ភ្នំពេញៈ នារីជាកម្មការិនីចំនួន ៣ នាក់ បានស្លាប់នៅកន្លែងកើតហេតុ និង ៣ នាក់របួសធ្ងន់ ដោយសារបុរសស្រវឹងស្រាម្នាក់បើករថយន្តបុករះនៅយប់ថ្ងៃទី ១៦ ខែតុលា នៅសង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ។
លោក ហេង សារិម នាយផ្នែកដោះស្រាយវិវាទគ្រោះថ្នាក់ចរាចរណ៍នៃស្នងការដ្ឋាននគរបាលរាជធានីភ្នំពេញប្រាប់ ភ្នំពេញ ប៉ុស្តិ៍ នៅថ្ងៃទី ១៧ តុលាថា នារីរងគ្រោះស្លាប់ទី១- ឈ្មោះ សាន ផល្លី ភេទស្រី អាយុ ២៤ ឆ្នាំ ទី២- ឈ្មោះ គ្រី ស្រីនាង ភេទស្រី អាយុ ២០ ឆ្នាំ (ពួកគេជាកម្មការិនីរោងចក្រកាត់ដេរ) និងនារីម្នាក់ទៀតសមត្ថកិច្ចកំពុងស្រាវជ្រាវរកក្រុមគ្រួសារ ដើម្បីបញ្ជាក់ពីអត្តសញ្ញាណ។
ចំពោះអ្នករងរបួស សមត្ថកិច្ចនៅមិនទាន់កំណត់អត្តសញ្ញាណបាននៅឡើយទេ ព្រោះពេលកើតហេតុភ្លាមៗត្រូវបានសមត្ថកិច្ចដឹកទៅមន្ទីរពេទ្យដើម្បីសង្គ្រោះបន្ទាន់។ ចំណែកជនសង្ស័យបង្កហេតុ ដែលជាម្ចាស់រថយន្ត ឈ្មោះ ហៃ សុចិត្រា ភេទប្រុស អាយុ ៣៤ ឆ្នាំគ្មានមុខរបរអ្វីទេ។
លោកថ្លែងថា៖ «ករណីនេះជនសង្ស័យស្រវឹងស្រា បើកបុករះជនរងគ្រោះតែម្តង។ ជនសង្ស័យគ្មានបើកវ៉ាជែងនរណាទេ»។ លោកបញ្ជាក់ថា ជនសង្ស័យដែលជាអ្នកបង្កហេតុ ត្រូវបានសមត្ថកិច្ចជំនាញរបស់លោកបញ្ជូនទៅសាលាដំបូងនៅរសៀលថ្ងៃទី ១៧ តុលា ដើម្បីចាត់ការតាមនីតិវិធីច្បាប់។
លោក សាយ ចំរើន នាយនគរបាលប៉ុស្តិ៍សង្កាត់ចោមចៅ ១ ឱ្យដឹងនៅថ្ងៃទី ១៧ តុលា តាមសាក្សីនៅកន្លែងកើតហេតុថា នៅវេលាយប់ថ្ងៃទី ១៦ តុលា មុនកើតហេតុ គេបានឃើញរថយន្ត ១ គ្រឿងពណ៌ខ្មៅ ម៉ាកធុនត្រា ពាក់ស្លាកលេខភ្នំពេញ 2A-7060 បើកបរដោយបុរសម្នាក់តាមបណ្តោយផ្លូវវេងស្រេងក្នុងទឹកដីសង្កាត់ចោមចៅ ១ ពីទិសខាងកើត ទៅទិសខាងលិច ក្នុងល្បឿនយ៉ាងលឿន។ លុះបើក ដល់ចំណុចកើតហេតុស្រាប់តែរថយន្តបង្កហេតុបុករះរទេះលក់សាច់អាំងនៅតាមចិញ្ចើមផ្លូវបណ្តាលឱ្យស្ត្រីអ្នកដំណើរ ៣ នាក់ ស្លាប់នៅកន្លែងកើតហេតុ។ រីឯមនុស្ស ៣ នាក់ទៀតរបួសធ្ងន់ហើយត្រូវបានសមត្ថកិច្ចហៅរថយន្តសង្គ្រោះបន្ទាន់ដឹកទៅមន្ទីរពេទ្យ។
លោកបញ្ជាក់ថា ភ្លាមៗនោះប្រជាពលរដ្ឋបានទូរស័ព្ទរាយការណ៍ប្រាប់សមត្ថកិច្ចប៉ុស្តិ៍នគរបាលរបស់លោក ហើយលោកបានដឹកនាំកម្លាំងចុះដល់កន្លែងកើតហេតុ ក្រោយពីទទួលបានព័ត៌មានប៉ុន្មាននាទី។
លោកប្រាប់ថា៖ «កម្លាំងយើងគ្រាន់តែសហការ ដើម្បីជួយអន្តរាគមន៍ប៉ុណ្ណោះ។ ចំពោះនីតិវិធីដោះស្រាយ គឺយើងប្រគល់ការងារនេះឱ្យខាងជំនាញចរាចរណ៍រាជធានីភ្នំពេញ»៕