.jpg)
អភិបាលខេត្តរតនគិរី លោក ញ៉ែម សំអឿន ក្នុងកិច្ចប្រជុំ ១ នៅថ្ងៃទី ១៨ តុលា។ រូបថត Nhem Sam Oeun's FB
រតនគិរីៈ អភិបាលខេត្តរតនគិរី លោក ញ៉ែម សំអឿន ដាក់ចេញយុទ្ធនាការសម្អាតបរិស្ថានជាអាទិភាព ដើម្បីលើកកម្ពស់សោភណភាពខេត្ត ដោយបានកំណត់យកថ្ងៃសុក្ររៀងរាល់សប្ដាហ៍ឱ្យមន្ដ្រីរាជការធ្វើយុទ្ធនាការនេះ ដើម្បីបំផុសស្មារតីឱ្យពលរដ្ឋចូលរួមថែរក្សាបរិស្ថានផង និងធ្វើឱ្យក្រុងស្រុកទាំងអស់ក្លាយជាគោលដៅទេសចរណ៍បៃតង។
លោក ញ៉ែម សំអឿន បានដាក់ចេញនូវយុទ្ធនាការនេះ នៅពេលជួបប្រជុំសំណេះសំណាលជាមួយមន្ដ្រីរាជការជាថ្នាក់ដឹកនាំនៃរដ្ឋបាលក្រុងស្រុក និងមន្ទីរអង្គភាពជុំវិញខេត្តនៅសាលប្រជុំសាលាខេត្ត នាព្រឹកថ្ងៃទី ១៨ ខែតុលា។ លោកអភិបាលខេត្ដបានចាត់ទុកការធ្វើអនាម័យសម្អាតបរិស្ថានជាអាទិភាពក្នុងការលើកកម្ពស់សោភណភាពខេត្ត។
លោកថ្លែងថា៖ «បញ្ហាសំរាមជាបញ្ហាដែលយើងទាំងអស់គ្នាត្រូវតែយកចិត្តទុកដាក់លើកកម្ពស់សោភណភាព បរិស្ថានល្អ ភាពស្អាត អនាម័យល្អ និងសណ្តាប់ធ្នាប់ល្អក្នុងខេត្តរតនគិរី សំដៅធ្វើឱ្យទីក្រុង និងតាមបណ្តាស្រុកទាំងអស់របស់ខេត្តក្លាយជាគោលដៅទេសចរណ៍បៃតងស្របតាមយុទ្ធសាស្ត្រអភិវឌ្ឍន៍នានារបស់រាជរដ្ឋាភិបាលដែលបានដាក់ចេញ។ ដូច្នេះនៅថ្ងៃសុក្រ រៀងរាល់សប្តាហ៍ មន្ដ្រីរាជការ កងកម្លាំងប្រដាប់អាវុធទាំង ៣ ប្រភេទត្រូវធ្វើអនាម័យសម្អាតតាមអង្គភាព និងតាមទីប្រជុំជន ទីសាធារណៈនានាដើម្បីធ្វើជាគំរូដល់ប្រជាពលរដ្ឋ»។
លោកអភិបាលខេត្តក៏បានណែនាំឱ្យមន្ទីរព័ត៌មានសហការជាមួយមន្ទីរពាក់ព័ន្ធក្នុងខេត្ត បន្ដផលិត និងផ្សព្វផ្សាយព័ត៌មាន ពាក់ព័ន្ធនឹងសក្ដានុពលរបស់វិស័យទេសចរណ៍ និងកសិកម្មនៅក្នុងខេត្ដឱ្យបានទូលំទូលាយ ដើម្បីឱ្យភ្ញៀវទេសចរបានដឹងបានស្គាល់កាន់តែច្បាស់អំពីភូមិសាស្ដ្រ តំបន់ទេសចរណ៍ក្នុងខេត្តរតនគិរី ហើយមកលេងកម្សាន្ដ នៅពេលរាជរដ្ឋាភិបាលប្រកាសបើកឱ្យមានដំណើរការសេដ្ឋកិច្ចសង្គមធម្មតាឡើងវិញ។
អ្នកនាំពាក្យរដ្ឋបាលខេត្ដរតនគិរី លោក កុល ផាន់ណា ថ្លែងនាថ្ងៃទី ១៨ តុលាថា ការដែលលោកអភិបាលខេត្ដជ្រើសរើសយកថ្ងៃសុក្រ ចុងសប្តាហ៍ គឺដើម្បីឱ្យមន្ទីរ អង្គភាពទាំងអស់សម្អាតនៅបរិវេណរបស់ខ្លួនផង និងដកកម្លាំងមន្ដ្រីមួយចំនួនទៅសម្អាតនៅតាមក្រុង ស្រុកផងដែរ។
លោកថ្លែងថា៖ «សកម្មភាពនេះ គឺជាយុទ្ធនាការមួយដើម្បីឱ្យប្រជាពលរដ្ឋទាំងអស់ចូលរួម សម្អាតទីក្រុងទាំងអស់គ្នា ដោយផ្ដើមចេញពីមន្ដ្រីរាជការធ្វើជាគំរូរបស់ប្រជាពលរដ្ឋ»។
លោក ផាន់ណា លើកឡើងថា ការដាក់ចេញនូវយុទ្ធនាការនេះ គឺដើម្បីផ្សារភ្ជាប់ទៅនឹងគោលនយោបាយរបស់រាជរដ្ឋាភិបាលផង និងដើម្បីត្រៀមលក្ខណៈទទួលភ្ញៀវទេសចរមកលេងកម្សាន្តផង នៅពេលរដ្ឋាភិបាលប្រកាសបើកដំណើរការសេដ្ឋកិច្ចសង្គមឡើងវិញនាពេលខាងមុខនេះ។
លោកថ្លែងថា៖ «ជាយុទ្ធសាស្ដ្ររបស់ឯកឧត្ដមអភិបាលខេត្ដថ្មី លោកយល់ឃើញថា ក្នុងខេត្ដរតនគិរី គឺជាខេត្ដមួយដែលមានសក្តានុពលលើវិស័យទេសចរណ៍។ ដូច្នេះ លោកចង់បំផុសចលនាពីឥឡូវទៅដើម្បីត្រៀមខ្លួនរៀបចំសោភណភាព ទីក្រុងស្អាត ដោយផ្ដើមចេញពីមន្ដ្រីរាជការ»។
លោកបន្តថា ជាមហិច្ឆតារបស់លោកអភិបាលខេត្ដ ក្នុងអាណត្ដិដែលដឹកនាំនេះ គឺចង់ឃើញខេត្ដរតនគិរីមានភ្ញៀវទេសចរមកលេងកម្សាន្តច្រើន និងចង់អភិវឌ្ឍសោភណភាពទីក្រុង អភិវឌ្ឍវិស័យសណ្ឋាគារឱ្យដល់លំដាប់ផ្កាយ ៥ ឱ្យមាននៅក្នុងខេត្ដរតនគិរី។
បើតាមរដ្ឋបាលខេត្ដ ខេត្តរតនគិរីស្ថិតនៅភាគឦសាននៃប្រទេសកម្ពុជា។ ខេត្ដនេះត្រូវបានបង្កើតឡើង នាថ្ងៃទី ១៧ ខែកុម្ភៈ ឆ្នាំ ១៩៥៩ ក្នុងរជ្ជកាលសម្តេចព្រះនរោត្តម សុរាម្រិត ដែលត្រូវបានកាត់ចេញពីខេត្តស្ទឹងត្រែង និងមានចម្ងាយពីរាជធានីភ្នំពេញ ៥៨៨ គីឡូម៉ែត្រ មានព្រំប្រទល់ខាងលិចជាប់នឹងខេត្តស្ទឹងត្រែង។ ខាងកើតជាប់នឹងខេត្តយ៉ាឡាយ និងខេត្តកន្ទូមនៃសាធារណរដ្ឋសង្គមនិយមវៀតណាមប្រវែង ២១០ គីឡូម៉ែត្រ។ ខាងជើងជាប់នឹងខេត្តអត្តពឺនៃសាធារណរដ្ឋប្រជាធិបតេយ្យប្រជាមានិតឡាវ ប្រវែង ១៦៥ គីឡូម៉ែត្រ និងខាងត្បូងជាប់នឹងខេត្តមណ្ឌលគិរី។
ខេត្ដនេះមានភូមិសាស្ត្រជាតំបន់ខ្ពង់រាប សម្បូរភ្នំ ជ្រោះជ្រលងដងអូរ និងព្រៃឈើគ្រប់ប្រភេទ ហើយមានទន្លេឆ្លងកាត់ចំនួន ២ គឺទន្លេសេសាន និងទន្លេស្រែពក។ ខេត្តរតនគិរីមានផ្ទៃដីសរុប ១០ ៧៨២ គីឡូម៉ែត្រក្រឡា។ រដ្ឋបាលដែនដីត្រូវបានចែកជា ១ ក្រុង និង ៨ ស្រុក ៤៦ ឃុំ ៤ សង្កាត់ និង ២៤៣ ភូមិ។ បច្ចុប្បន្នខេត្តមានប្រជាជនសរុបប្រមាណជាង ២ សែននាក់ មានគ្រួសារសរុបជាង ៤,៩ ម៉ឺនគ្រួសារ។ ដង់ស៊ីតេប្រជាពលរដ្ឋ ១៩ នាក់/គីឡូម៉ែត្រ និងមានជនជាតិដើមភាគតិច ៨ អម្បូរ ស្មើនឹង ១២២ ៨០១ នាក់ ស្មើនឹងប្រមាណជាង ៥៨% នៃប្រជាជនសរុបទូទាំងខេត្ដ។
រមណីយដ្ឋានទេសចរណ៍ក្នុងខេត្តសរុបមានចំនួន ១៤ កន្លែងក្នុងនោះរមណីយដ្ឋានធម្មជាតិចំនួន ១២ កន្លែង និងរមណីយដ្ឋានវប្បធម៌ធម្មជាតិចំនួន ២ កន្លែង រមណីយដ្ឋានទេសចរណ៍ធម្មជាតិចំនួន ៨ កន្លែងគ្រប់គ្រងដោយសហគមន៍ជនជាតិដើមភាគតិច។ សេវាកម្មស្នាក់នៅសរុបចំនួន ៥០ កន្លែង ស្មើនឹង ១ ១២៩ បន្ទប់ ក្នុងនោះមានសណ្ឋាគារ ចំនួន ១៤ កន្លែង ស្មើនឹង ៦២៥ បន្ទប់ និងផ្ទះសំណាក់ចំនួន ៣៦ កន្លែង គឺស្មើនឹង ៥០៤ បន្ទប់ មានភោជនីយដ្ឋានចំនួន ១៤ កន្លែង អាហារដ្ឋានចំនួន ២៥ កន្លែង និងកន្លែងលក់វត្ថុអនុស្សាវរីយ៍សរុបមានចំនួន ១៩ កន្លែង៕
