.jpg)
មន្ត្រីសាលាខេត្តកំពង់ចាមចុះសួរសុខទុក្ខ និងនាំយកគ្រឿងឧបភោគ បរិភោគ ទៅជូនពលរដ្ឋដែលកំពុងព្យាបាល និងធ្វើចត្តាឡីស័កនៅតាមផ្ទះកាលពីថ្ងៃទី ១៤ ខែតុលា។ រូបថត រដ្ឋបាលខេត្តកំពង់ចាម
កំពង់ចាមៈ រដ្ឋបាលខេត្តកំពង់ចាមបានសម្រេចបន្តសុពលភាពនៃការអនុវត្តវិធានការរដ្ឋបាល ដើម្បីទប់ស្កាត់ការឆ្លងរីករាលដាលនៃជំងឺកូវីដ ១៩ ក្នុងភូមិសាស្ត្រខេត្ត រយៈពេល ២ សប្ដាហ៍បន្ថែមទៀត ដោយគិតចាប់ពីថ្ងៃទី ១៥ ខែតុលា រហូតដល់ថ្ងៃទី ២៨ ខែតុលាឆ្នាំ ២០២១ នេះ។
សេចក្តីសម្រេចកាលពីថ្ងៃទី ១៤ តុលាបានបញ្ជក់ថាការបន្តនេះគឺ៖ «ដើម្បីធានាប្រសិទ្ធភាពនៃការអនុវត្តវិធានការប្រយុទ្ធ និងទប់ស្កាត់ ការឆ្លងរាលដាលនៃជំងឺកូវីដ ១៩ ជាពិសេស ក្នុងបរិបទដែលកម្ពុជា កំពុងប្រឈមនឹងការមកដល់នៃរលកទី ៣ នៃការឆ្លងរីករាលដាលទ្រង់ទ្រាយធំនៃជំងឺកូវីដ ១៩ បណ្តាលមកពីមេរោគបំប្លែងខ្លួនថ្មីប្រភេទ ដែលតា (Delta) និងស្របពេលខេត្តកំពង់ចាមជាខេត្តមួយត្រូវអនុវត្តកាតព្វកិច្ចពាក់ម៉ាស់ និងកាតព្វកិច្ចរក្សាគម្លាតសុវត្ថិភាព ក្នុងអំឡុងពេលនៃការឆ្លងរាលដាលជំងឺកូវីដ ១៩ ក្នុងសហគមន៍»។
រដ្ឋបាលខេត្តបានធ្វើការណែនាំឱ្យអភិបាលនៃគណៈអភិបាលក្រុង-ស្រុក ត្រូវហាមឃាត់នូវរាល់សកម្មភាពមួយចំនួនដូចខាងក្រោម៖ សកម្មភាពមុខរបរ និងអាជីវកម្មក្លិបកម្សាន្តគ្រប់ប្រភេទជាអាទិ៍ ខារ៉ាអូខេ រង្គសាល ឌីស្កូតែក និងបៀហ្គាឌីន រមណីយដ្ឋានធម្មជាតិ និងកែច្នៃសួនកម្សាន្តនានា អាជីវកម្ម ម៉ាស្សា, ហាងលក់ និងសេពគ្រឿងស្រវឹងគ្រប់ប្រភេទ, រោងភាពយន្ត, រោងសម្ដែងសិល្បៈ, សារមន្ទីរ, បណ្ណាល័យ, ក្លិបហាត់ប្រាណ និងមជ្ឈមណ្ឌលកីឡា ការប្រគំតន្ត្រី។ សកម្មភាពការងារ មុខរបរ និងអាជីវកម្មផ្សេងទៀត ដោយយោងតាមតម្រូវការចាំបាច់ក្នុងការប្រយុទ្ធនឹងទប់ស្កាត់ការឆ្លងរាលដាលនៃជំងឺកូវីដ ១៩។ រាល់សកម្មភាពនៃការជួបជុំ ឬការប្រមូលផ្ដុំមនុស្សជាលក្ខណៈឯកជនដែលមានមនុស្សចូលរួមលើសពី ១០ នាក់ត្រូវមានការអនុញ្ញាតពីអាជ្ញាធរមានសមត្ថកិច្ច។ រាល់ការជួបជុំ ឬប្រមូលផ្ដុំមនុស្ស ដើម្បីសេពគ្រឿងស្រវឹង និងល្បែងស៊ីសងគ្រប់ប្រភេទ។ ការលក់ដូរគ្រឿងស្រវឹងគ្រប់ប្រភេទ សកម្មភាពអាជីវកម្មពេលរាត្រី រួមមាន៖ តូបលក់ចល័ត ផ្សាររាត្រី ផ្សារទំនើប ម៉ាត ហាងលក់ ទំនិញគ្រប់ប្រភេទ ការជួបជុំនៅតាមទីសាធារណៈនានា ដែលមានសភាពអ៊ូអរ និងការជួបជុំមនុស្សច្រើន ត្រូវហាមឃាត់ចាប់ពីម៉ោង ២២:០០ នាទី ដល់ម៉ោង ០៣:០០ នាទីព្រឹក ជាកំហិត និងហាមឃាត់សកម្មភាពប្រមូលផ្តុំមនុស្ស ក្នុងការថ្វាយបង្គំតាមបែបសាសនា។
ទោះយ៉ាងណា សេចក្តីសម្រេចក៏បានគូសបញ្ជាក់ពីសកម្មភាពដែលត្រូវបានធ្វើការលើកលែងចាំបាច់មួយចំនួនផងដែរ។
រដ្ឋបាលក្រុង និងស្រុកក៏ត្រូវបានជំរុញឱ្យយកចិត្តទុកដាក់ ដើម្បីធ្វើការរឹតបន្តឹងការត្រួតពិនិត្យ និងការរៀបចំ របៀបរៀបរយ និងសណ្តាប់ធ្នាប់នៅតាមទីកន្លែងដែលជាប្រភព ឬអាចមានហានិភ័យខ្ពស់នៃការឆ្លងរាលដាលនៃជំងឺកូវីដ ១៩ ជាពិសេសតាមទីផ្សារ និងកន្លែងលក់ដូរគ្រឿងឧបភោគបរិភោគ និងទីតាំងអាជីវកម្មផ្សេងទៀត ព្រមទាំងការរៀបចំកម្មវិធីសាសនា កម្មវិធីប្រពៃណី កម្មវិធីកីឡា ឬកម្មវិធីកម្សាន្តនានាក្នុងរយៈពេលនៃការអនុវត្ត យុទ្ធនាការនេះ និងត្រូវហាមឃាត់មិនឱ្យបើកដំណើរការចំពោះផ្សារ ឬទីតាំងណាដែលមិនមានរបៀបរៀបរយ ឬមិនធានាបាននូវវិធានការសុវត្ថិភាពផ្នែកសុខាភិបាល៕
