.jpg)
កិច្ចប្រជុំនៃរដ្ឋអនុសញ្ញាស្តីពីជីវចម្រុះកាលពីថ្ងៃទី១២ តុលា ។ រូបថត ក្រសួងបរិស្ថាន
ភ្នំពេញៈ ប្រទេសកម្ពុជា និងរដ្ឋជាភាគីនៃអនុសញ្ញាសហប្រជាជាតិស្តីពីជីវចម្រុះបានបន្តដាក់ចេញនូវវិធានការមួយចំនួន ដើម្បីលើកកម្ពស់ការអភិរក្សជីវចម្រុះ និងប្រព័ន្ធអេកូឡូស៊ីរួមនឹងការប្រែប្រួលអាកាសធាតុ ដើម្បីឈានទៅរកការកសាងអនាគតរួមគ្នាសម្រាប់ជីវិតនៅលើផែនដី។
ផែនការយុទ្ធសាស្រ្ត និងកិច្ចពិភាក្សាសំខាន់ៗមួយចំនួន ត្រូវបានលើកឡើងនៅក្នុងកិច្ចប្រជុំថ្នាក់ដឹកនាំជាន់ខ្ពស់ នៃសន្និសីទកំពូលរដ្ឋជាភាគីលើកទី១៥ នៃអនុសញ្ញាសហប្រជាជាតិស្តីពីជីវចម្រុះ (CBD-COP 15) តាមរយៈប្រព័ន្ធរូបភាព និងសំឡេង(អនឡាញ)កាលពីថ្ងៃទី ១២ តុលា ឆ្នាំ ២០២១។ កិច្ចប្រជុំនេះ ដឹកនាំនិងមានការ
សម្របសម្រួលដោយលោក Huang Runqiu រដ្ឋមន្ត្រីអេកូឡូស៊ី និងបរិស្ថាន នៃសាធារណរដ្ឋប្រជាមានិតចិន និងមានការចូលរួមពីថ្នាក់ដឹកនាំ ដែលជាតំណាងនៃប្រទេសជាសមាជិក និងអ្នកពាក់ព័ន្ធរាប់ពាន់នាក់។
តាងនាមឱ្យកម្ពុជា រដ្ឋមន្រ្តីក្រសួងបរិស្ថាន លោក សាយ សំអាល់ បានដឹកនាំប្រតិភូកម្ពុជាចំនួន ៥០ រូប មកពីក្រសួង ស្ថាប័នពាក់ព័ន្ធ ចូលរួមក្នុងកិច្ចប្រជុំថ្នាក់ដឹកនាំជាន់ខ្ពស់មួយនេះ។
អ្នកនាំពាក្យក្រសួងបរិស្ថានលោក នេត្រ ភក្រ្តា បានប្រាប ភ្នំពេញ ប៉ុស្តិ៍ថា ការចូលរួមរបស់កម្ពុជា ក្នុងសន្និសីទ កំពូលនេះគឺដើម្បីបង្ហាញពីឆន្ទៈ និងការប្តេជ្ញាចិត្ត និងកាតព្វកិច្ចរបស់កម្ពុជា ក្នុងនាមខ្លួនជាប្រទេសហត្ថលេខី នៃអនុសញ្ញាសហប្រជាជាតិដែលបាននិងកំពុងគាំទ្រដល់គំនិតផ្តួចផ្តើមរបស់ពិភពលោកក្នុងការរៀបចំផែនការ សកម្មភាព និងយុទ្ធសាស្ត្រក្នុងការអភិរក្សជីវៈចម្រុះក្រោយឆ្នាំ ២០២០ និងគាំទ្រសេចក្តីថ្លែងការណ៍គន់មីង របស់ប្រទេសចិន និងគាំទ្រគំនិតផ្តួចផ្តើម Ecology Civilization ផងដែរ។
លោកបន្តថា ពាក់ព័ន្ធកិច្ចការអភិរក្សជីវចម្រុះនេះដែរ កម្ពុជាមានតំបន់អភិរក្សជីវចម្រុះទំហំ ៧,៣ លានហិកតា ស្មើប្រមាណ ៤១% នៃផ្ទៃដីប្រទេសកម្ពុជា។ ក្រសួងបរិស្ថានបាននិងកំពុងបន្តអនុវត្តផែនការសកម្មភាពនានា ក្នុងការការពារនិងថែរក្សា អភិរក្សធនធានធម្មជាតិ និងជីវចម្រុះនៅកម្ពុជាឱ្យបានគង់វង្ស។
លោបន្តថា៖«កម្ពុជាត្រូវបានទទួលស្គាល់ថាជាប្រទេសដែលសម្បូណ៌ដីជីវចម្រុះដែលមានប្រមាណជិត ៥ ០០០ ប្រភេទ ក្នុងនោះក៏មានប្រភេទសត្វកម្រដែលជិតផុតពូជពីលើពិភពលោកផងដែរ»។
លោកបានគូសបញ្ជាក់ថា ជាពិសេសនោះ រាជរដ្ឋាភិបាលកម្ពុជាបានតាំងចិត្តខ្ពស់ក្នុងការ ការពារ និងអភិរក្សធនធានធម្មជាតិដែលនៅសល់ដែលជាទីជម្រកទីកន្លែងរកចំណី និងប្រភពទឹករបស់ជីវចម្រុះគ្រប់ប្រភេទថែមទៀតផង។
ពាក់ព័ន្ធកិច្ចប្រជុំរវាងរដ្ឋជាភាគីនៃអនុសញ្ញាសហប្រជាជាតិស្តីពីជីវចម្រុះគឺបណ្តាថ្នាក់ដឹកនាំនៅលើពិភពលោក បានធ្វើសេចក្តីថ្លែងការណ៍ដើម្បីបង្ហាញពីឆន្ទៈនិងជំហររួមក្នុងការគាំទ្រដល់ការរៀបចំនិងជំរុញលើការអនុម័តក្របខ័ណ្ឌការងារជីវចម្រុះសកលក្រោយឆ្នាំ ២០២០ រួមទាំងមធ្យោបាយធនធានដើម្បីគាំទ្រនិងធានាបាននូវប្រសិទ្ធភាពក្នុងពេលអនុវត្តសំដៅឈានឆ្ពោះទៅសម្រេចបាននូវរបៀបវារៈឆ្នាំ ២០៣០ របស់អង្គការសហប្រជាជាតិ ព្រមទាំងចក្ខុវិស័យឆ្នាំ ២០៥០ ស្តីពីការរស់នៅដោយភាពសុខដុមរមនាជាមួយធម្មជាតិ។
តាមរយៈកិច្ចប្រជុំនោះ ក្រសួងបរិស្ថានដែលតំណាងឱ្យកម្ពុជា បានឱ្យដឹងថា ជាលទ្ធផល កិច្ចប្រជុំបានផ្តោតសំខាន់លើការលើកកម្ពស់ ការអភិរក្សជីវចម្រុះ និងប្រព័ន្ធអេកូឡូស៊ី ការកសាងអនាគតរួមគ្នា និងបានពិនិត្យ និងពិភាក្សាលើសកម្មភាពការងារ (អនាគតរួមគ្នា សម្រាប់ជីវិតទាំងអស់គ្នានៅលើផែនដី)។
ក្រសួងបន្តថា កិច្ចប្រជុំនោះផ្តោតទៅលើការលើកកម្ពស់ ដល់ប្រព័ន្ធអេកូឡីស៊ីសម្រាប់ជាមធ្យោបាយ ដល់ការធានាបាននូវអាហារ សុខភាព ការងារ ពារណិជ្ជកម្ម និងការអប់រំ ការផ្សារភ្ជាប់រវាងថវិកា និងការកសាងសមត្ថ-ភាពដើម្បីលើកកម្ពស់ប្រព័ន្ធអេកូឡូស៊ី ការលើកកម្ពស់សកម្មភាព និងគំនិតផ្តួចផ្តើមក្នុងការអនុវត្ត រវាងជីវចម្រុះ ការប្រែប្រួលអាកាសធាតុ ដីនិងសមុទ្រ។
ទន្ទឹមនេះដែរតាមរយៈកិច្ចប្រជុំកំពូលនេះ បណ្តាថ្នាក់ដឹកនាំ ក៏បានបន្តកិច្ចពិភាក្សាលើប្រធានបទចំនួន ៤ ជាបន្តទៀតរួមមាន ១-ការយកចិត្តទុកដាក់ស្តារធនធានជីវចម្រុះឡើងវិញ ២-ការលុបបំបាត់បញ្ហានិងកង្វះខាងហិរញ្ញប្បទានជីវចម្រុះ និងការធានានូវមធ្យោបាយសម្រាប់ការអនុវត្ត ៣-ការអភិរក្សជីវចម្រុះ និងការអភិវឌ្ឍដោយចរីភាព និងទី៤- ចំណេះដឹងការអនុវត្ត និងការបែងចែកផលប្រយោជន៍៕
