.jpg)
បុណ្យកឋិនទានដែលត្រូវបានដង្ហែនៅវត្ត ១ នៅឃុំរកាកោង ស្រុកមុខកំពូល ខេត្តកណ្តាល កាលពីឆ្នាំ ២០១៩។ ហេង ជីវ័ន
ភ្នំពេញៈ រដ្ឋមន្រ្តីក្រសួងធម្មការនិងសាសនា លោក ឈិត សុខុន មិនអនុញ្ញាតឱ្យមានការផ្សព្វផ្សាយកម្មវិធីបុណ្យ ដង្ហែតាមដងផ្លូវ ឬជុំវិញព្រះវិហារ ក្នុងបុណ្យកឋិនទាន ដែលនឹងប្រព្រឹត្តទៅចាប់ពីថ្ងៃទី ២២ ខែតុលា ដល់ថ្ងៃទី ១៩ ខែវិច្ឆិកា ឆ្នាំ ២០២១ ខាងមុខនេះ គឺគ្រាន់តែវេរប្រគេនត្រៃចីវរ ជាកិច្ចសម្រេចបុណ្យតែប៉ុណ្ណោះ។
លោក ឈិត សុខុន បានចេញសេចក្តីណែនាំមួយ នាថ្ងៃទី ១៤ ខែតុលា ពីការៀបចំនូវពិធីបុណ្យកឋិនទាន ស្របតាមទំនៀមទម្លាប់ប្រពៃណីព្រះពុទ្ធសាសនា។ ប៉ុន្តែត្រូវចូលរួមបដិបត្តិតាមសេចក្តីណែនាំនានារបស់រាជរដ្ឋាភិបាល ក្រសួងសុខាភិបាល និងអាជ្ញាធរដែនដី តាមសភាពជាក់ស្តែងនៃទីកន្លែងនីមួយៗ ក្នុងការអនុវត្តវិធានការចាំបាច់នានា សំដៅកាត់ផ្តាច់ និងទប់ស្កាត់ការឆ្លងរីករាលដាលនៃជំងឺកូវីដ ១៩ នៅទូទាំងប្រទេស។
បុណ្យកឋិនទាន ជាកាលទានមួយដ៏ថ្លៃថ្លាក្នុងព្រះពុទ្ធសាសនា មានផលានិសង្សខ្ពស់ ទាំងទាយក ទាយិកា និងបដិគ្គាហក ជាទីជ្រះថ្លារបស់ពុទ្ធបរិស័ទខ្មែរ តែងតែប្រារព្ធធ្វើឡើង រៀងរាល់ឆ្នាំ មានរយ:ពេលកំណត់តែ ២៩ ថ្ងៃ ដោយវត្តនីមួយៗទទួលអង្គកឋិនបានតែ ១ លើកប៉ុណ្ណោះ។
លោករដ្ឋមន្រ្តីបានធ្វើការណែនាំទៅដល់ប្រជាពលរដ្ឋទាំងអស់ត្រូវយកចិត្តទុកដាក់បង្កលក្ខណៈឱ្យបានល្អប្រសើរ ប្រគេនព្រះសង្ឃ ជូនពុទ្ធបរិស័ទ ប្រារព្ធពិធីបុណ្យ កឋិនទានស្របតាមប្រពៃណីព្រះពុទ្ធសាសនា ដោយត្រូវអនុវត្តឱ្យបានយ៉ាងម៉ឺងម៉ាត់នូវវិធានការការពារនានារបស់ក្រសួងសុខាភិបាល និងវិធានការ ៣ ការពារ ៣ កុំ។
លោកឈិត សុខុន លើកឡើងថា៖ «ហាមផ្សព្វផ្សាយកម្មវិធីបុណ្យ ដង្ហែតាមដងផ្លូវ ឬជុំវិញព្រះវិហារ ដោយគ្រាន់តែវេរប្រគេនត្រៃចីវរ ជាកិច្ចសម្រេចបុណ្យ។ សូមសម្តេចព្រះសង្ឃនាយកទាំង ២គណៈ និងប្រធានមន្ទីរធម្មការ និងសាសនារាជធានី-ខេត្ត សហការជាមួយអាជ្ញាធរពាក់ព័ន្ធទាំងអស់អនុវត្តសេចក្តីណែនាំនេះ ឱ្យបានសម្រេច លទ្ធផលល្អប្រសើរ»៕
វីដេអូ៖
