សៀមរាបៈ យុវតីជាសិស្សថ្នាក់ទី ៧ ម្នាក់ត្រូវបានរន្ទះបាញ់ស្លាប់កាលពីរសៀលថ្ងៃទី ១៤ ខែតុលា ខណៈពេលដែលកំពុងតែជួយជម្រះស្មៅដំឡូងមីម្តាយមីងនៅភូមិត្រពាំងត្រុំ ឃុំពពេល ស្រុកសូទ្រនិគម ខេត្តសៀមរាប។
លោក សឿម សុំនាយប៉ុស្តិ៍ពពេលបានប្រាប់ភ្នំពេញប៉ុស្តិ៍នៅថ្ងៃទី ១៥ តុលានេះថា ជនរងគ្រោះឈ្មោះ ហេត សុធារ៉ា អាយុ ១៤ ឆ្នាំជាសិស្សរស់នៅក្នុងភូមិត្រពាំងត្រុំ ឃុំពពេល។
លោកបានឱ្យដឹងថា ជនរងគ្រោះបានទៅជួយជម្រះស្មៅដំឡូងមីម្តាយមីងរបស់នាងជាមួយនឹងបងប្អូនជីដូនមួយផ្សេងទៀតនៅចំការមួយកន្លែងដែលមានចម្ងាយពីផ្ទះប្រហែល ៥០០ ម៉ែត្រកាលពីវេលាម៉ោងជាង ២ រសៀលថ្ងៃទី ១៤ ខែតុលានេះ។ ប្រមាណជាជាង ១ ម៉ោងក្រោយមក ក៏មានភ្លៀងធ្លាក់ ហើយពួកគេក៏នាំគ្នាទៅរកកន្លែងជ្រកភ្លៀង។
លោកបញ្ជាក់ថា៖ «ពេលហ្នឹងមានភ្លៀងធ្លាក់មធ្យម ហើយបងជីដូនមួយប្រុសហ្នឹងក៏បបួលទៅជ្រកភ្លៀង។ គ្រាន់តែដើរចេញមក នាងក៏ត្រូវរន្ទះបាញ់តែម្តង។ ពួកគាត់នៅកណ្តាលវាល។ គាត់ប្រហែលស្លាប់ភ្លាមៗនៅកន្លែងបាញ់ហ្នឹង។ ពេលយកមកដល់ផ្ទះទើបយើងដឹង»។ លោកបន្តថា នគរបាលបានចុះទៅពិនិត្យសាកសព ហើយឃើញថា ឃើញមានស្នាមឆេះដាច់ជើងខោ។ លោកថា ករណីរន្ទះបាញ់ក្នុងមូលដ្ឋានរដ្ឋបាលឃុំពពេលកម្រកើតមានណាស់។
យោងតាមនគរបាលជាតិបានឱ្យដឹងថា ក្រោយពេលមានភ្លៀង បងជីដូនមួយរបស់នាងបានប្រាប់នាងឱ្យទៅជ្រកភ្លៀងសិន។ ភ្លាមៗនោះ ជនរងគ្រោះក៏បានដើរទៅបានប្រហែល ៣ ជំហាន ស្រាប់តែត្រូវរន្ទះបាញ់ចំក្បាលធ្វើឱ្យជ្រុះមួកចេញពីក្បាល ហើយស្លាប់តែម្តង។ តាមការពិនិត្យសាកសពរបស់សមត្ថកិច្ចជំនាញលើផ្នែកក្បាល ដងខ្លួន និងអវៈយវៈ ពុំមានស្លាកស្នាមអ្វីពាក់ព័ន្ធនឹងបទល្មើសព្រហ្មទណ្ឌ ឬឃាតកម្មនោះទេ។ តាមការសន្និដ្ឋានរបស់គ្រូពេទ្យ និងសមត្ថកិច្ចជំនាញបានបញ្ជាក់ថា ជនរងគ្រោះពិតជាស្លាប់ដោយសាររន្ទះបាញ់ពិតប្រាកដមែន ហើយក្រុមគ្រូពេទ្យបានពិនិត្យសំណាករកមេរោគកូវីដ ១៩ ផងដែរ ប៉ុន្តែលទ្ធផលគឺអវិជ្ជមាន៕