ភ្នំពេញៈ កម្ពុជាត្រៀមខ្លួនរួចជាស្រេច ដើម្បីពង្រឹងកិច្ចសហប្រតិបត្តិការទ្វេភាគី និងពហុភាគី ជាមួយបណ្ដាប្រទេសនានា ក្នុងសកលលោក និងដៃគូក្នុងការលើកកម្ពស់ការអនុវត្តរបៀបវារៈស្ដីពីស្ត្រី សន្តិភាព និងសន្តិសុខ។
លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារីបានថ្លែងថា៖ «កម្ពុជាត្រៀមខ្លួនរួចជាស្រេច ដើម្បីកសាងក៏ដូចជាពង្រឹងនូវកិច្ចសហប្រតិបត្តិការទ្វេភាគី និងពហុភាគីជាមួយបណ្ដាប្រទេសនានាក្នុងសកលលោក និងដៃគូពាក់ព័ន្ធទាំងអស់ ក្នុងការលើកកម្ពស់ការអនុវត្តរបៀបវារៈស្ដីពី ស្ត្រី សន្តិភាព និងសន្តិសុខ ក្នុងគោលបំណងជំរុញនូវសាមគ្ដីភាពសម្រាប់សហគមន៍ពិភពលោកទាំងមូល និងស្ដារឡើងវិញនូវសហគមន៍ប្រកបដោយភាពធន់ និងចែករំលែកនូវវិបុលភាពសម្រាប់ទាំងអស់គ្នាផងដែរ»។ នេះបើយោងតាមហ្វេសប៊ុករដ្ឋបាលខេត្តកណ្តាលនៅថ្ងៃទី១៥ ខែតុលា។
លោកស្រីថ្លែងបែបនេះ នៅក្នុងវេទិកាអាស៊ី-អឺរ៉ុបស្តីពីស្ត្រី សន្តិភាព និងសន្តិសុខតាមប្រព័ន្ធវីដេអូ កាលពីថ្ងៃទី ១៤ ខែតុលា។
វេទិកានេះមានគោលបំណងចែករំលែកបទពិសោធ និងឧបមានុវត្តន៍រវាងបណ្តាប្រទេសនៅអាស៊ី និងអឺរ៉ុបក្នុងការអនុវត្តរបៀបវារៈស្ត្រី សន្តិភាព និងសន្តិសុខ ដោយមានការចូលរួមពីតំណាងប្រទេស៥៣ ដែលក្នុងនោះ៣០ប្រទេសមកពីទ្វីបអឺរ៉ុប ២១ ប្រទេសមកពីទ្វីបអាស៊ី សហភាពអឺរ៉ុប និងលេខាធិការដ្ឋានអាស៊ាន។
ហ្វេសប៊ុកដដែលបញ្ជាក់ថា នៅក្នុងវេទិកានេះ លោកស្រីម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនង ជាមួយរដ្ឋសភា-ព្រឹទ្ធសភា និងអធិការកិច្ចបានស្នើឱ្យប្រទេសចូលរួមទាំងអស់ប្រែក្លាយលទ្ធផលនៃវេទិកានេះឱ្យទៅជាសកម្មភាពជាក់លាក់ និងប្រាកដនិយម ដើម្បីបុព្វហេតុសន្តិភាព សន្តិសុខ និងមនុស្សធម៌។
ប្រភពដដែលបញ្ជាក់ថា កិច្ចប្រជុំកំពូលអាស៊ី-អឺរ៉ុបលើទី១៣ (ASEM13) នៅថ្ងៃទី ២៥-២៦ ខែវិច្ឆិកា ដែលកម្ពុជានឹងធ្វើជាម្ចាស់ផ្ទះនឹងផ្តល់កាលានុវត្តភាពមួយទៀតសម្រាប់ការលើកកម្ពស់វឌ្ឍនភាពនៃរបៀបវារៈស្ត្រី សន្តិភាព និសន្តិសុខ៕