.jpg)
សកម្មភាពចុះត្រួតពិនិត្យប្រេងនៅស្ថានីយប្រេងក្នុងខេត្តកំពង់ចាមពីថ្ងៃ ១២ តុលា។ រូបថត ក.ប.ប
ភ្នំពេញៈ មន្ត្រីសាខានៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) ប្រចាំនៅខេត្តចំនួន ៤ បានរកឃើញស្ថានីយ/ដេប៉ូប្រេងឥន្ធនៈចំនួន ១៧ ទីតាំងបន្ថែមទៀត មិនមានអនុលោមភាពតាមបទប្បញ្ញត្តិច្បាប់ ខណៈផលិតផលធ្វើពីទឹកដោះគោ និងនំជាង ២ តោនត្រូវបានដកហូតនៅក្នុងរយៈពេល ១ ថ្ងៃ។
ទំព័រហ្វេសប៊ុករបស់ ក.ប.ប បានឱ្យដឹងនៅថ្ងៃទី ១២ តុលាថា មន្ត្រីសាខា ក.ប.ប ប្រចាំនៅខេត្តខេត្តរតនគិរី ខេត្តសៀមរាប ខេត្តបាត់ដំបង និងខេត្តកំពង់ចាម បានរកឃើញស្ថានីយ/ដេប៉ូប្រេងឥន្ធនៈចំនួន ១៧ ទីតាំង មិនមានអនុលោមភាពតាមបទប្បញ្ញត្តិច្បាប់ ក្រោយពីបានចុះប្រតិបត្តិការត្រួតពិនិត្យតាមបណ្តាស្ថានីយ/ដេប៉ូចែកចាយប្រេងឥន្ធនៈសរុបចំនួន ៣២ ទីតាំង។
អគ្គនាយដ្ឋាន ក.ប.ប បានបន្តទៀតថា «នៅថ្ងៃទី ១១ និងថ្ងៃទី ១២ តុលាបានរកឃើញស្ថានីយ/ដេប៉ូប្រេងឥន្ធនៈទាំងនេះនៅក្នុងភូមិសាស្ត្រ ក្រុងបានលុង ស្រុកសូទ្រនិគម ស្រុកអង្គរជុំ ស្រុកថ្មគោល ស្រុកបវេល និងស្រុកជើងព្រៃ។ សម្រាប់ស្ថានីយ/ដេប៉ូដែលប្រព្រឹត្តខុសនឹងបទប្បញ្ញត្តិខាងលើត្រូវបានមន្ត្រីជំនាញធ្វើការណែនាំ និងពិន័យតាមនីតិវិធី»។
ជាមួយគ្នានេះដែរ អគ្គនាយកដ្ឋាន ក.ប.ប បានឱ្យដឹងទៀតថា សម្រាប់នៅខេត្តបន្ទាយមានជ័យក្នុងរយៈពេល ១ ថ្ងៃនៃថ្ងៃទី ១២ តុលា មន្ត្រី ក.ប.ប ប្រចាំខេត្តនេះបានរកឃើញ និងស្ទាក់ចាប់បានទឹកដោះគោស្រស់ ផលិតផលពីទឹកដោះគោ និងនំចំនួន ២ តោននិង ៦៥៥,៦២ គីឡូក្រាមដែលឈ្មួញលួចនាំចូលពីប្រទេសថៃតាមច្រករបៀង។
អគ្គនាយដ្ឋាន ក.ប.ប បញ្ជាក់ថា៖ «ក្រោយពីបានរកឃើញដូចនេះមន្ត្រីជំនាញបានដកហូត ដើម្បីកម្ទេចចោលភ្លាមៗចៀសវាងឈ្មួញឆ្លៀតឱកាសដាក់ចរាចរណ៍ផលិតផលទាំងនេះនៅលើទីផ្សារដែលអាចនាំឱ្យប៉ះពាល់ដល់សុខភាពប្រជាពលរដ្ឋយ៉ាងធ្ងន់ធ្ងរ»។
លោក ផាន អូន អគ្គនាយកនៃអគ្គនាយកដ្ឋាន ក.ប.ប បាននិយាយថា ផ្អែកលើបរិមាណទំនិញមិនប្រក្រតីដែលត្រូវបានរកឃើញពីតាមបណ្តាទីផ្សារក្នុងរយៈពេលកន្លងមកនេះគឺបង្ហាញថា ទំនិញទាំងនេះមិនទាន់មានការថយចុះនៅឡើយនោះទេនៅលើទីផ្សារ។
លោកបន្ថែមថា មូលហេតុសំខាន់ដែលទំនិញពុំមានសុវត្ថិភាពទាំងនោះនៅតែបន្តមានវត្តមានចរាចរណ៍នៅលើទីផ្សារ ដោយសារអាជីវករមួយចំនួនតូចនៅគិតពីផលប្រយោជន៍ផ្ទាល់ខ្លួនខ្ពស់ជាងសុខភាពរបស់អ្នកប្រើប្រាស់។
ដើម្បីបញ្ចៀសនូវផលប៉ះពាល់ដល់សុខភាព និងធានាដល់ការប្រកួតប្រជែង លោក ផាន អូន រំពឹងថា គ្រប់ធុរជន និងពលរដ្ឋគ្រប់រូប ត្រូវរកស៊ីប្រកបដោយសុចរិត និងគិតគូរអំពីសុខុមាលភាពរបស់អ្នកប្រើប្រាស់ជាចម្បង ហើយត្រូវគោរពឱ្យបាននូវវិធានការទាំងនេះនឹងបញ្ចៀសពួកគេពីការខាតបង់ និងទោសទណ្ឌដែលមានជាធរមាន។
បើតាមតួលេខរបស់អគ្គនាយកដ្ឋាន ក.ប.ប នៅក្នុងខែកញ្ញា មន្ត្រីបានដកហូតផលិតផលម្ហូបអាហារខូចគុណភាពជាង ១ តោន ភេសជ្ជៈជាង ៧ ពាន់លីត្រ និងអាល់កុលក្លែងក្លាយជិត ៦ ម៉ឺនលីត្រ ខណៈការត្រួតពិនិត្យស្ថានីយ/ដេប៉ូប្រេងទូទាំងប្រទេសធ្វើបានជិត ៥០០ ទីតាំងនោះ បានរកឃើញស្ថានីយ/ដេប៉ូប្រេងដែលមានភាពមិនអនុលោមទៅតាមច្បាប់ និងបានផាកពិន័យតាមគោលការណ៍ច្បាប់ចំនួន ២២៤ ស្ថានីយ/ដេប៉ូ។
សូមជម្រាបថា ច្បាប់ស្តីពីកិច្ចការពារអ្នកប្រើប្រាស់ត្រូវបានបង្កើតឡើងក្នុងបំណងធានាឱ្យមានកិច្ចការពារអ្នកប្រើប្រាស់ និងចូលរួមលើកកម្ពស់ការប្រកួតប្រជែងដោយសុចរិត។
ច្បាប់នេះបានកំណត់អំពីសិទ្ធិ និងកាតព្វកិច្ចរបស់ធុរជន និងសិទ្ធិរបស់ពលរដ្ឋដែលជាអ្នកប្រើប្រាស់ ហើយត្រូវបានប្រកាសឱ្យប្រើប្រាស់កាលពីថ្ងៃទី ២ ខែវិច្ឆិកា ឆ្នាំ ២០១៩៕
