ភ្នំពេញៈ មនុស្សចំនួន ១៥ នាក់ ត្រូវបានឃាត់ ដើម្បីអប់រំ និងពិន័យជាទឹកប្រាក់ប្រមាណជាជាង ៧ លានរៀល ដោយសារតែល្មើសនឹងវិធានការសុខាភិបាល និងវិធានការរដ្ឋបាលកាលពីថ្ងៃទី ១៤ ខែ តុលា ឆ្នាំ ២០២១។
គណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩ (គ.អ.ក) បានប្រកាសនៅថ្ងៃសុក្រទី ១៥ ខែតុលានេះឱ្យដឹងថា គ.អ.ក បានអនុវត្តវិធានការច្បាប់មានចំនួន ១១ ករណី។ ក្នុងនោះបានធ្វើការឃាត់ខ្លួនមនុស្សយកមកអប់រំ និងពិន័យចំនួន ១៥ នាក់ និងឃាត់រថយន្តបាន ១ គ្រឿង ដោយធ្វើការផាកពិន័យជាប្រាក់ ចំនួន ៧ ៨០០ ០០០ រៀល ដោយសារតែល្មើសនឹងវិធានការសុខាភិបាល និងវិធានការរដ្ឋបាល សម្រាប់ថ្ងៃទី ១៤ ខែតុលានេះ។
គ.អ.ក ក៏បានឱ្យដឹងផងដែរថា កាលពីថ្ងៃទី ១៤ ដដែលនោះ ក្រុមការងារក៏បានធ្វើការអប់រំផ្សព្វផ្សាយច្បាប់បាន ៤៧១ ទីតាំងផ្សេងៗគ្នា និងអប់រំមនុស្សតាមគោលដៅចរាចរណ៍ផ្លូវគោកបាន ២០៤ នាក់ ដែលមានយានយន្តចំនួន ១៣៥ គ្រឿងផងដែរ៕