ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈស្នើធនាគារអភិវឌ្ឍន៍អាស៊ី (ADB) បន្តនូវកិច្ចសហប្រតិបត្តិការ និងផ្តល់ការគាំទ្រដល់គម្រោងបណ្តុះបណ្តាលបច្ចេកទេស និងវិជ្ជាជីវៈដើម្បីអភិវឌ្ឍធនធានមនុស្ស ដើម្បីឆ្លើយតបនឹងគោលនយោបាយអភិវឌ្ឍន៍ឧស្សាហកម្ម គោលនយោបាយអភិវឌ្ឍន៍មុខរបរ និងការងារនៅកម្ពុជា។
សំណើនេះបានលើកឡើងក្នុងជំនួបតាមប្រព័ន្ធវីដេអូ រវាងរដ្ឋមន្ត្រីក្រសួងការងារ លោក អ៊ិត សំហេង និងលោកស្រី Sunniya Durrani-Jamal តំណាងប្រចាំប្រទេសកម្ពុជារបស់ធនាគារអភិវឌ្ឍន៍អាស៊ីដែលត្រូវផុតអាណត្តិពីថ្ងៃទី ១៣ ខែតុលា។
ក្នុងជំនួបនោះ លោក អ៊ិត សំហេង បានលើកឡើងអំពីវឌ្ឍនភាពមួយចំនួនដែលក្រសួងការងារបានអនុវត្តនូវគម្រោងធំៗ ដែលជាការជួយឧបត្ថម្ភគាំទ្រពីធនាគារអភិវឌ្ឍន៍អាស៊ី។ បច្ចុប្បន្ននេះអគ្គនាយកដ្ឋានអប់រំបណ្តុះបណ្តាលបច្ចេកទេស និងវិជ្ជាជីវៈបាននិងកំពុងអនុវត្តគម្រោងធំៗចំនួន ២ ក្រោមហិរញ្ញប្បទានរបស់ធនាគារអភិវឌ្ឍន៍អាស៊ី។ ទី១ គម្រោងអភិវឌ្ឍន៍វិស័យអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) និងទី២ គម្រោងជំនាញសម្រាប់ការប្រកួតប្រជែង ដែលគម្រោងទាំង ២ នេះបានចូលរួមអនុវត្តឆ្លើយតបទៅនឹងគោលនយោបាយអភិវឌ្ឍន៍ឧស្សាហកម្មនៅកម្ពុជា។
លោក អ៊ិត សំហេង បញ្ជាក់ថា៖ «គម្រោងនេះបានជួយដល់គោលនយោបាយអភិវឌ្ឍន៍មុខរបរ និងការងារគោលនយោបាយជាតិអប់រំបណ្តុះបណ្តាលបច្ចេកទេស និងវិជ្ជាជីវៈ ផែនការយុទ្ធសាស្ត្រអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈ ផែនការយុទ្ធសាស្ត្រសកម្មភាព ការធ្វើទំនើបកម្មប្រព័ន្ធអប់រំបណ្តុះបណ្តាលបច្ចេកទេស និងវិជ្ជាជីវៈ»។
ក្រៅពីនេះ គម្រោងទាំង ២ បានជួយដល់ផែនការមេសម្រាប់អភិវឌ្ឍគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ ដោយក្នុងនោះរួមមានហេដ្ឋារចនាសម្ព័ន្ធ ការបំពាក់ឧបករណ៍សម្ភារ ការអភិវឌ្ឍធនធានមនុស្ស ការអភិវឌ្ឍកម្មវិធីសិក្សាការបណ្តុះបណ្តាលប្រាក់ឧបត្ថម្ភសិស្សកម្មសិក្សា (គ្រូ និងសិស្ស) និងការសិក្សាផ្អែកលើការងារ។
លោកបានបញ្ជាក់ថា ជាការពិត គម្រោងដែលទទួលបានផ្លែផ្កាទាំងនេះ បើមិនមានការចូលរួមជ្រោមជ្រែងពីលោកស្រី SunniyaDurrani-Jamal ទេ ក៏ការអនុវត្តគម្រោងពិតជាមិនទទួលបានជោគជ័យតាមការគ្រោងទុកឡើយ។
ទន្ទឹមនោះដែរ លោក អ៊ិត សំហេង បានស្នើដល់ ADB ថា៖ «ខ្ញុំសំណូមពរ និងស្នើដល់ ADB បន្តនូវកិច្ចសហប្រតិបត្តិការលើវិស័យ TVET ជាមុំមួយនៅក្នុងយុទ្ធសាស្ត្រចតុកោណ ផ្តោតលើការអភិវឌ្ឍធនធានមនុស្ស និងស្នើដល់ ADB ចំពោះការផ្តល់គម្រោងគាំទ្រវិស័យ TVET នានា ហើយសូមឱ្យមានភ្នាក់ងារអនុវត្តន៍គម្រោងដោយក្រសួងសាមីផ្ទាល់តែម្តង ដើម្បីងាយស្រួលក្នុងការគ្រប់គ្រងតាមដាន និងត្រួតពិនិត្យក៏ដូចជាប្រសិទ្ធភាពនៃការអនុវត្តគម្រោងប្រកបដោយគុណភាព»។
ក្នុងជំនួបនោះដែរ លោកស្រី Sunniya Durrani-Jamal បានសម្តែងនូវការពេញចិត្ត ចំពោះកិច្ចសហប្រតិបត្តិការជាមួយនឹងរាជរដ្ឋាភិបាលកម្ពុជា ក្នុងការចូលរួមអភិវឌ្ឍលើវិស័យជាច្រើន ដោយក្នុងនោះលោកស្រីចាត់ទុកថា ក្រសួងការងារគឺជាស្នូលសំខាន់មួយក្នុងការលើកស្ទួយកំណើនសេដ្ឋកិច្ច។
តាមរយៈបេសកកម្មកន្លងមកនេះលោកស្រីបានមើលឃើញពីការខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការអភិវឌ្ឍសង្គមសេដ្ឋកិច្ចឱ្យមានភាពរីកចម្រើនគួរឱ្យកត់សម្គាល់ ហើយលោកស្រីបានវាយតម្លៃខ្ពស់ចំពោះកិច្ចសហប្រតិបត្តិការរវាងក្រសួងការងារ និង ADB ប្រកបដោយភាពស្និទ្ធស្នាលបំផុត។
ឆ្លើយតបជាមួយនឹងសំណូមពររបស់លោក អ៊ិត សំហេង លោកស្រី Sunniya Durrani-Jamal បានថ្លែងថា៖ «ខ្ញុំនឹងលើកយកសំណើទាំងនេះ ជួយសិក្សារកវិធីសាស្ត្រ និងគាំទ្រដើម្បីឱ្យយុវជនងាកមកចាប់អារម្មណ៍ចុះឈ្មោះចូលរៀនក្នុងប្រព័ន្ធ TVET ដោយក្នុងនោះនឹងបន្តសហការជាមួយគ្នាដើម្បីរៀបចំគម្រោងថ្មីៗថែមទៀតសំដៅធានាដល់ការបណ្តុះបណ្តាលធនធានមនុស្ស»។
លោកស្រីថា ការបណ្តុះបណ្តាលធនធានមនុស្ស ត្រូវធ្វើឡើងតាមរយៈការបណ្តុះបណ្តាលផង ធ្វើការផង ដែលជាដំណោះស្រាយដ៏ល្អក្នុងការបង្កើតកម្លាំងពលកម្មជំនាញ ព្រោះថាការបណ្តុះបណ្តាលតែតាមគ្រឹះស្ថានដល់ចប់ ទើបចូលទៅទីផ្សារការងារ គឺមិនអាចឆ្លើយតបទាន់តាមតម្រូវការនៃទីផ្សារការងារបានទេ។
កាលពីថ្ងៃទី ១២ ខែតុលា ក្រសួងការងារបានប្រកាសបើកឡើងវិញនូវគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ (អ.ប.វ.) ក្រោមឱវាទក្រសួង ក្រោយពីទទួលបានការឯកភាពពីលោកនាយករដ្ឋមន្ត្រី ហ៊ុន សែន។ ក្រសួងបញ្ជាក់ថា៖ «ការបើកដំណើរការឡើងវិញគ្រឹះស្ថាន អ.ប.វ. គឺមានភាពចាំបាច់ណាស់ ដើម្បីធានាបាននូវការបណ្តុះបណ្តាលប្រកបដោយគុណភាព និងប្រសិទ្ធភាពនៃកម្លាំងពលកម្មជំនាញឱ្យឆ្លើយតបទៅនឹងតម្រូវការទីផ្សារការងារ»៕