.jpg)
ជនសង្ស័យលួចលុយព្រះចៅអធិការ ក្រោយសមត្ថកិច្ចចាប់ខ្លួនបាន។ រូបថត ប៉ូលិស
កំពង់ឆ្នាំងៈ នគរបាលព្រហ្មទណ្ឌខេត្តកំពង់ឆ្នាំង បានបញ្ជូនជនសង្ស័យម្នាក់ទៅតុលាការខេត្តនៅថ្ងៃទី ១៨ តុលា ករណីលួចលុយចៅអធិការវត្តអស់ ២៥ លានរៀល ប្រព្រឹត្តនៅវត្តសំប៉ាន ស្ថិតក្នុងឃុំចោងម៉ោង ស្រុកទឹកផុស។
លោក ពេជ្រ សុខឿន នាយការិយាល័យព្រហ្មទណ្ឌកម្រិតធ្ងន់ ខេត្តកំពង់ឆ្នាំងឱ្យដឹងនៅថ្ងៃទី ១៨ តុលាថា ជនសង្ស័យឈ្មោះ ស៊ូ គីមហ៊ុល ភេទប្រុសអាយុ ៣៥ ឆ្នាំ ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្តកំពង់ឆ្នាំង នៅថ្ងៃទី ១៨ តុលាហើយ។
លោកប្រាប់ថា៖ «ខ្ញុំចោទបឋមពាក់ព័ន្ធបទលួចមានស្ថានទម្ងន់ទោស»។ លោក សុខឿន ប្រាប់ថា កាលពីថ្ងៃទី ២០ ខែ កញ្ញា ឆ្នាំ ២០២១ លោកបានទទួលពាក្យបណ្តឹងពីគណៈកម្មការវត្តសំប៉ានដោយចោទបុរសឈ្មោះ ស៊ូ គីមហ៊ុល រស់នៅភូមិកូរដ្ឋាន ឃុំទឹកថ្លា ស្រុកសិរីសោភ័ណថា បានលួចលុយព្រះចៅអធិការវត្តសំប៉ាន ព្រះនាមញ៉េប សារ៉ុម ចំនួន ២៥ លានរៀល។
លោកបន្តថា បើតាមពាក្យបណ្តឹងរៀបរាប់ថា នៅវេលាថ្ងៃត្រង់ ខណៈពេលព្រះចៅអធិការវត្តនិមន្តទៅឆាន់ចង្ហាន់ថ្ងៃត្រង់នៅថ្ងៃទី ២០ កញ្ញា ហើយបានចាក់សោទ្វារកុដិត្រឹមត្រូវ។ លុះព្រះចៅអធិការវត្តនិមន្តត្រឡប់មកវិញក៏ឃើញមានរបើកទ្វារហើយបាត់លុយចំនួន ១៥ លានរៀល។
បើតាមពាក្យបណ្តឹង ករណីបាត់លុយនេះមិនមែនទើបបាត់លើកទី១ ទេ នៅថ្ងៃទី ១១ ខែ មិថុនា ឆ្នាំ ២០២១ ក៏បានលួចលុយអស់ចំនួន ១០ លានរៀលដែរ។ លុះលើកទី២នៅថ្ងៃទី២០ខែកញ្ញាឆ្នាំ២០២១បាត់លុយអស់ ១៥ លានរៀលទៀត។
បន្ទាប់ពីសមត្ថកិច្ចរបស់លោកទទួលបណ្តឹងមកក៏ចាប់ផ្តើមស្រាវជ្រាវដោយចុះពិនិត្យដល់វត្ត។ ក្នុងការពិនិត្យនោះសមត្ថកិច្ចជំនាញបានរកឃើញថា នៅត្រង់ទ្វារចូលកុដិមានស្នាមគាស់ទម្លុះទម្លាយទ្វារកុដិ។
លោក សុខឿន បានបញ្ជាក់ថា ជុំវិញការស្រាវជ្រាវបទល្មើសនេះដែរ គឺលោកបានឆែកតាមកាមេរ៉ាសុវត្ថិភាពដែលបានបំពាក់នៅក្នុងបរិវេណវត្តក៏ឃើញមុខរបស់ជនសង្ស័យឈ្មោះ ស៊ូ គីមហ៊ុល នេះ។ បន្ទាប់ពីចំណាយពេលច្រើនថ្ងៃកម្លាំងសមត្ថកិច្ចជំនាញព្រហ្មទណ្ឌខេត្តកំពង់ឆ្នាំងបានស្រាវជ្រាវដឹងថា ជនសង្ស័យមានស្រុកកំណើតនៅភូមិកូរដ្ឋាន ឃុំទឹកថ្លា ស្រុកសិរីសោភ័ណ។
លោកបានបញ្ជាក់ថា ក្រោយស៊ើបដឹងពីទីកន្លែងរស់នៅរបស់ជនសង្ស័យមក គឺសមត្ថកិច្ចរបស់លោកបានសុំសហការជាមួយនគរបាលខេត្តបន្ទាយមានជ័យដើម្បីចុះឃាត់ខ្លួនជនសង្ស័យបាននៅថ្ងៃទី ១៧ តុលា។ លោក សុខឿន ថា៖ «ជនល្មើសនេះធ្លាប់ជាប់គុក ២ លើកមកហើយក្នុងបទល្មើសលួចនេះ»៕
