The Phnom Penh Post Search

Search form

Logo of Phnom Penh Post newspaper Phnom Penh Post - ក.ប.ប រកឃើញ​ស្ថានីយ​ប្រេងឥន្ធនៈ​លក់​មិន​គ្រប់​លីត្រ​ចំនួន ៣ ទីតាំង និង​ទំនិញ​ខូចគុណភាព ២០០ គីឡូក្រាម




ក.ប.ប រកឃើញ​ស្ថានីយ​ប្រេងឥន្ធនៈ​លក់​មិន​គ្រប់​លីត្រ​ចំនួន ៣ ទីតាំង និង​ទំនិញ​ខូចគុណភាព ២០០ គីឡូក្រាម

Content image - Phnom Penh Post
អគ្គនាយកដ្ឋាន​ការពារ​អ្នកប្រើប្រាស់ កិច្ចការ​ប្រកួតប្រជែង និង​បង្ក្រាប​ការក្លែងបន្លំ (ក.ប.ប) បាន​រកឃើញ​ស្ថានីយ និង​ដេប៉ូ​ប្រេងឥន្ធនៈ​លក់​មិន​គ្រប់​លីត្រ​ចំនួន ៣ ទីតាំង​ក្នុង​ខេត្តកណ្ដាល។ អគ្គ.ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ CCF

ក.ប.ប រកឃើញ​ស្ថានីយ​ប្រេងឥន្ធនៈ​លក់​មិន​គ្រប់​លីត្រ​ចំនួន ៣ ទីតាំង និង​ទំនិញ​ខូចគុណភាព ២០០ គីឡូក្រាម

ភ្នំពេញៈ អគ្គនាយកដ្ឋាន​ការពារ​អ្នកប្រើប្រាស់ កិច្ចការ​ប្រកួតប្រជែង និង​បង្ក្រាប​ការក្លែងបន្លំ (ក.ប.ប) ប្រកាស​នៅ​ថ្ងៃទី ១៦ ខែតុលា​នេះ​ថា បាន​រកឃើញ​ស្ថានីយ និង​ដេប៉ូ​ប្រេងឥន្ធនៈ​លក់​មិន​គ្រប់​លីត្រ​ចំនួន ៣ ទីតាំង​ក្នុង​ខេត្តកណ្ដាល និង​បាន​រកឃើញ ទំនិញ​ខូចគុណភាព និង​ហួស​កាលបរិច្ឆេទ​ប្រើប្រាស់​ចម្រុះ​ជាង ២០០ គីឡូក្រាម​នៅ​ខេត្តតាកែវ និង​កំពត។

អគ្គនាយកដ្ឋាន ក.ប.ប នៅ​ថ្ងៃទី ១៦ ខែតុលា​នេះ អះអាង​ថា​បាន​រកឃើញ​ស្ថានីយ និង ដេប៉ូ​ប្រេងឥន្ធនៈ​ដាក់លក់​មិន​គ្រប់​លីត្រ​ចំនួន ៣ ទីតាំង​ក្នុង​ខេត្តកណ្ដាល កាលពី​ថ្ងៃទី ១៥ ខែតុលា។ មន្ត្រី​ស៊ើបអង្កេត ក.ប.ប. សាខា​ខេត្តកណ្ដាល បញ្ជាក់ថា ស្ថានីយ និង​ដេប៉ូ​ប្រេងឥន្ធនៈ​ចំនួន ៣ ក្នុង​ចំណោម ៥ ស្ថានីយ និង​ដេប៉ូ មិនមាន​ភាព​អនុលោម​តាមច្បាប់​ក្នុងស្រុក​កោះធំ ខេត្តកណ្ដាល និង​បាន​ធ្វើការ​ពិន័យ​អន្តរការណ៍​ទៅតាម​ច្បាប់​ផងដែរ។

នៅ​ថ្ងៃ​ជាមួយ​គ្នា​នោះ មន្ត្រី​ស៊ើបអង្កេត ក.ប.ប. សាខា​ខេត្តតាកែវ និង​ខេត្តកំពត ក៏បាន​បន្ត​ចុះ​ត្រួតពិនិត្យ​ទំនិញ​លើ​ទីផ្សារ និង​ឃ្លាំង​ស្ដុក​ទំនិញ​ក្នុង​ខេត្តតាកែវ និង​ខេត្តកំពត ដើម្បី​ធានា​ការពារ​ផលប្រយោជន៍ និង​សុខភាព​ប្រជាពលរដ្ឋ​ក្នុង​ខេត្ត​ទាំងពីរ។

អគ្គនាយកដ្ឋាន ក.ប.ប បញ្ជាក់ថា៖ «លទ្ធផល​នៃ​ការចុះ​ត្រួតពិនិត្យ​ក៏បាន​រកឃើញ និង​ដកហូត​ភ្លាមៗ​នូវ​ទំនិញ​ខូចគុណភាព និង​ហួស​កាលបរិច្ឆេទ​ប្រើប្រាស់​ចម្រុះ​ប្រមាណ ២២៨,៣៩ គីឡូក្រាម»។ ចំពោះ​ទំនិញ​ដែល​ត្រូវបាន​ដកហូត​ត្រូវបាន​យកមក​រក្សាទុក ដើម្បី​ធ្វើការ​កម្ទេចចោល​ទៅតាម​នីតិវិធី​នៃ​ច្បាប់៕

វីដេអូ៖

អត្ថបទគួរចាប់អារម្មណ៍