.jpg)
មន្ត្រីខេត្តពេលចែកអំណោយដល់ជនរងគ្រោះដោយទឹកជំនន់នៅស្រុកមង្គលបុរី ថ្មីៗនេះ។ រូបថត រដ្ឋបាលខេត្ត
បន្ទាយមានជ័យៈ គិតត្រឹមថ្ងៃទី ១៤ ខែតុលា ប្រជាពលរដ្ឋដែលបានមកស្នាក់នៅលើទីទួលសុវត្ថិភាពក្នុងគ្រាមានគ្រោះទឹកជំនន់ កាលពីពាក់កណ្ដាលខែកញ្ញា បាននាំគ្នាវិលត្រឡប់ទៅកាន់លំនៅឋានរបស់ពួកគេវិញ អស់ប្រមាណ ៦០ ភាគរយហើយ បន្ទាប់ពីទឹកបានស្រកចុះមករកសភាពដើមស្ទើរតែគ្រប់ក្រុង-ស្រុក។
លោក ឈុន ប៊ុនថា ប្រធានការិយាល័យអន្តរវិស័យនៃរដ្ឋបាលខេត្តបន្ទាយមានជ័យ ប្រាប់ ភ្នំពេញ ប៉ុស្តិ៍ នៅថ្ងៃទី ១៤ តុលាថា ប្រជាពលរដ្ឋប្រមាណជាង ៦០០ គ្រួសារ ក្នុងចំណោមជិត ១២០០គ្រួសារ ដែលបានជម្លៀសមកស្នាក់នៅលើទីទួលសុវត្ថិភាព ក្នុងពេលមានគ្រោះទឹកជំនន់កាលពីអំឡុងពាក់កណ្ដាលខែកញ្ញាកន្លងទៅ បាននាំគ្នាវិលត្រឡប់ទៅកាន់លំនៅឋានរបស់ពួកគេវិញហើយ។
លោកបញ្ជាក់ថា៖ «នៅពេលនេះស្ថានភាពទឹកជំនន់ បានធូរស្រាលច្រើនហើយ ពិសេសក្រុង-ស្រុក ដែលនៅជាប់ព្រំដែនថៃ ដូចជាក្រុងប៉ោយប៉ែត ស្រុកម៉ាឡៃ ទឹកបានស្រកចុះមកស្ថានភាពដូចដើមវិញ»។
បើតាមលោក ប៊ុនថា នៅក្នុងអំឡុងពេលនេះ អាជ្ញាធរនៅតែបន្តពង្រឹងយន្តការបង្ការទប់ស្កាត់ និងគ្រប់គ្រងគ្រោះមហន្តរាយនៃទឹកជំនន់នេះ តាមរយៈការចុះត្រួតពិនិត្យ និងតាមដានជាប្រចាំអំពីស្ថានភាពទឹកជំនន់នៅតាមមូលដ្ឋាន ពិសេសក្នុងតំបន់ទីទំនាប ជាប់មាត់ទឹកដែលតែងតែប្រឈមការជន់លិន នៅពេលមានភ្លៀងធ្លាក់ខ្លាំងច្រើនថ្ងៃជាប់គ្នា។
អ្នកស្រី វ័ន លួម អាយុ ៥៩ ឆ្នាំ មកពីភូមិព្រែកជីក ឃុំបត់ត្រង់ ស្រុកមង្គលបុរី ប្រាប់ ភ្នំពេញ ប៉ុស្តិ៍ថា អ្នកស្រីក៏ចង់វិលត្រឡប់ទៅកាន់លំនៅឋានវិញដែរ ប៉ុន្តែទឹកនៅលិចត្រឹមចង្កេះនៅឡើយ។ អ្នកស្រីបារម្ភពីចៅតូចៗ ដែលមានអាយុក្រោម ៥ ឆ្នាំ ខណៈផ្លូវទៅភូមិរបស់អ្នកស្រី នៅលិចទឹកពិបាកធ្វើដំណើរទើបអ្នកស្រីសម្រេចរស់នៅលើទីតាំងទួលសុវត្ថិភាពជាបន្តទៀត ដើម្បីរង់ចាំឲ្យទឹកស្រកអស់ជាមុនសិន។
អ្នកស្រីថ្លែងថា៖ «កាលពី៣ថ្ងៃមុន ខ្ញុំបានទៅពិនិត្យស្ថានភាពទឹកនៅក្នុងភូមិរបស់ខ្ញុំ ហើយឃើញថា កន្លែងខ្លះទឹកនៅលិចត្រឹមស្មងជើង កន្លែងខ្លះលិចត្រឹមក្បាលជង្គង់។ ចំណែកនៅម្ដុំផ្ទះរបស់ខ្ញុំ ទឹកនៅលិចត្រឹមចង្កេះនៅឡើយ ហេតុនេះទើបខ្ញុំនិងកូនចៅមិនទាន់សម្រេចចិត្ត វិលត្រឡប់ទៅផ្ទះវិញ ព្រោះចៅវានៅតូចៗពេក»។
អ្នកស្រីបានប្រាប់ឲ្យដឹងទៀតថា ការរស់នៅទីទួលសុវត្ថិភាព ក្នុងរយៈពេលជិត ១ ខែនេះ អាជ្ញាធរបានយកចិត្តទុកដាក់ការពារសុវត្ថិភាព និងផ្ដល់ជំនួយសង្គ្រោះបឋម ដែលរួមមាន អង្ករ គ្រឿងបរិភោគ និងឧបភោគចំនួន ២ លើក ព្រមទាំងផ្ដល់ថ្នាំសង្កូវសម្រាប់ព្យាបាលជំងឺក្ដៅខ្លួន ផ្ដាសាយ និងជំងឺក្អក។
លោក ឃុន សុខា អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានថ្លែងថា ក្នុងចំណោមខេត្តដែលនៅជាប់ព្រំដែនថៃ ខេត្តបន្ទាយមានជ័យ បានរងការជន់លិចដោយគ្រោះជំនន់ទឹកភ្លៀងធ្ងន់ធ្ងរជាងគេ នៅក្នុងឆ្នាំ ២០២១ នេះ។
លោកថ្លែងថា៖ «ទោះជាបែបណា គ្រោះទឹកជំនន់នៅក្នុងឆ្នាំនេះ មិនមានផលប៉ះពាល់ធ្ងន់ធ្ងរដូចជាឆ្នាំមុននោះទេ បើធៀបក្នុងរយៈពេលដូចគ្នានេះ»។
បើតាមលោក សុខា ប្រសិនបើគ្មានជំនន់ទឹកទន្លេមេគង្គ និងទឹកជំនន់ពីប្រទេសថៃ ហូរធ្លាក់តាមប្រព័ន្ធដៃអូរ និងប្រឡាយធម្មជាតិ តាមជួរព្រំដែនកម្ពុជាទេនោះ កម្ពុជានឹងអាចចាប់ផ្ដើមអនុវត្តផែនការជួសជុល និងស្ដារឡើងវិញនូវវិស័យហេដ្ឋារចនាសម្ព័ន្ធផ្លូវថ្នល់និងវិស័យកសិកម្មដែលបានរងផលប៉ះពាល់ដោយគ្រោះទឹកជំនន់នាបំណាច់ខែតុលាខាងមុខនេះ ព្រោះកម្ពុជាបានត្រៀមរួចជាស្រេចនូវ ធនធាន មធ្យោបាយ និងគ្រាប់ពូជ សម្រាប់ការស្ដារឡើងវិញក្រោយគ្រោះទឹកជំនន់។
ទន្ទឹមនឹងនេះ លោក គន់ គឹម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ ក៏បានលើកឡើងផងដែរថា ដើម្បីបង្កាទប់ស្កាត់ និងកាត់បន្ថយគ្រោះថ្នាក់ផ្សេងៗដែលបង្កឡើងដោយគ្រោះមហន្តរាយពីធម្មជាតិ និងគ្រោះមហន្តរាយដែលបង្កឡើងពីសកម្មភាពមនុស្សគឺទាមទារឲ្យមានការចូលរួមពីគ្រប់ភាគីពាក់ព័ន្ធទាំងអស់ ដោយឈរលើស្មារតីសាមគ្គីភាព ទាំងក្នុងក្របខ័ណ្ឌជាតិ និងអន្តរជាតិ ប្រកបដោយការទទួលខុសត្រូវខ្ពស់៕
