ្ជមាន ខណ្ឌនឹងបញ្ជូនបន្តទៅសង្គមកិច្ច។
បើតាមលោក សំ សារិទ្ធិ នៅសង្កាត់របស់លោកក៏សម្បូរជនអនាថា និងអ្នកញៀនគ្រឿងញៀនដែរ ជាពិសេសនៅតាមមាត់ទន្លេរ។ មូលហេតុដែលលោកអភិបាលខណ្ឌឱ្យដើរប្រមូលជនអនាថា នេះ ព្រោះព្រួយបារម្ភពាក់ព័ន្ធរឿងអសន្តិសុខនៅពេលយប់ និងមួយទៀត ពួកគាត់អាចបង្កឱ្យមានការឆ្លងនូវជំងឺកូវីដ ១៩។
លោកថ្លែងថា៖ «ដូច្នេះហើយ លោកអភិបាល ដាក់ផែនការមកឱ្យអនុវត្តអ៊ីចឹង។ មួយទៀតខាងខ្ញុំ ក៏កម្លាំងអត់សូវមាន កម្លាំងវាតិច។ យើងចាប់ជនអនាថា ទី១ យើងខ្លាចប៉ះពាល់ឆ្លងជំងឹកូវីដ ១៩ បើសិនជាមាន។ ទី២ ខ្លាចពួកគាត់ តដៃ វាពិបាកដែរ។ អ៊ីចឹងទាល់តែខណ្ឌសហការលើការងារនេះ»។
លោកស្រីដួង ដាវណ្ណ ចៅសង្កាត់រងទី១ នៃសង្កាត់ផ្សារថ្មីទី៣ ឱ្យដឹងថា លោកស្រីបានចូលរួមអនុវត្ត វិធានការរបស់លោកអភិបាលខណ្ឌដូនពេញ ដោយប្រមូលបាន ១៣ នាក់ នៅថ្ងៃទី ១៣ ខែតុលានេះ និងនៅតែបន្តធ្វើដូចភ្លៀងរលឹម។ នៅពេលដែលប្រមូលពួកគាត់បានរួចហើយ សង្កាត់សហការជាមួយខណ្ឌបញ្ជូនពួកគាត់ទៅមន្ទីរសង្គមកិច្ចរាជធានីភ្នំពេញ បើសិនជាមិនមានជំងឹកូវិដ១៩។ ប៉ុន្តែ បើសិនជាមានវិជ្ជមានជំងឺកូវីដ ១៩ នឹងត្រូវបញ្ជូនទៅព្យាបាល។
លោកស្រីថ្លែងថា៖ «យើងដើរប្រមូលពួកគាត់នេះ ក្នុងន័យដើម្បីទប់ស្កាត់ការរីករាលនៃជំងឺកូវីដ ១៩ និងកុំឱ្យពួកគាត់ស្នាក់នៅមុខផ្ទះរបស់ប្រជាពលរដ្ឋបង្កភាពភ័យខ្លាច ហើយកិច្ចការនេះ យើងធ្វើជាប្រចាំហើយ ព្រោះមានការប្តឹងពីពលរដ្ឋ»។
ភ្នំពេញ ប៉ុស្តិ៍ មិនអាចទាក់ទងលោក សុខ ពេញវុធ អភិបាលខណ្ឌដូនពេញ សុំធ្វើអត្ថាធិប្បាយបន្ថែមបានទេនៅថ្ងៃទី ១៣ ខែតុលានេះ ដោយលោកអះអាងថា កំពុងជាប់ប្រជុំជាមួយ លោកឃួង ស្រេង អភិបាលរាជធានីភ្នំពេញ ។
តាមការចុះផ្សាយរបស់សារព័ត៌មាន «កម្ពុជាថ្មី» នៅថ្ងៃទី ១៣ ខែតុលា ឱ្យដឹងថា ដើម្បីបោសសម្អាតនូវក្រុមជនអនាថា ជាពិសេសជនហិតកាវញៀនថ្នាំ នៅក្នុងមូលដ្ឋានខណ្ឌដូនពេញនោះ លោក សុខ ពេញវុធ អភិបាលនៃគណៈអភិបាលខណ្ឌដូនពេញ បានបញ្ជាឱ្យសង្កាត់ទាំង ១១ សហការគ្នាចុះប្រមូលក្រុមទាំងនោះ ដោយឃាត់ខ្លួនបានចំនួន ៣៥ នាក់ ហៅគ្រូពេទ្យមកតេស្តរកជំងឺកូវីដឃើញម្នាក់វិជ្ជមាន ត្រូវបានបញ្ជូនទៅព្យាបាលផងដែរ។ ចំណែកអ្នកដែលមិនមានវិជ្ជមាន ក៏ត្រូវបានបញ្ជូនទៅមន្ទីរសង្គមកិច្ចរាជធានីភ្នំពេញ ដើម្បីអប់រំកែប្រែបន្ត៕
វីដេអូ៖