.jpg)
ភាគីទីភ្នាក់ងារ KOICA ក្នុងពិធីចុះហត្ថលេខាពីចម្ងាញនៅថ្ងៃទី ១៤ តុលា។ រូបថត សហការី
ភ្នំពេញៈ ទីភ្នាក់ងារសហប្រតិបត្តិការអន្តរជាតិកូរ៉េ (KOICA) បានផ្តល់ជំនួយឥតសំណងជិត ៧ លានដុល្លារអាមេរិក ដល់សាកលវិទ្យាល័យភូមិន្ទភ្នំពេញ ដើម្បីកសាងសមត្ថភាពវិស្វកម្មបរិស្ថាន និងពង្រឹងធនធានមនុស្សកម្រិតថ្នាក់ឧត្តមសិក្សានៅកម្ពុជា។
សេចក្តីប្រកាសព័ត៌មាន (KOICA) បានឱ្យដឹងថា ពិធីចុះហត្ថលេខាលើកិច្ចព្រមព្រៀងផ្តល់ហិរញ្ញប្បទានឥតសំណងចំនួន ៦,៩ លានដុល្លារ របស់គម្រោងអភិវឌ្ឍន៍វិស្វកម្មបរិស្ថាននៅសាកលវិទ្យាល័យភូមិន្ទភ្នំពេញ ត្រូវបានធ្វើឡើងពីចម្ងាយ នៅថ្ងៃទី ១៤ តុលា ឆ្នាំ ២០២១ រវាងលោក Rho Hyunjun ប្រធានតំណាងទីភ្នាក់ងារសហប្រតិបត្តិការអន្តរជាតិកូរ៉េ និងរដ្ឋមន្រ្តីក្រសួងអប់រំ យុវជន និងកីឡាលោក ហង់ជួន ណារ៉ុន។
លោក Rho Hyunjun បានបង្ហាញការរំពឹងទុកថា គម្រោងនេះ គឺជាផ្នែកមួយជួយគាំទ្រដល់រដ្ឋាភិបាលកម្ពុជា ក្នុងការបំពេញនូវធនធានមនុស្សផ្នែកវិស្វកម្មដើម្បីឆ្លើយតបទៅនឹងតម្រូវការទីផ្សារការងារ។ លើសពីនេះ សម្រាប់ឆ្នាំ ២០២១ (KOICA) មានព្រឹត្តិការណ៍សំខាន់ៗជាមួយក្រសួងអប់រំ ចំនួន ៣ លើករួចមកហើយ។
លោកបន្តថា លើកទី១ គឺកម្មវិធីចុះហត្ថលេខាលើកិច្ចព្រមព្រៀងផ្តល់ហិរញ្ញប្បទានលើគម្រោងការកសាងសមត្ថភាព ICT សម្រាប់ការអប់រំនៅមធ្យមសិក្សា។ លើកទី២ កាលពីថ្ងៃទី ២ ខែ កញ្ញា ឆ្នាំ ២០២១ (KOICA )បានធ្វើពិធីបញ្ចុះបឋមសីលាសាងសង់មជ្ឈមណ្ឌលជាតិធុរកិច្ចថ្មីនៅកម្ពុជា។
លោកបានបន្តថា៖«លើកទី៣ នាថ្ងៃនេះ យើងបានចុះហត្ថលេខាគាំទ្រដល់គម្រោងអភិវឌ្ឍន៍វិស្វកម្មបរិស្ថាននៅសាកលវិទ្យាល័យភូមិន្ទភ្នំពេញដើម្បីពង្រឹងធនធានមនុស្សកម្រិតថ្នាក់ឧត្តមសិក្សានៅកម្ពុជា»។
លោក ហង់ជួន ណារ៉ុន បានថ្លែងអំណរគុណចំពោះកយកា (KOICA) ដែលបានបន្តគាំទ្រវិស័យអប់រំនៅប្រទេសកម្ពុជា។ លោកជឿជាក់ថា ជំនួយនេះនឹងក្លាយជាចំណុចចាប់ផ្តើមថ្មីមួយទៀតដើម្បីចូលរួមចំណែកក្នុងការអភិវឌ្ឍប្រទេសកម្ពុជា។
បើតាមសេចក្តីប្រកាសព័ត៌មានរបស់ (KOICA) តាមរយៈគម្រោងនេះទី១ នឹងគាំទ្របង្កើតកម្មវិធីថ្នាក់បរិញ្ញាបត្រ និងអនុបណ្ឌិតផ្នែកវិស្វកម្មបរិស្ថាន ទី២ ពង្រឹងសមត្ថភាពដល់សាស្រ្តាចារ្យចាប់ពីថ្នាក់បរិញ្ញាបត្រជាន់ខ្ពស់ និងបណ្ឌិតនៅប្រទេសកូរ៉េ ទី៣ ពង្រឹងសមត្ថភាពបង្រៀន និងស្រាវជ្រាវដល់សាស្រ្តាចារ្យ និងនិស្សិត និងទី៤ ធ្វើឱ្យប្រសើរឡើងនូវការគាំទ្រហេដ្ឋារចនាសម្ព័ន្ធរបស់មហាវិទ្យាល័យ រួមទាំងគាំទ្រការបង្កើតថ្នាក់រៀនវៃឆ្លាត៕
