.jpg)
ការប្រើប្រាស់ទឹករបស់កម្មការិនីក្នុងតំបន់បិទខ្ទប់នៅភ្នំពេញកាលពីឧសភា ឆ្នាំនេះ ។ ហេង ជីវ័ន
ភ្នំពេញៈ រដ្ឋាករទឹកស្វយ័តក្រុងភ្នំពេញ បានព្រមានចាត់វិធានការតឹងរ៉ឹងចំពោះម្ចាស់បន្ទប់ជួលមួយចំនួនដែលបានលក់ទឹកជូនកម្មករកម្មការិនី និងសិស្សនិស្សិតក្នុងតម្លៃថ្លៃចាប់ពី ១ ០០០ រៀល ដល់ ៣ ០០០ រៀល ក្នុង ១ ម៉ែត្រគុប ផ្ទុយពីការព្រមព្រៀងនៅក្នុងរាជធានីភ្នំពេញ និងក្រុងតាខ្មៅ។
ការប្រកាសយ៉ាងដូច្នេះបានធ្វើឡើង ដើម្បីឆ្លើយតបនឹងព័ត៌មានរបស់ប្រព័ន្ធផ្សព្វផ្សាយមួយចំនួនដែលបានផ្សព្វផ្សាយពីការរកឃើញរបស់សមាគមមណ្ឌលព័ត៌មានកម្មករ ទាក់ទងនឹងការអនុវត្តតម្លៃលក់ទឹក ៨០០ រៀល ក្នុង ១ ម៉ែត្រគុប ជូនកម្មករ កម្មការី និងសិស្សនិស្សិត។
សេចក្តីប្រកាសព័ត៌មានរបស់រដ្ឋាករទឹកស្វយ័តក្រុងភ្នំពេញ ចុះថ្ងៃទី ១៣ តុលា បានលើកឡើងថា ក្នុងគោលបំណងកាត់បន្ថយការចំណាយ និងលើកស្ទួយកម្រិតជីវភាពរបស់កម្មករ កម្មការិនី និងសិស្សនិស្សិត ដែលស្នាក់នៅបន្ទប់ជួលក្នុងរាជធានីភ្នំពេញ និង ក្រុងតាខ្មៅ ប្រមុខរាជរដ្ឋាភិបាល បានសម្រេចបញ្ចុះថ្លៃទឹកជូនដល់ពួកគាត់។
គោលការណ៍នេះគឺបានឲ្យរដ្ឋាករទឹកស្វយ័តក្រុងភ្នំពេញចុះកិច្ចសន្យាលក់ទឹកជូនម្ចាស់ផ្ទះជួលចំនួន ៤ ៦៨៩ ទីតាំង ឬស្មើនឹង ១២១ ៣១៣ បន្ទប់ ក្នុងថ្លៃ ៧០០ រៀល ក្នុង ១ ម៉ែត្រគុប ដែលទាបជាងថ្លៃដើម នឹងកំណត់ឲ្យម្ចាស់ផ្ទះជួលត្រូវលក់បន្តជូនកម្មករ កម្មការិនី និងសិស្សនិស្សិត ក្នុងថ្លៃ ៨០០ រៀល ក្នុង ១ ម៉ែត្រគុប។
ទោះយ៉ាងណា តាមការចុះអង្កេតស្រាវជ្រាវ ដល់ទីតាំងដែលចង្អុលបង្ហាញដោយសមាគមមណ្ឌលព័ត៌មានកម្មករ រដ្ឋាករទឹកស្វយ័ត បានរកឃើញថា មានម្ចាស់ទីតាំងបន្ទប់ជួលមួយចំនួន បានលក់ទឹកក្នុងតម្លៃចន្លោះពី ១ ០០០ រៀល ទៅ ៣ ០០០ រៀល ក្នុង ១ ម៉ែត្រគុប ដែលផ្ទុយពីការព្រមព្រៀងក្នុងកិច្ចសន្យា ដោយសារសម្ពាធទឹកនៅទីតាំងរបស់ពួកគាត់ខ្សោយ ទាមទារបំពាក់ម៉ូទ័របូមជំនួយ ដែលត្រូវចំណាយខ្ពស់លើថាមពលអគ្គិសនី។
រដ្ឋាករទឹកស្វយ័ត បានបញ្ជាក់ពីមូលហេតុទៀតថា «ទន្ទឹមនឹងនោះក៏មានម្ចាស់ផ្ទះជួលមួយចំនួនបានគិតតម្លៃបំពេញបន្ថែមទៅលើភាពលម្អៀងរវាងនាឡិកាមេ និងនាឡិកាចែកបាយតាមបន្ទប់ជួល រួមទាំងការបាត់បង់ទឹក ឬលេចធ្លាយតាមបណ្តាញ តំណភ្ជាប់ក្នុងបរិវេណផ្ទះជួល ហើយថ្លៃលក់នេះក៏ទទួលបានការព្រមព្រៀងគ្នារវាងអ្នកជួលនឹងម្ចាស់ផ្ទះផងដែរ»។
ប៉ុន្តែដើម្បីឲ្យដំណើរការរបស់រដ្ឋាភិបាលសម្រេចបានជោគជ័យក្នុងការធានាដល់ការជួយដល់កម្មករ និងនិស្សិត រដ្ឋាករទឹកស្វយ័ត នឹងអនុវត្តវិធានការមួយចំនួន ដើម្បីពង្រឹងបន្ថែមនូវការអនុវត្តកិច្ចសន្យាទាំងនេះ ដោយចាត់វិធានការឲ្យបានតឹងរ៉ឹងចំពោះម្ចាស់បន្ទប់ជួលដែលលក់ទឹកបន្តរួមទាំងពិនិត្យនិងកែលម្អកិច្ចសន្យាលក់ទឹកបន្តឲ្យមានលក្ខណៈកាន់តែប្រសើរ ដើម្បីធានាបាននូវប្រសិទ្ធភាពក្នុងការអនុវត្ត។
រដ្ឋាករទឹកស្វយ័ត នឹងសហការជាមួយអាជ្ញាធរមូលដ្ឋាន ក្នុងការចុះអង្កត និងស្វែងរកអ្នកលក់ទឹកបន្តដែលមិនគោរពតាមកិច្ចសន្យា ដើម្បីផ្តល់នូវការណែនាំ និងធ្វើការកែតម្រូវឲ្យស្របទៅនឹងកិច្ចសន្យាលក់ទឹកបន្តផងដែរ។
រដ្ឋាករទឹកស្វយ័តប្រកាសថា «រដ្ឋាករទឹកស្វយ័តក្រុងភ្នំពេញស្វាគមន៍ជានិច្ចចំពោះមតិយោបល់ ឬព័ត៌មានជាក់លាក់ទាំងឡាយណាដែលផ្ដល់ជូនរដ្ឋាករទឹកស្វយ័តក្រុងភ្នំពេញ អំពីបាតុភាពមិនប្រក្រតីណាមួយដែលកើតឡើង ពាក់ព័ន្ធនឹងការអនុវត្តគោលការណ៍កំណត់ថ្លៃទឹកស្អាត ដែលត្រូវលក់ជូនបងប្អូនកម្មករ កម្មកាវិនី និងសិស្សនិស្សិត ឬបញ្ហាណាផ្សេងទៀតដែលទាក់ទងនឹងការផ្គត់ផ្គង់ទឹកស្អាតដល់សាធារណជន»។
លោក ម៉ាន់ សាបាន ប្រធានមជ្ឈមណ្ឌលព័ត៌មានកម្មករ បានលើកឡើងថា នេះគឺជាយន្តការមួយដែលរដ្ឋាករទឹកស្វយ័តភ្នំពេញ បានឆ្លើយតបយ៉ាងឆាប់រហ័សក្នុងការចាត់វិធានការចំពោះម្ចាស់បន្ទប់ជួល ដែលបានកេងចំណេញពីកម្មករ និងសិស្សនិស្សិត។
ប៉ុន្តែលោកថ្លែងថា៖ «ប្រសិនបើមានគណៈកម្មការ ឬក្រុមស៊ើបអង្កេតនូវការអនុវត្តរបស់រដ្ឋាករទឹកស្វយ័តភ្នំពេញគឺរឹតតែមានប្រសិទ្ធភាពជាងនេះទៀត ព្រោះថា បើមិនមានក្រុមអធិការកិច្ច ឬក្រុមស្រាវជ្រាវចុះអនុវត្ត គឺនៅតែមានការចន្លោះប្រហោង ហើយពួកគាត់នៅតែប្រព្រឹត្តដដែល»។
ស្រដៀងគ្នានេះ លោក អាត់ ធន់ ប្រធានសហភាពការងារកម្ពុជា បានលើកឡើងដែរថា ដើម្បីជួយឲ្យស្ថានភាពជីវភាពរបស់កម្មករ និងពលរដ្ឋបានល្អប្រសើរជាងនេះ ការបញ្ចុះតម្លៃទឹក គឺជារឿងមួយដែលល្អ។ លោកចង់ឃើញថា តម្លៃទឹកភ្លើង និងម្ហូបអាហារលើទីផ្សារ គឺមានចុះថ្លៃបន្ថែមទៀត ព្រោះតាមស្ថានភាពជាក់ស្តែង តម្លៃចាយវាយទាំងនេះ គឺនៅតែខ្ពស់ បើប្រៀបធៀបនឹងប្រទេសជិតខាង។
លោកបានរៀបរាប់ថា៖«អ្វីៗក៏ថ្លៃដែរនៅក្នុងស្រុកខ្មែរ ដែលនៅស្រុកគេ ភ្លើង ១ គីឡូ ២ រយរៀល ហើយទឹកគេសឹងតែចែកឱ្យប្រើមិនគិតថ្លៃ។ តែយើងវិញ គ្រាន់តែថ្លៃដើមវិញ ៧ ទៅ ៨ រយរៀលបាត់ហើយ ហើយអ្នកបង្កើនតម្លៃ គឺជារឿងមួយ គ្រាន់តែបញ្ហាត្រង់ថា តម្លៃដើមនោះ គឺវាថ្លៃបាត់ទៅហើយសម្រាប់ពលរដ្ឋយើង។ អ៊ីចឹងវាគួរតែចុះជាងហ្នឹង បានល្អ»។
តាមការបញ្ជាក់របស់រដ្ឋាករទឹកស្វយ័ត ក្នុងអំឡុងពេលបិទខ្ទប់កន្លងមក រដ្ឋាករទឹកស្វយ័តក្រុងភ្នំពេញក៏បានចូលរួម សម្រាលបន្ទុករបស់កម្មករ កម្មការិធី និងសិស្សនិស្សិតប្រមាណ ១៦ ២០០ នាក់ ដោយជួយបង់ថ្លៃប្រើប្រាស់ទឹកស្អាតរយៈពេល ៣ ខែ ស្មើនឹងទឹកប្រាក់ចំនួន ៦៣២ ៩៣២ ៧០០ រៀល ដល់មូលដ្ឋានផ្ទះជួលប្រមាណ ៩៥៨ ទីតាំង ដែលកម្មករ កម្មការិនី និងសិស្សនិស្សិតទាំងនោះកំពុងស្នាក់នៅ ស្ថិតក្នុងតំបន់ក្រហមនៃរាជធានីភ្នំពេញ និងក្រុងតាខ្មៅ៕
វីដេអូ៖
