ភ្នំពេញៈ រយៈពេល ១ ឆ្នាំ គណៈមេធាវីកម្ពុជាបានការពារក្តីជូនជនក្រីក្រ ដោយឥតគិតថ្លៃជាង ៦ ០០០ នាក់ ខណៈលោក លី ច័ន្ទតុលា ប្រធានគណៈមេធាវីអះអាងថា ក្រុមមេធាវីស្ម័គ្រចិត្តនឹងបន្តពង្រីកការការពារក្តីជូនជនក្រីក្រ និងស្ត្រីដោយឥតគិតថ្លៃបន្ថែមទៀត ដើម្បីធានាការទទួលបានសិទ្ធិការពារក្តីតាមផ្លូវច្បាប់។
នៅថ្ងៃទី ១៥ ដល់ ថ្ងៃទី ១៨ តុលា គណៈមេធាវីកម្ពុជាប្រារព្ធកម្មវិធីមហាសន្និបាតគណៈមេធាវីកម្ពុជាលើកទី២៦ និងការបោះឆ្នោតជ្រើសតាំងសមាជិកក្រុមប្រឹក្សាគណៈមេធាវីអាណត្តិថ្មី ឆ្នាំ ២០២១ ដល់ឆ្នាំ ២០២៤ រយៈពេល ៣ ថ្ងៃ នាទីស្នាក់ការគណៈមេធាវីរាជធានីភ្នំពេញ។
ក្នុងឱកាសបើកមហាសន្និបាតនេះកាលពីថ្ងៃទី ១៦ ខែតុលា លោក លី ច័ន្ទតុលា បានថ្លែងថា បើទោះស្ថានភាពក្នុងពេលបច្ចុប្បន្នបានកំពុងជួបប្រទះនូវវិបត្តិជំងឺរាតត្បាត ប៉ុន្តែគណៈមេធាវីបានខិតខំពុះពារសម្រេចបាននូវគោលដៅសំខាន់ៗជាច្រើន។
លោកបានបន្តថា ក្នុងរយៈពេល ១ ឆ្នាំកន្លងមកនេះ គណៈមេធាវីបានចាត់តាំងមេធាវីឱ្យការពារក្តីជូនជនជាប់ចោទចំនួន ៤ ០៣៨ ករណី ដែលមានកូនក្តីសរុបចំនួន ៦ ៦៩២ នាក់ ដែលមានស្ត្រី ចំនួនជិត ៥០០ នាក់ និងមានកូនក្តីជាអនីតិជនចំនួន ១ ៥៤៨ នាក់។
លោក បន្ថែមថា ក្រៅពីផ្តល់ការការពារក្តី គណៈមេធាវីក៏បានផ្តល់ការពិគ្រោះយោបល់ផ្នែកច្បាប់ជូនជនក្រីក្រទូទៅ ដោយឥតគិតថ្លៃ ចំនួន ១១០ ករណីផងដែរ។
លោកបញ្ជាក់ថា៖ «យើងនៅតែពង្រឹង និងពង្រីកការបម្រើក្នុងវិស័យយុត្តិធម៌ ដើម្បីលើកស្ទួយសិទ្ធិមានមេធាវី យុត្តិធម៌នៅក្នុងសង្គម គណៈមេធាវី បានរៀបចំឱ្យមានជំនួយផ្នែកច្បាប់ ដល់ជនក្រីក្រ ដោយមិនគិតថ្លៃ។ ក្នុងឆ្នាំ ២០២២ ខាងមុខនេះ រាជរដ្ឋាភិបាលបានបង្កើនថវិកាសម្រាប់គម្រោងនេះ រហូតដល់ចំនួន ២ ៦០០ លានរៀល ដើម្បីធានាថាពលរដ្ឋទូទៅមានសិទ្ធិទទួលបានមេធាវីការពារក្តីស្របច្បាប់»។
ជាមួយគ្នានេះលោក លី ច័ន្ទតុលា ក៏បានអះអាងដែរថា ក្រៅពីការផ្តល់ការការពារក្តីដោយឥតគិតថ្លៃ តាមរយៈគម្រោងរបស់រដ្ឋាភិបាលក្នុងនោះក៏មានការពារក្តី និងផ្តល់ការពិគ្រោះផ្នែកច្បាប់ ក្នុងកម្មវិធីជាច្រើនទៀត ដែលត្រូវបានដំណើរការផងដែរ ខណៈមេធាវីស្ម័គ្រចិត្តកើនដល់ ២១៤ រូបហើយក្នុងម្នាក់ៗនឹងទទួលបានថវិកាឧបត្ថម្ភប្រមាណ ១,២ លានរៀល ក្នុង ១ សំណុំរឿង។
លោក សុក សំអឿន មេធាវីនៅការិយាល័យក្រុមប្រឹក្សាអ្នកច្បាប់ និងទីប្រឹក្សាអមរិន្ទ ថ្លែងថា លោកមិនអាចវាយតម្លៃបានទេថា ការផ្តល់មេធាវីការពារក្តីដល់ជនក្រីក្ររបស់គណៈមេធាវីមានលក្ខណៈល្អ ឬមិនល្អកម្រិតណា។ ប៉ុន្តែតាមការជួបប្រទះជាក់ស្តែងរបស់លោក គឺមើលឃើញថា ការផ្តល់មេធាវីការពារក្តីដោយឥតគិតថ្លៃនេះ គឺនៅមានចំណុចខ្វះខាត ដែលទាមទារឱ្យមានការតាមដានឱ្យបានច្បាស់លាស់ ជាពិសេស គឺការពង្រឹងការគ្រប់គ្រងឱ្យមានប្រសិទ្ធភាព។
លោកបានរៀបរាប់ថា៖ «ការផ្តល់នេះ គឺវាល្អហើយ ប៉ុន្តែមិនមែនគ្រាន់តែផ្តល់មេធាវីម្នាក់ ឈរនៅមុខសវនការនោះទេ គឺយើងត្រូវចូលរួមតាំងពីដំណាក់ការស៊ើបអង្កេតមកម្ល៉េះ ព្រោះបើមិនអាចធ្វើការស៊ើបអង្កេតច្បាស់លាស់អ៊ីចឹងអាចប៉ះពាល់ ដល់ទិដ្ឋភាពនៃការការពារក្តី។ ខ្ញុំគិតថា អាចមានការខ្វះខាត ព្រោះមេធាវីជួយជនក្រីក្រ ពេលខ្លះទៅតែពេលសវនការ ហើយមិនស្គាល់ទាំងកូនក្តីរបស់ខ្លួនទៀត»។
ក្រៅពីចំណុចលើកឡើងនេះ លោក សុក សំអឿន ក៏ចង់ឃើញការផ្តល់ប្រាក់ឧបត្ថម្ភដល់មេធាវីស្ម័គ្រចិត្តឱ្យបានច្រើនជាងនេះផងដែរ ដើម្បីធានាថា ថវិកាដែលបានផ្តល់ជូននេះ គឺអាចឱ្យមេធាវីនីមួយៗ បំពេញការងាររបស់ខ្លួនបានគ្រប់គ្រាន់ ហើយមិនមានការខ្វះខាត។
លោក លី ច័ន្ទតុលា បានឱ្យដឹងថា គិតត្រឹមខែឧសភា ឆ្នាំ ២០២១ គណៈមេធាវីកម្ពុជាមានមេធាវីសរុបចំនួន ២ ៣៨២ នាក់ក្នុងនោះ មេធាវីពេញសិទ្ធិកំពុងប្រកបវិជ្ជាជីវៈ ចំនួន ១ ៧៨៨ នាក់ មេធាវីសុំមិនប្រកបវិជ្ជាជីវៈចំនួន ១២៣ នាក់ មេធាវីកំពុងធ្វើកម្មសិក្សាចំនួន ៣៥៦ នាក់ និងមេធាវីក្រៅបញ្ជី មេធាវីលុបឈ្មោះ បានអនិច្ចកម្មជាដើមជាង ១០០ នាក់៕