ភ្នំពេញៈ មន្ត្រីជាន់ខ្ពស់ក្រសួងយុត្តិធម៌ច្រានចោលរបាយការណ៍របស់អង្គការគម្រោងយុត្តិធម៌ពិភពលោក (WJP) ដែលបានចាត់ចំណាត់ថ្នាក់នីតិរដ្ឋនៅកម្ពុជាស្ថិតនៅលំដាប់ស្ទើរតែទាបជាងគេគឺលេខរៀង ១៣៨ ក្នុងចំណោមប្រទេសទាំង ១៣៩ ក្នុងអំឡុងពេលការរាតត្បាតជំងឺកូវីដ ១៩។
របាយការណ៍ស្តីពីសន្ទស្សន៍នីតិរដ្ឋប្រចាំឆ្នាំ ២០២១ ដែលវាយតម្លៃនីតិរដ្ឋនៅប្រទេសចំនួន ១៣៩ ដែលភ្នំពេញប៉ុស្តិ៍បានទទួលកាលពីថ្ងៃទី ១៣ ខែតុលា លើកឡើងថា នៅក្នុងអំឡុងពេលមានជំងឺរាតត្បាតកូវីដ ១៩ នីតិរដ្ឋកាន់តែយ៉ាប់យ៉ឺននៅជាងពាក់កណ្តាលពិភពលោក។ ៤,៧ ភាគរយនៃប្រជាជនក្នុងពិភពលោកគឺ ៦,៥ ពាន់លាននាក់រស់នៅក្នុងប្រទេសដែលមាននីតិរដ្ឋ កំពុងចុះខ្សោយ។
របាយការណ៍បញ្ជាក់ថា ក្នុងចំណោមប្រទេសទាំង ១៣៩ ប្រទេស ៣ ដែលអនុវត្តនីតិរដ្ឋបានល្អជាងគេនៅឆ្នាំនេះគឺ ប្រទេសដាណឺម៉ាកស្ថិតក្នុងលេខរៀងទី ១ ន័រវែសលេខរៀងទី ២ និងហ្វាំងឡង់លេខរៀងទី ៣។ ប្រទេស ៣ ដែលមានពិន្ទុនីតិរដ្ឋរួមទាបជាងគេគឺប្រទេស វ៉េណេស៊ុយអេឡាស្ថិតក្នុងលេខរៀង ១៣៩ គឺចុងក្រោយគេ ខណៈដែលកម្ពុជាលេខរៀង ១៣៨ និងកុងហ្គោលេខរៀង ១៣៧។
លោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌ប្រាប់ភ្នំពេញប៉ុស្តិ៍កាលពីថ្ងៃទី ១៣ ខែតុលា ថា ការចាត់ចំណាត់ថ្នាក់នេះ «ដូចជា» មិនស្របទៅនឹងស្ថានភាពជាក់ស្តែងនៅកម្ពុជា និងបរិបទអន្តរជាតិនោះទេ។ បណ្តាប្រទេសដទៃទៀតមួយចំនួនដែលធ្លាប់រិះគន់កម្ពុជាពាក់ព័ន្ធការអនុវត្តវិធានការច្បាប់នៃជំងឺកូវីដ ១៩ នៅទីបញ្ចប់ប្រទេសទាំងនោះបានអនុវត្តវិធានការទាំងអស់នោះនៅក្នុងប្រទេសខ្លួនទាំងអស់ដោយអនុវត្តតឹងរ៉ឹង និងធ្ងន់ធ្ងរជាងកម្ពុជាទៅទៀត ដូចជាការបិទខ្ទប់ប្រទេស និងតំបន់ និងការចាក់វ៉ាក់សាំងកាតព្វកិច្ចបង្ការជំងឺកូវីដ ១៩ ជាដើម។ល។
លោកថ្លែងថា៖ «អ៊ីចឹងការវាយតម្លៃថា កម្ពុជាទាបជាងប្រទេសទាំងអស់នោះដូចជា មិនសមហេតុសមផល។ ការធ្វើរបាយការណ៍ស្រាវជ្រាវហ្នឹងអាចថា មានការទទួលព័ត៌មាន ឬក៏ទិន្នន័យខុសពីភាគីម្ខាងអាចពីក្រុមសង្គមស៊ីវិលឬក៏ក្រុមដែលមាននិន្នាការប្រឆាំងដែលផ្តល់ព័ត៌មានហ្នឹងខុសនាំឱ្យការប្រើប្រាស់វិធីសាស្ត្រ និងការបញ្ចេញលទ្ធផលក៏វាខុសតាមហ្នឹងដែរ»។
សន្ទស្សន៍នីតិរដ្ឋរបស់ WJP គឺជារបាយការណ៍ដោយមានទិន្នន័យ ប្រចាំឆ្នាំដោយផ្អែកលើការស្ទង់មតិថ្នាក់ជាតិលើគ្រួសារជាង ១៣៨ ០០០ គ្រួសារ និងអ្នកអនុវត្តច្បាប់ និងអ្នកជំនាញចំនួន ៤ ២០០ នាក់នៅជុំវិញពិភពលោក។
WJP ឱ្យនិយមន័យនីតិរដ្ឋថាគឺជាប្រព័ន្ធច្បាប់ ស្ថាប័នបទដ្ឋាន និងការប្តេជ្ញាចិត្តរបស់សហគមន៍ដែលរឹងមាំដែលផ្តល់នូវគណនេយ្យភាព ច្បាប់មានយុត្តិធម៌ ការបើកចំហរបស់រដ្ឋាភិបាល និងការទទួលបានយុត្តិធម៌។
លោក ស៊ឹង សែនករុណា អ្នកនាំពាក្យសមាគមអាដហុកប្រាប់ភ្នំពេញប៉ុស្តិ៍កាលពីថ្ងៃទី ១៣ ខែតុលា ថា វាមិនមានអ្វីចម្លែកនោះទេ ព្រោះអង្គការនេះបានធ្វើការលើការវាយតម្លៃបែបនេះជាបន្តបន្ទាប់កន្លងមក។ ការអនុវត្តច្បាប់ ឬនីតិរដ្ឋនៅក្នុងបរិបទកម្ពុជាកំពុងរងការរិះគន់ជាច្រើន ជាពិសេសពាក់ព័ន្ធការអនុវត្តរឿងយុត្តិធម៌សង្គមពាក់ព័ន្ធប្រជាពលរដ្ឋក្រីក្រ នយោបាយ ការបញ្ចេញមតិរបស់អ្នកធ្វើកិច្ចការងារសង្គម និងសកម្មជនសិទ្ធិមនុស្សជាដើម។
លោកបានថ្លែងថា៖ «អ៊ីចឹងទៅ ទាំងអស់នេះប្រហែលជាគេមានការវាស់វែងដោយមានទឡ្ហីករណ៍តាមដែលគេកំណត់មកហ្នឹងយកមកធ្វើការវាយតម្លៃ។
អ៊ីចឹង ខ្ញុំយល់ថា ការលើកឡើងនេះនៅក្នុងប្រទេសកម្ពុជាយើងគឺជារឿងដែលឆ្លុះបញ្ចាំងកំពុងតែរងការរិះគន់ទាំងអស់នេះហើយ»។
កាលពីឆ្នាំ ២០២០ អង្គការនេះបានចាត់ចំណាត់ថ្នាក់នីតិរដ្ឋនៅកម្ពុជានៅលេខរៀងទី ១២៧ ដែលជាចំណាត់ថ្នាក់ស្ទើរតែទាបជាងគេក្នុងចំណោមប្រទេសចំនួន ១២៨៕