.jpg)
យុវជន ៣ នាក់ដែលត្រូវបានឃាត់ខ្លួនរឿងកំហែងយកទូរស័ព្ទពីព្រះសង្ឃនៅវត្តចំនួន ៣ នាពេលថ្មីៗនេះត្រូវបានតេស្តរកឃើញជំងឺកូវីដ ១៩។ cambodiapolice
បន្ទាយមានជ័យៈ យុវជន ៣ នាក់ដែលត្រូវបានឃាត់ខ្លួនរឿងកំហែងយកទូរស័ព្ទពីព្រះសង្ឃនៅវត្តចំនួន ៣ នាពេលថ្មីៗនេះត្រូវបានតេស្តរកឃើញជំងឺកូវីដ ១៩ ហើយនគរបាលស្រុកមង្គលបូរីកំពុងតែបញ្ជូនពួកគេទៅព្យាបាលមុនពេលអនុវត្តនីតិវិធីច្បាប់។
កម្លាំងនគរបាលស្រុកមង្គលបូរីខេត្តបន្ទាយមានជ័យ និងនគរបាលប៉ុស្តិ៍ល្វា ស្រុកបវេល ខេត្តបាត់ដំបងបានធ្វើការឃាត់ខ្លួនមនុស្សទាំង ៣ នាក់កាលពីថ្ងៃទី ១៤ ខែតុលានេះ ហើយបានបញ្ជូនខ្លួនពួកគេទៅសួរនាំនៅអធិការដ្ឋាននគរបាល ស្រុកមង្គលបូរី ក្រោមការសង្ស័យរឿងធ្វើសកម្មភាពកំហែងយកទូរស័ព្ទពីព្រះសង្ឃតាមវត្តអារាម។ យុវជនទាំងនោះមានអាយុ ១៧ ឆ្នាំ និង ១៨ ឆ្នាំ ហើយម្នាក់ទៀតអាយុ ២៥ ឆ្នាំ។ ការឃាត់ខ្លួននេះត្រូវបានធ្វើឡើង ក្រោយពេលដែលសមត្ថកិច្ចធ្វើការស្រាវជ្រាវអស់រយៈពេល ២ ថ្ងៃ។ ក្នុងប្រតិបត្តិការនេះសមត្ថកិច្ចបានធ្វើការដកហូតបានវត្ថុតាងមួយចំនួនដូចជា ទូរស័ព្ទដៃ ៣ គ្រឿង, អាយផែត ០១ គ្រឿង, កាំភ្លើងខ្លីបាញ់គ្រាប់កង់ ០១ ដើម, កាំបិតសាំម៉ូរ៉ៃ ១ ដើម, ម្សៅក្រាមពណ៌សថ្លាដែលសង្ស័យថ្នាំញៀនចំនួន ៩ កូនថង់ និងកូនថង់សម្រាប់ច្រកថ្នាំញៀនមួយចំនួន។ នេះបើយោងតាមនគរបាលជាតិ។
លោក លី ឈុនគង់ អធិការរងនគរបាលស្រុកមង្គលបូរីបានប្រាប់ភ្នំពេញប៉ុស្តិ៍កាលពីថ្ងៃទី ១៥ តុលានេះថា ជនសង្ស័យបានធ្វើសកម្មភាពកំហែងនេះនៅប្រមាណជា ៣ វត្តផ្សេងៗគ្នា ដោយយកបានទូរស័ព្ទជាច្រើនគ្រឿង។ ប៉ុន្តែពួកគេមិនបានបង្ករបួសស្នាមដល់ព្រះសង្ឃនោះឡើយ។
លោកបញ្ជាក់ថា៖ «គ្រាន់តែចូលទៅសំឡុតលោកយកទូរស័ព្ទ ក៏ចេញទៅវិញទៅ។ គាត់ប្រើប្រាស់ [ថ្នាំញៀន] ហើយមានជាប់ខ្លួន ៩ កញ្ចប់តូច។...ក្មេងៗហ្នឹងគ្មានម៉ែ គ្មានឪ។ មួយនោះនៅតាមវត្តតាមអីដូចក្មេងអនាថា។ គ្មានអ្នកគ្រប់គ្រងទេ»។ លោកបន្តថា នគរបាលបានបញ្ជូនពួកគេទៅធ្វើតេស្តរកជំងឺកូវីដ ១៩ នៅមន្ទីរពេទ្យស្រុកមង្គលបូរី ហើយលទ្ធផលវិជ្ជមានទាំង ៣ នាក់។ ប៉ុន្តែមិនដឹងថាពួកគេបានឆ្លងជំងឺពីប្រភពណាមកនោះទេ។ នគរបាលកំពុងតែរៀបចំឯកសារបញ្ជូនពួកគេទៅព្យាបាលជំងឺកូវីដ ១៩ ហើយពួកគេនឹងត្រូវបញ្ជូនទៅតុលាការខេត្តតាមនីតិវិធីច្បាប់ ក្រោយពេលជាសះស្បើយពីជំងឺនោះ៕
