ភ្នំពេញៈ រដ្ឋមន្ត្រីក្រសួងសាធារណការ និងដឹកជញ្ចូន លោកស៊ុន ចាន់ថុល ដឹកនាំគណៈប្រតិភូចូលរួមសន្និសីទដឹកជញ្ជូនចីរភាពជាសកលនៃអង្គការសហប្រជាជាតិលើកទី ២ តាមរយៈប្រព័ន្ធវីដេអូពីចម្ងាយ។
លោកថ្លែងសារសំខាន់ៗទាក់ទងនឹងវិស័យដឹកជញ្ជូនក្នុងការជំរុញកំណើនសេដ្ឋកិច្ចដើម្បីកាត់បន្ថយភាពក្រក្រី។
សន្និសីទដឹកជញ្ជូនចីរភាពជាសកល នៃអង្គការសហប្រជាជាតិលើកទី ២ (The 2nd United Nations Global Sustainable Transport Conference) ត្រូវបានធ្វើឡើងរយៈពេល៣ថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែតុលា នៅទីក្រុងប៉េកាំង សាធារណរដ្ឋប្រជាមានិតចិន ដោយមានការអញ្ជើញចូលរួមតាមប្រព័ន្ធវីដេអូពីចម្ងាយពីប្រមុខរដ្ឋ ប្រមុខរដ្ឋាភិបាលសំខាន់ៗមកពីជុំវិញពិភពលោក និងអ្នកជំនាញមកពីអង្គការអន្តរជាតិពាក់ព័ន្ធនានាផងដែរ។
ទំព័រហ្វេសប៊ុករបស់ក្រសួងសាធារណការនិងដឹកជញ្ចូនបានឱ្យដឹងថា សន្និសីទនេះរៀបចំឡើងក្នុងគោលបំណង ដើម្បីពិភាក្សាលើប្រធានបទមួយចំនួន រួមមាន តួនាទីនៃការដឹកជញ្ជូនចីរភាពក្នុងការលុបបំបាត់ភាពក្រីក្រ។ ការជំរុញសេដ្ឋកិច្ច និងជីវភាពរស់នៅរបស់ប្រជាជន ការតភ្ជាប់សកល ការអភិវឌ្ឍបៃតង ការអភិវឌ្ឍថ្នាក់តំបន់ នវានុវត្តន៍ និងទីក្រុងចីរភាព។
ថ្លែងក្នុងសុន្ទរកថាគន្លឹះទៅកាន់អង្គសន្និសីទនាឱកាសនោះ លោកស៊ុន ចាន់ថុល បានលើកឡើងថា នាទីវិស័យដឹកជញ្ជូនគឺ ចូលរួមចំណែកក្នុងការជំរុញកំណើនសេដ្ឋកិច្ច ដើម្បីកាត់បន្ថយភាពក្រក្រី។ កម្ពុជាបានយកចិត្តទុកដាក់ចំពោះគោលនយោបាយនិងអាទិភាពនៃវិស័យហេដ្ឋារចនាសម្ព័ន្ធ និងដឹកជញ្ជូន ដែល រួមមាន ការស្តារវិស័យដឹកជញ្ជូន និងបណ្តាញដឹកជញ្ជូនពហុមធ្យោបាយ ដើម្បីតភ្ជាប់ផ្ទៃក្នុងប្រទេស និងអន្តរជាតិ។
លោកបញ្ជាក់ថា៖«ការអភិវឌ្ឍប្រព័ន្ធភ័ស្តុភារកម្មរស់រវើក ដើម្បីពង្រឹងការប្រកួតប្រជែង និងការធ្វើពិពិធកម្មសេដ្ឋកិច្ច។ គោលនយោបាយបង្កើតការងារធ្វើ កាត់បន្ថយភាពក្រក្រីតាមរយៈការតភ្ជាប់ផ្លូវជនបទ ការពារបរិស្ថាន និងធ្វើប្រសើរឡើងដល់សុវត្ថិភាពចរាចរណ៍ គឺជាតួនាទីវិស័យដឹកជញ្ជូនក្នុងការជំរុញកំណើនសេដ្ឋកិច្ចដើម្បីកាត់បន្ថយក្រក្រី»។
ជាមួយគ្នានោះ លោកស៊ុនចាន់ថុល ក៏បានលើកឡើងអំពីគម្រោងអភិវឌ្ឍន៍ហេដ្ឋារចនាសម្ព័ន្ធនានា ដើម្បីជំរុញកំណើនសេដ្ឋកិច្ចសង្គមក្រោយវិបត្តិជំងឺកូវីដ១៩ផងដែរ។ ក្នុងនោះលោកអះអាងថា គម្រោងអភិវឌ្ឍន៍ហេដ្ឋារចនាសម្ព័ន្ធផ្លូវ៣៤ខ្សែនៅក្រុងព្រះសីហនុ ខេត្តព្រះសីហនុ គម្រោងអភិវឌ្ឍន៍ហេដ្ឋារចនាសម្ព័ន្ធ ផ្លូវ៣៨ខ្សែនៅក្រុងសៀមរាប ខេត្តសៀមរាប នឹងត្រូវបានអនុវត្តដើម្បីទទួលស្វាគមន៍ទេសចរ នៅពេលកម្ពុជាបើកប្រទេសឡើងវិញក្នុងពេលអនាគតដ៏ខ្លីខាងមុខ៕