.jpg)
ជនជាប់ចោទ ក្រោយសមត្ថកិច្ចឃាត់ខ្លួនជាមួយវត្ថុតាងគ្រឿងញៀន ។ រូបថត ហ្វេសប៊ុក
កំពង់ធំៈអយ្យការអមសាលាដំបូងខេត្តកំពង់ធំនៅថ្ងៃទី១៧តុលាបានចោទប្រកាន់អ្នកសារព័ត៌មានអនឡាញម្នាក់ពាក់ព័ន្ធនឹងបទជួញដូរនិងប្រើប្រាស់គ្រឿងញៀនជាង៣៣ក្រាមដែលត្រូវបានឃាត់ខ្លួននៅភូមិឥន្ទកុមារ ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ កាលពីថ្ងៃទី១៦តុលា។
លោកសាយ វាសនា អ្នកនាំពាក្យអយ្យការអមសាលាដំបូងខេត្តកំពង់ធំឱ្យដឹងនៅរសៀលថ្ងៃទី១៧តុលាថា ជនឈ្មោះ សេង ម៉ៅ ភេទប្រុស អាយុ ៤៤ឆ្នាំ ត្រូវបានតំណាងអយ្យការចោទប្រកាន់និងបញ្ជូនទៅចៅក្រមស៊ើបសួរដើម្បីបន្តនីតិវិធីនៅរសៀលថ្ងៃទី១៧តុលា។
លោកថ្លែងថា៖«រឿងនេះត្រូវបានលោកព្រះរាជអាជ្ញារង ពៅ សំបូរ ចោទបទជួញដូរ និងប្រើប្រាស់ដោយខុសច្បាប់នូវសារធាតុញៀន។ បទចោទនេះតាមមាត្រា៤០ និងមាត្រា៤៥ នៃច្បាប់ស្តីពីការត្រួតពិនិត្យគ្រឿងញៀន»។
លោក នៅ រិន ស្នងការរងនគរបាលខេត្តកំពង់ធំទទួលបន្ទុកប្រឆាំងបទល្មើសគ្រឿងញៀន ប្រាប់ភ្នំពេញប៉ុស្តិ៍នៅថ្ងៃទី១៧តុលាថា កាលពីថ្ងៃទី១៦តុលា មានប្រជាពលរដ្ឋនៅក្នុងភូមិឥន្ទកុមារ ឃុំកំពង់ស្វាយ បានរាយការណ៍ទៅនគរបាលប៉ុស្តិ៍ឃុំកំពង់ស្វាយថាមានបុរសម្នាក់គេសង្ស័យថា ជួញដូរគ្រឿងញៀននៅក្នុងភូមិរបស់ពួកគាត់។
លោកបន្តថា បន្ទាប់មកនគរបាលប៉ុស្តិ៍បានរាយការណ៍ទៅលោក កែ កញ្ចនា អធិការនគរបាលស្រុកកំពង់ស្វាយ ហើយលោកអធិការបានប្រាប់មកលោក។បន្ទាប់ពីទទួលបានព័ត៌មានមកលោកបានចាត់កម្លាំងចុះស្រាវជ្រាវចាប់ខ្លួនជនសង្ស័យបាននៅថ្ងៃទី១៦តុលា។
បើតាមលោក នៅ រិន «ជនសង្ស័យឆ្លើយថា គាត់ជាអ្នកសារព័ត៌មានសំឡេងប្រជាជន»។ លោកបញ្ជាក់ថា ចំពោះគ្រឿងញៀនប្រភេទមេតំហ្វេតាមីន ដែលដកហូតបាន ពីជនសង្ស័យមានចំនួន៥កញ្ចប់ស្មើទម្ងន់ ៣៣,៦៥ក្រាម។
ពាក់ព័ន្ធនឹងអ្នកសារព័ត៌មានជួញដូរគ្រឿងញៀននេះ លោក ផុស ផុសសុវណ្ណ អគ្គនាយក នៃអគ្គនាយកដ្ឋានព័ត៌មាន និងសោតទស្សន៍ ក្រសួងព័ត៌មាន ប្រាប់ភ្នំពេញប៉ុស្តិ៍នៅ ថ្ងៃទី១៧តុលាថា អង្គភាពសារព័ត៌មានឈ្មោះសំឡេងប្រជាជននេះលោកមិនទាន់ដឹងថា មានអាជ្ញាប័ណ្ណនៅក្រសួងព័ត៌មានឬអត់ទេ ដោយលោកត្រូវស្រាវជ្រាវមើលសិន។
ប៉ុន្តែលោក សុវណ្ណ បានបញ្ជាក់ថា៖ «យើងបានណែនាំច្រើនណាស់ទាំងផ្ទាល់ និងប្រយោល ទាក់ទងវិជ្ជាជីវៈ និងច្បាប់ផងដែរ តែអ្នកសារព័ត៌មានខ្លះនៅតែល្មើស»៕
