.jpg)
ទិដ្ឋភាពប្រាសាទព្រហ្មកិលដែលមានមុខងារជាមន្ទីរពេទ្យក្នុងរាជព្រះបាទជ័យវរ្ម័នទី៧។ អាជ្ញាធរជាតិអប្សរា នឹងធ្វើការជួសជុលប្រាសាទនេះ នាពេលឆាប់ៗនេះ។ រូបថត អាជ្ញាធរជាតិអប្សរា
សៀមរាបៈ អាជ្ញាធរជាតិអប្សរានឹងធ្វើការជួសជុលប្រាសាទព្រហ្មកិល ដែលមានមុខងារជាមន្ទីរពេទ្យក្នុងរាជ្យព្រះបាទជ័យវរ្ម័ន ទី៧ នាពេលឆាប់ៗនេះ ព្រមទាំងចាប់ផ្ដើមដំណើរការសាងសង់ស្ពានថ្មីនៅរមណីយដ្ឋានក្បាលស្ពាននៅតំបន់អង្គរដើម្បីរក្សាតម្លៃវប្បធម៌ និងទាក់ទាញភ្ញៀវទេសចរ។
លោក ស៊ឹម ថន អនុប្រធាននាយកដ្ឋានអភិរក្សប្រាសាទក្នុងឧទ្យាន និងបុរាណវិទ្យាបង្ការឱ្យដឹង ថាប្រាសាទព្រហ្មកិលមានមុខងារជាមន្ទីរពេទ្យក្នុងរាជព្រះបាទជ័យវរ្ម័នទី៧ គឺជាប្រាសាទតូច ១ ដែល មានទីតាំងនៅខាងលិចឆៀង ខាងជើងប្រាសាទអង្គរវត្ត។ បច្ចុប្បន្ន ប្រាសាទដ៏ចំណាស់នេះមានភាពទ្រុឌទ្រោម ទើបមន្ត្រីសម្រេចជួសជុល បន្ទាប់ពីបានការអនុញ្ញាតពីថ្នាក់ដឹកនាំអាជ្ញាធរជាតិអប្សរា និងគណៈកម្មាធិការអន្តរជាតិ ICC-Angkor។
លោកថ្លែងថា៖ «ដោយពិនិត្យឃើញប្រាសាទព្រហ្មកិល រងការខូចខាតទ្រុឌទ្រោមខ្លាំង ថ្មធ្លាក់រាយប៉ាយ និងតួប៉មកណ្តាល បានបាក់រលួសអស់មួយចំហៀងទៅហើយ ទើបក្រុមការងារធ្វើការជួសជុល»។
លោកបន្តថា ក្នុងដំណើរការជួសជុលនេះនឹងគ្រោងប្រើពេល ១ ឆ្នាំដោយបែងចែកការជួសជុលជា ៣ ដំណាក់កាល រួមមានដំណាក់កាលទី១ ការរៀបចំ ឯកសារធ្វើកំណាយសិក្សាពីរចនាសម្ព័ន្ធរបស់ប្រាសាទ បែងចែកលេខរៀង និងផ្គុំថ្ម។ ទី២ ចាប់ផ្តើម រៀបផ្គុំថ្មសាកល្បង និងរៀបចំពង្រឹងគ្រឹះ និងដំណាក់កាលទី៣ គឺរៀបចំថ្មទាំងអស់ដែលបានរកឃើញដាក់ចូលទីតាំងដើមវិញ។
ក្រុមការងារអភិរក្ស ប្រាសាទក្រៅឧទ្យានអង្គរនៃអាជ្ញាធរជាតិអប្សរា ក៏ចាប់ផ្ដើមការសាងសង់ ស្ពានថ្មីជំនួសស្ពានចាស់នៅតំបន់រមណីយដ្ឋានក្បាលស្ពាន។
បើតាមលោក ពុទ្ធ សុទ្ធ មន្ត្រីនាយកដ្ឋានប្រាសាទក្រៅឧទ្យានអង្គរនៃអាជ្ញាធរជាតិអប្សរា ការសាងសង់ស្ពានថ្មីនេះ មានទទឹងប្រហែង ២,៤ ម៉ែត្រ បណ្ដោយប្រវែង ១២ ម៉ែត្រ ធ្វើពីបេតុងក្រាលក្តារ។ ការសាងសង់ប្រើពេលប្រមាណ ៣ ខែ គិតពីថ្ងៃទី ១៣ តុលា គ្រោងបញ្ចប់នៅខែធ្នូ ឆ្នាំ ២០២១៕
