ថ្ងៃនេះជាថ្ងៃគម្រប់ខួប ៩ ឆ្នាំ ដែលសម្តេចឪ, សម្តេចតា, សម្តេចតាទួត ព្រះបិតាឯករាជ្យជាតិខ្មែរ ព្រះបាទសម្តេចព្រះនរោត្ដម សីហនុ ព្រះអង្គបានសោយទិវង្គតនៅទីក្រុងប៉េកាំងប្រទេសចិន។ នេះជាការលើកឡើងរបស់លោកនាយករដ្ឋមន្ត្រី ហ៊ុន សែន នាថ្ងៃទី ១៥ ខែតុលា ឆ្នាំ ២០២១នេះ។
លោកបានបន្ថែមថា៖ «នៅថ្ងៃនេះ ប្រជារាស្ត្រទូទាំងប្រទេសព្រមទាំងមន្ត្រីរាជការ កងកម្លាំងប្រដាប់អាវុធគ្រប់ជាន់ថ្នាក់ សូមសម្តែងនូវការគោរពដឹងគុណដ៏ខ្ពង់ខ្ពស់បំផុតថ្វាយចំពោះ ព្រះបរមរតនកោដ្ឋ ដែលព្រះអង្គបានលះបង់ និងបូជាព្រះកាយពលដ៏ធំធេងបំផុតចំពោះជាតិមាតុភូមិកម្ពុជា»។
លោកនាយករដ្ឋមន្ត្រីបានបន្តថា កូនចៅប្រជារាស្ត្រទូទាំងប្រទេស និងមន្ត្រីរាជការ សូមថ្វាយព្រះរាជកុសលព្រះវិញ្ញាណក្ខន្ឋព្រះបរមសព ព្រះករុណា ព្រះបាទសម្តេចព្រះ នរោត្តម សីហនុ សូមស្តេចយាងបដិសន្ឋិក្នុងព្រះបរមសុគតិភពកុំបីឃ្លាងឃ្លាតឡើយ។
នៅក្នុងថ្ងៃនេះដែរ មន្ត្រីរាជការពីបណ្តាក្រសួង ស្ថាប័ននានាបានចូលរួមគោរពព្រះវិញ្ញាណក្ខន្ធ ព្រះបរមរតនកោដ្ឋ ក្នុងគម្រប់ខួប ៩ ឆ្នាំនៃការសោយព្រះទិវង្គតរបស់ព្រះអង្គនៅព្រះស្តូបនៃព្រះបរមរូប។
នៅក្នុងថ្ងៃគម្រប់ខួប ៩ ឆ្នាំនៃការសោយទិវង្គតរបស់ព្រះបាទសម្តេចព្រះ នរោត្ដម សីហនុ នេះដែរ អភិបាលខេត្តកែបលោក សោម ពិសិដ្ឋ ក៏បានណែនាំដល់គ្រប់មន្ទីរ អង្គភាព រដ្ឋបាលក្រុង ស្រុក ឃុំ សង្កាត់ ក្រុមហ៊ុន រោងចក្រ សហគ្រាស គ្រឹះស្ថានសាធារណៈ និងគ្រប់សាលារៀន ត្រូវរៀបចំតាំងព្រះបរមឆាយាល័ក្ខណ៍ព្រះករុណា ព្រះបរមរតនកោដ្ឋ ដោយមានតុបតែងលម្អ ភ្លើងពណ៌ ចងទង់ជាតិ ទង់សាសនា ទង់ព្រះមហាក្សត្រ បដាពាក្យស្លោកនៅក្នុងបរិវេណមន្ទីរ អង្គភាពរបស់ខ្លួន។
លោកបានលើកឡើងថា៖ «រដ្ឋបាលក្រុង ស្រុក ត្រូវណែនាំ ផ្សព្វផ្សាយឱ្យបានទូលំទូលាយ ជូនដល់ប្រជាពលរដ្ឋឱ្យចងទង់ជាតិ ឱ្យបានគ្រប់គេហដ្ឋាន។ មន្ទីរធម្មការ និងសាសនាខេត្ត ត្រូវណែនាំដល់គ្រប់វត្តអារាម មណ្ឌលវិបស្សនា និងអាស្រម ព្រះពុទ្ធសាសនា និងពាហិរសាសនា រៀបចំពិធីគោរព និងឧទ្ទិសថ្វាយព្រះរាជកុសលដល់ព្រះវិញ្ញាណក្ខន្ធ ព្រះករុណា ព្រះបរមរតនកោដ្ឋ ទៅតាមប្រពៃណីសាសនាដោយត្រូវអនុវត្តនូវវិធានការការពារនានារបស់ក្រសួងសុខាភិបាល»។
មិនតែប៉ុណ្ណោះ លោក សោម ពិសិដ្ឋ ក៏បានឱ្យមន្ទីរព័ត៌មានខេត្ត ត្រូវរៀបចំកម្មវិធីផ្សព្វផ្សាយឱ្យបានទូលំទូលាយតាម វិទ្យុ ទូរទស្សន៍ជាតិ និងឯកជន អំពីព្រះរាជជីវប្រវត្តិ ព្រះរាជសកម្មភាព និងស្នាព្រះហស្ថរបស់ព្រះករុណា ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត ចំពោះជាតិ សាសនា និងប្រជារាស្ត្រ៕