កណ្តាលៈ បុរសម្នាក់ត្រូវបានចាប់ខ្លួនកាលពីថ្ងៃទី ១៥ ខែតុលា ក្រោមការសង្ស័យថាបានចាក់ជនជាតិវៀតណាមអាយុ ៤០ ឆ្នាំម្នាក់ស្លាប់នៅភូមិអំពិលទឹក ឃុំសំបួរមាស ស្រុកមុខកំពូល ខេត្តកណ្ដាលកាលពីថ្ងៃទី ១៤ ខែតុលា។
លោក កៅ ចេនឡា នាយប៉ុស្តិ៍សំបួរមាសបានប្រាប់ភ្នំពេញប៉ុស្តិ៍នៅថ្ងៃទី ១៥ តុលាថា ទាំងជនរងគ្រោះ និងជនសង្ស័យសុទ្ធតែអ្នកមកពីខេត្តព្រៃវែង។ ប៉ុន្តែជនរងគ្រោះត្រូវបានគេប្រទះឃើញស្លាប់នៅក្រោមដើមត្នោតនៅក្នុងភូមិអំពិលទឹកកាលពីថ្ងៃទី ១៤ ខែតុលានេះ ហើយមន្ត្រីពាក់ព័ន្ធបានធ្វើការស្រាវជ្រាវ និងចាប់បានជនសង្ស័យម្នាក់។
លោកថ្លែងថា៖ «ជនសង្ស័យត្រូវបានឃាត់ខ្លួនរួចហើយ...។ អ្នកធ្វើកោសល្យវិច័យថា គេសម្លាប់នៅហ្នឹង។ ពួកគេជិះម៉ូតូឌុបគ្នាហ្នឹង។ ជនរងគ្រោះត្រូវចាក់ពីក្រោយប្រាំកាំបិត និងពីមុខ ១ កាំបិទ»។ លោកបន្តថា ជនសង្ស័យស្នាក់នៅម្តុំបឹងសាឡាងក្នុងរាជធានីភ្នំពេញ។ រីឯមូលហេតុនៃការសម្លាប់លោកមិនដឹងច្បាស់នោះទេ។
លោក សេង ពន្លកអធិការស្រុកពាមរក៍ខេត្តព្រៃវែងបានឱ្យដឹងថា ជនរងគ្រោះជាជនជាតិវៀតណាម ដែលមានទីលំនៅភូមិ៥ ឃុំព្រែកខ្សាយ «ខ» ស្រុកពាមរក៍ ខេត្តព្រៃវែង។ ប៉ុន្តែទៅប្រកបរបររកស៊ីនៅភ្នំពេញ ហើយលោកក៏មិនបានដឹងព័ត៌មានលម្អិតទាក់ទងនឹងករណីនេះដែរ៕