គណៈកម្មាធិការជាតិរៀបចំការបោះឆ្នោតបានឱ្យដឹងថា ក្នុងរយៈពេល ៣ ថ្ងៃ នៃការចាប់ផ្តើមពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ ២០២១ ដែលបានចាប់ផ្តើមកាលពីថ្ងៃទី ១២ ខែតុលា កន្លងមកនេះ នៅទូទាំងប្រទេសមានប្រជាពលរដ្ឋជាង ៣ ម៉ឺននាក់បានចុះឈ្មោះបោះឆ្នោតថ្មី។
យោងតាមសេចក្តីប្រកាសព័ត៌មានរបស់គណៈកម្មការជាតិរៀបចំការបោះឆ្នោត (គ.ជ.ប) នៅថ្ងៃទី ១៤ ខែតុលា បានឱ្យដឹងថា លទ្ធផលបណ្តោះអាសន្ននៃការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ ២០២១ រយៈពេល ៣ ថ្ងៃសរុបមានចំនួន ៣៤ ៩៤៤ នាក់។
គ.ជ.ប បានបញ្ជាក់ថា៖ «អ្នកដែលនឹងត្រូវលុបឈ្មោះចេញពីបញ្ជីបោះឆ្នោតសរុប មានចំនួន ២០ ២០៤ នាក់ ហើយអ្នកដែលបានកែតម្រូវទិន្នន័យសរុបមានចំនួន ៨ ០០១ នាក់ និងអ្នកដែលបានផ្ទេរទីលំនៅចូលក្នុងឃុំ សង្កាត់ថ្មីសរុបមានចំនួន ១០ ១៥៧ នាក់»។
គួរបញ្ជាក់ផងដែរថា ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ ២០២១ ប្រព្រឹត្តទៅចាប់ពីថ្ងៃទី ១២ ខែតុលា ដល់ថ្ងៃទី ៣០ ខែវិច្ឆិកា ឆ្នាំ ២០២១ គិតទាំងថ្ងៃសៅរ៍ និងថ្ងៃអាទិត្យ។ ប្រជាពលរដ្ឋទាំងអស់ត្រូវទៅពិនិត្យមើលឈ្មោះក្នុងបញ្ជីបោះឆ្នោតចុងក្រោយ ដើម្បីស្នើសុំកែទិន្នន័យ ប្រសិនបើមានចំណុចខុសឆ្គង។
សេចក្តីប្រកាសព័ត៌មានដដែលនេះបានបន្តថា ប្រជាពលរដ្ឋដែលទើបគ្រប់អាយុ ១៨ ឆ្នាំ (កើតមុន ឬកើតត្រឹមថ្ងៃទី ៦ ខែមិថុនា ឆ្នាំ ២០០៤) និងប្រជាពលរដ្ឋដែលមិនធ្លាប់ចុះឈ្មោះបោះឆ្នោតពីមុនមកត្រូវទៅចុះឈ្មោះបោះឆ្នោតឱ្យបានគ្រប់ៗគ្នា៕