ភ្នំពេញៈ អ្នកជំងឺកូវីដ ១៩ ចំនួន ៥៣ នាក់ ដែលរួមមានស្ត្រីសម្រាលកូន ១១ នាក់បានជាសះស្បើយកាលពីថ្ងៃទី ១១ និង ១៤ ខែតុលាឆ្នាំ ២០២១ នេះ ដែលធ្វើឱ្យចំនួនអ្នកជាមានយ៉ាងហោចណាស់ជាង ១០០ នាក់នៅមន្ទីរពេទ្យជ័យវរ្ម័នទី ៧ (គន្ធបុប្ផាទី ៣) ក្នុងខែតុលាឆ្នាំ ២០២១ នេះ។
យោងតាមមូលនិធិគន្ធបុប្ផាកម្ពុជាបានឱ្យដឹងថា នៅថ្ងៃព្រហស្បតិ៍ ទី ១៤ ខែតុលាឆ្នាំ ២០២១ អ្នកជំងឺកូវីដ ១៩ ចំនួន ៣២ នាក់ដែលរួមមានទាំងស្ត្រីសម្រាលកូនរួច ៧ នាក់ផងដែរនោះបានជាសះស្បើយពីជំងឺនេះ។ ក្រៅពីនេះ អ្នកជំងឺកូវីដ ១៩ ចំនួន ២១ នាក់ផ្សេងទៀត ដែលក្នុងនោះមានទាំងស្ត្រីសម្រាលកូនរួចចំនួន ៤ នាក់ ក៏បានជាសះស្បើយផងដែរកាលពីថ្ងៃចន្ទទី ១១ ខែតុលា ឆ្នាំ ២០២១។
មូលនិធិគន្ធបុប្ផាកម្ពុជាបានសរសេរថា៖ «សូមអរគុណ និងកោតសរសើរដល់ក្រុមគ្រូពេទ្យយុទ្ធជនអាវស ទាំងផ្នែកសម្ភព នៅមន្ទីរពេទ្យជ័យវរ្ម័នទី ៧ (គន្ធបុប្ផាទី ៣) ដែលបានជួយសម្រាលកូនរបស់គាត់ និងព្យាបាលប្រកបដោយជោគជ័យ។ នេះជាលទ្ធផលដ៏មោទនមួយនៃការពិនិត្យ ព្យាបាលដោយមិនបង់ថ្លៃ និងមិនមានការរើសអើង»។
យ៉ាងហោចណាស់ អ្នកជំងឺកូវីដ ១៩ សរុប ១៦៥ នាក់បានជាសះស្បើយក្នុងខែតុលាឆ្នាំ ២០២១នេះ។ នេះបើយោងតាមហ្វេសប៊ុករបស់មូលនិធិគន្ធបុប្ផាកម្ពុជា។ អ្នកជាសះស្បើយទាំងនោះត្រូវបានអនុញ្ញាតឱ្យវិលត្រឡប់ទៅផ្ទះវិញរៀងៗខ្លួន។ ប៉ុន្តែត្រូវបានណែនាំឱ្យបន្តធ្វើចត្តាឡីស័កចំនួន ១៤ ថ្ងៃថែមទៀត និងត្រូវអនុវត្តវិធានសុខាភិបាល ៣ ការពារ និង ៣ កុំ។
មូលនិធិនេះបានលើកឡើងថា មន្ទីរពេទ្យនេះអាចដំណើរការទៅបាន គឺដោយសារតែការបរិច្ចាគរបស់សប្បុរសជននានា។ ហេតុនេះ មូលនិធិគន្ធបុប្ផាកម្ពុជាបានធ្វើការអំពាវនាវ សូមឱ្យសាធារណជនចូលរួមបរិច្ចាគដល់មន្ទីរពេទ្យគន្ធបុប្ផា បើទោះបីជាថវិកាតិចតួចយ៉ាងណាក្តី៕