ស្វាយរៀងៈ បុរស ២ នាក់ក្នុងនោះជនជាតិវៀតណាមម្នាក់ត្រូវបានតុលាការចោទប្រកាន់ និងឃុំខ្លួនក្នុងពន្ធនាគារ នាថ្ងៃទី ១៧ តុលា ពីបទជួញដូរគ្រឿងញៀនជិត ២០ គីឡូក្រាម ក្រោយពីសមត្ថកិច្ចខេត្តស្វាយរៀងបង្ក្រាបបាន ខណៈពួកគេកំពុងបម្រុងដឹកជញ្ជូនឆ្លងដែនទៅវៀតណាម នៅចំណុចផ្លូវបេតុង ស្ថិតក្នុងភូមិតាបឹប សង្កាត់បាវិត ក្រុងបាវិត។
លោក ទេព ផល្លា ប្រធានលេខាធិការដ្ឋាន និងជាអ្នកនាំពាក្យសាលាដំបូងខេត្តស្វាយរៀងបានប្រាប់ ភ្នំពេញ ប៉ុស្ដិ៍ នៅថ្ងៃទី ១៨ តុលា ថា ក្រោយពីសមត្ថកិច្ចខេត្ដស្វាយរៀងបង្ក្រាបករណីជួញដូរគ្រឿងញៀនជិត ២០ គីឡូក្រាម ដែលជនសង្ស័យបម្រុងដឹកឆ្លងដែនទៅប្រទេសវៀតណាម កាលពីថ្ងៃទី ១៣ ខែតុលា នៅថ្ងៃដដែលនោះ សមត្ថកិច្ចបានកសាងសំណុំរឿងបញ្ជូនជនសង្ស័យទាំង ២ នាក់មកសាលាដំបូង ដើម្បីបន្តអនុវត្ដតាមនីតិវិធី។
លោកថ្លែងថា៖ «យើងបានបញ្ជូនពួកគេទាំង ២ នាក់ទៅឃុំខ្លួនកាលពីម្សិលមិញ [ថ្ងៃទី ១៧ តុលា]។ យើងបានចោទប្រកាន់ពាក់ព័ន្ធនឹងបទល្មើសជួញដូរ និងការកាន់កាប់អាវុធដោយគ្មានច្បាប់អនុញ្ញាតមាន ២ បទចោទនេះ»។
តាមរបាយការណ៍របស់ស្នងការដ្ឋាននគរបាលខេត្ដស្វាយរៀងចេញផ្សាយនៅថ្ងៃទី ១៨ ខែតុលា បានឱ្យដឹងថា កាលពីថ្ងៃទី ១៣ ខែតុលា នៅវេលាម៉ោង ១៩ និង ៣០ នាទីនៅចំណុចផ្លូវបេតុង ស្ថិតក្នុងភូមិតាបឹប សង្កាត់បាវិត ក្រុងបាវិត ខេត្តស្វាយរៀង កម្លាំងនគរបាលនៃអធិការដ្ឋាននគរបាលក្រុងបាវិត ដឹកនាំដោយលោក អែម សុវណ្ណារិទ្ធិ អធិការនគរបាលក្រុងបាវិតសហការជាមួយកម្លាំងជំនាញការិយាល័យប្រឆាំងគ្រឿងញៀនខេត្តស្វាយរៀង បានបើកប្រតិបត្តិការស្រាវជ្រាវបង្ក្រាប ករណីជួញដូរ ដឹកជញ្ជូនគ្រឿងញៀនឆ្លងដែន ១ ករណី ដោយបានឃាត់ខ្លួនជនសង្ស័យចំនួន ២ នាក់។
ជនសង្ស័យទាំង ២ នាក់នោះ ឈ្មោះ ឡេ វ៉ាន់ថ អាយុ ១៨ ឆ្នាំ ភេទប្រុសជនជាតិវៀតណាម មុខរបរជាងឈើរស់នៅភូមិដើមស្លែង សង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ។ ម្នាក់ទៀត ឈ្មោះ វ៉ាន់ សុផា អាយុ ២០ ឆ្នាំ ភេទប្រុស ជនជាតិខ្មែរ មុខរបរជាងឈើរស់នៅភូមិដើមស្លែង សង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ។ របាយការណ៍បញ្ជាក់ថា ពួកគេជាអ្នកដឹកជញ្ជូនគ្រឿងញៀនពីរាជធានីភ្នំពេញឆ្លងដែនទៅកាន់ប្រទេសវៀតណាម។
បើតាមរបាយការណ៍ វត្ថុតាងដែលសមត្ថកិច្ចនគរបាលចាប់យកបានរួមមានថ្នាំញៀនប្រភេទហេរ៉ូអ៊ីនទម្ងន់ ៣ ៥០២ ក្រាម ថ្នាំញៀនប្រភេទមេតំហ្វេតាមីនទម្ងន់ ២ ៩៨៦ ក្រាម ថ្នាំញៀនប្រភេទកេតាមីនទម្ងន់ ១៣ ០០០ ក្រាម (សរុបមានទម្ងន់ ១៩ ៤៨៨ គីឡូក្រាម)។ ក្រៅពីនេះកងកម្លាំងសមត្ថកិច្ចបានឆែករកឃើញជនសង្ស័យមានប្រើប្រាស់អាវុធខ្លីម៉ាក K54 ចំនួន ១ ដើម បង់ ១ និងមានគ្រាប់ចំនួន ៨ គ្រាប់ ម៉ូតូ ១ គ្រឿង និងកាបូបធំសម្រាប់ដាក់គ្រឿងញៀនចំនួន ១។
លោក អែម សុវណ្ណារិទ្ធិ អធិការនគរបាលក្រុងបាវិតថ្លែងនៅថ្ងៃទី ១៨ តុលាថា ក្រោយបង្ក្រាបជនសង្ស័យ សមត្ថកិច្ចបានកសាងសំណុំរឿងបញ្ជូនទៅសាលាដំបូង ដើម្បីអនុវត្ដនីតិវិធីបន្ត។ ដូច្នេះទាក់ទងនឹងការបន្តស៊ើបអង្កេតអ្នកពាក់ព័ន្ធនឹងករណីនេះ គឺមិនស្ថិតក្នុងនីតិវិធីរបស់លោកទៀតទេ។ ប៉ុន្ដែលោក កឹង ឃន ស្នងការនគរបាលខេត្តស្វាយរៀងបានបិទទូរស័ព្ទ ពេលទាក់ទងកាលពីថ្ងៃទី ១៨ ខែតុលា។
លោកអធិការថ្លែងថា៖ «ក្រោយការបង្ក្រាបបាន យើងបានបញ្ជូនទៅតុលាការហើយ កាលពីថ្ងៃទី ១៣ ខែតុលា។ ពាក់ព័ន្ធនឹងការស៊ើបអង្កេតបន្តរឿងនេះគឺស្ថិតនៅលើជំនាញបន្តទៀតនៅខាងខេត្ដ ព្រោះករណីបង្ក្រាបយើងបានបញ្ជូនទៅរួចហើយ»៕