.jpg)
លោក ម៉ៅ ភិរុណ ប្រធានក្រុមប្រឹក្សាខេត្តកណ្ដាលបានជំរុញឱ្យមន្ទីរអង្គភាពពាក់ព័ន្ធ និងអាជ្ញាធរមូលដ្ឋាន ត្រូវបញ្ចប់ការបូមខ្សាច់ខុសទីតាំង និងការបូមខ្សាច់លើសម៉ោងកំណត់ តាមរយៈប្រព័ន្ធវីដេអូ Zoom Meeting ។ រូបថត រដ្ឋបាលខេត្តកណ្ដាល
កណ្ដាលៈ លោក ម៉ៅ ភិរុណ ប្រធានក្រុមប្រឹក្សាខេត្តកណ្ដាលបានជំរុញឱ្យមន្ទីរអង្គភាពពាក់ព័ន្ធ និងអាជ្ញាធរមូលដ្ឋាន ត្រូវបញ្ចប់ការបូមខ្សាច់ខុសទីតាំង និងការបូមខ្សាច់លើសម៉ោងកំណត់ ដែលអាចធ្វើឱ្យមានការរំខានដល់ការរស់នៅរបស់ប្រជាពលរដ្ឋ និងបាក់ច្រាំងទន្លេ បន្ទាប់ពីទឹកទន្លេស្រកចុះ។
លោក ម៉ៅ ភិរុណ បានជំរុញបែបនេះក្នុងឱកាសដែលលោកបានដឹកនាំកិច្ចប្រជុំសាមញ្ញក្រុមប្រឹក្សាខេត្ត លើកទី ២៩ អាណត្តិទី ៣ នាព្រឹកថ្ងៃទី ១៤ តុលា ឆ្នាំ ២០២១ នៅសាលាខេត្តកណ្ដាល តាមរយៈប្រព័ន្ធវីដេអូ Zoom Meeting ដោយមានការចូលរួមពីលោក គង់ សោភ័ណ្ឌ អភិបាលខេត្ត និងសមាជិកក្រុមប្រឹក្សាខេត្ត ព្រមទាំងមន្ត្រីមកពីបណ្តាមន្ទីរ អង្គភាពជុំវិញខេត្ត។
លោក ម៉ៅ ភិរុណ ថ្លែងថា បន្ទាប់ពីមានការស្រកចុះនូវទឹកទន្លេ ព្រែក អាចបណ្ដាលឱ្យមានការបាក់ច្រាំង ដែលជាកត្តាធម្មជាតិ ក៏ប៉ុន្តែក៏មានកត្តាមួយចំនួន ដែលជាបញ្ហាប្រឈមបណ្ដាលឱ្យមានការបាក់ច្រាំងទន្លេ និងធ្វើឱ្យរំខានដល់ការរស់នៅរបស់ប្រជាពលរដ្ឋ ដូចជា ការបូមខ្សាច់ខុសទីតាំងដែលបានកំណត់ និងកាបូមហួសម៉ោងដែលច្បាប់បានកំណត់ផងដែរ។
លោកបញ្ជាក់ថា៖ «ដូច្នេះអាជ្ញាធរពាក់ព័ន្ធ ពិសេសមន្ទីររ៉ែ និងថាមពល និងអាជ្ញាធរមូលដ្ឋានត្រូវសហការគ្នាបញ្ចប់នូវសកម្មភាពទាំងនេះឱ្យបាន ដើម្បីកាត់បន្ថយនូវការបាក់ច្រាំង និងការរំខានដល់ការរស់នៅរបស់ប្រជាពលរដ្ឋផងដែរ»។
ក្នុងកិច្ចប្រជុំនេះដែរ លោក ម៉ៅ ភិរុណ បានកោតសរសើរ និងវាយតម្លៃខ្ពស់ ដល់អាជ្ញាធរមូលដ្ឋាន ដែលបានខិតខំការពារសន្តិសុខ សណ្ដាប់ធ្នាប់ ជូនប្រជាពលរដ្ឋ និងបានយកចិត្តទុកដាក់ខ្ពស់ក្នុងការបង្ការ ការពារ និងទប់ស្កាត់ការឆ្លងរាលដាលនៃជំងឺកូវីដ ១៩ នៅក្នុងមូលដ្ឋានរបស់ខ្លួន បានយ៉ាងល្អប្រសើរ ក្នុងអំឡុងពេលពិធីបុណ្យភ្ជុំបិណ្ឌកន្លងមក៕
