.jpg)
នគរបាលបង្ហាញខ្លួនជនសង្ស័យ ឆក់កាបូប និងប្លន់។ រូបថត នគរបាល
កំពតៈ តំណាងអយ្យការអមសាលាដំបូងខេត្តកំពតនៅថ្ងៃទី ១៨ តុលា កំពុងតែបន្តការសាកសួរជនប្រុស-ស្រី ៩ នាក់ ពាក់ព័ន្ធសកម្មភាពឆក់កាបូប និងប្លន់ម៉ូតូអ្នកដំណើរដែលត្រូវបានសមត្ថកិច្ចឃាត់ខ្លួននៅស្រុកដងទង់ខេត្តកំពតកាលពីថ្ងៃទី ១៥ ខែតុលា។
លោក ខា ដែនណា អ្នកនាំពាក្យអយ្យការអមសាលាដំបូងខេត្តកំពតប្រាប់ ភ្នំពេញ ប៉ុស្តិ៍ នៅថ្ងៃទី ១៨ ខែតុលាថា៖ «ករណីនេះតំណាងអយ្យការកំពុងសាកសួរពួកគេបន្តមុននឹងបញ្ជូនទៅចៅក្រមស៊ើបសួរ ប៉ុន្តែនីតិវិធីនៃការចោទប្រកាន់យ៉ាងណានោះខ្ញុំនៅមិនទាន់ដឹងទេ»។
ពាក់ព័ន្ធករណីនេះដែរលោក ឈឹម ឈាង នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តកំពតបានប្រាប់ ភ្នំពេញ ប៉ុស្តិ៍ នៅថ្ងៃទី ១៨ ខែតុលាថា ជនសង្ស័យទាំង ៩ នាក់នោះ មានអាយុចន្លោះពី ១៦ ឆ្នាំ ដល់ ២១ ឆ្នាំ។ ក្នុងនោះស្រីជនសង្ស័យ ២ នាក់ ឈ្មោះ សេង ស្រីលីន អាយុ ១៦ ឆ្នាំ និងម្នាក់ទៀតឈ្មោះ សុទ្ធ ស្រីរ៉ាត់ អាយុ ១៨ ឆ្នាំ។ ពួកគេរស់នៅភូមិសែនសុខ ២ សង្កាត់ឃ្មួញ ខណ្ឌសែនសុខ រាជធានីភ្នំពេញ។
លោកបន្តថា៖ «ក្រុមជនសង្ស័យទាំងនេះត្រូវសមត្ថកិច្ចរបស់ខ្ញុំបញ្ជូនទៅតុលាការតាំងពីថ្ងៃទី ១៥ ខែតុលា។ តែមកដល់ (ថ្ងៃទី ១៨ តុលា តុលាការ) លោក សួរមិនទាន់អស់គ្នាអ៊ីចឹងលោកបន្តសួរទៀត»។
លោកបានរំឭកប្រាប់ថា ក្រុមជនសង្ស័យសុទ្ធតែរស់នៅរាជធានីភ្នំពេញហើយពួកគេបាននាំគ្នាជិះម៉ូតូចំនួន ៥ គ្រឿងទៅខេត្តកំពត។ ក្រុមជនសង្ស័យបានបន្លំធ្វើជាភ្ញៀវទេសចរចូលលេងកម្សាន្តក្នុងខេត្តកំពតរាល់ការធ្វើដំណើររបស់ក្រុមជនល្មើសទាំងនេះមកខេត្តកំពតតែងធ្វើដំណើរពេលយប់ ឬពាក់កណ្តាលយប់ ហើយកាលពីថ្ងៃទី ២៨ ខែ កញ្ញា ឆ្នាំ ២០២១ វេលាម៉ោង ៤ ទៀបភ្លឺក្រុមជនសង្ស័យបានធ្វើសកម្មភាពធាក់ប្លន់យកម៉ូតូ ១ គ្រឿង ម៉ាកសេ ១២៥ ពីអ្នកដំណើរម្នាក់នៅក្នុងភូមិសាស្ត្រស្រុកដងទង់ ខេត្តកំពត។
នៅយប់ថ្ងៃទី ៩ ខែ តុលា ឆ្នាំ ២០២១ ក្រុមសង្ស័យបានប្លន់ម៉ូតូសេ ១២៥ ឆ្នាំ ១ គ្រឿងទៀត នៅក្នុងភូមិសាស្ត្រស្រុកដងទង់ដដែល នៅថ្ងៃបន្ទាប់មានបុរសរងគ្រោះម្នាក់បានប្តឹងមកសមត្ថកិច្ចព្រហ្មទណ្ឌ ដោយប្រាប់ពីភិនភាគក្រុមជនសង្ស័យ។ បន្ទាប់ពីបានទទួលពាក្យបណ្តឹងមកសមត្ថកិច្ច បានរាយកម្លាំងនៅចំណុចដែលក្រុមជនសង្ស័យតែងធ្វើសកម្មភាពប្លន់។
លុះនៅវេលាម៉ោងប្រមាណជា ៣ ទៅ ៤ ទៀបភ្លឺ ថ្ងៃទី ១៣ តុលា ស្រាប់តែក្រុមជនសង្ស័យនាំគ្នាជិះម៉ូតូ ៥ គ្រឿងពីរាជធានីភ្នំពេញមកខេត្តកំពតទៀត ដោយឃើញភិនភាគ និងសង្ស័យថាជាក្រុមចោរដូចដែលជនរងគ្រោះបានប្តឹងនោះកម្លាំងសមត្ថកិច្ចបានហៅឱ្យឈប់នៅក្នុងភូមិសាស្ត្រឃុំល្អាងក្នុងស្រុកដងទង់ ខេត្តកំពត។
លោក ឈឹម ឈាង ថ្លែងថា៖ «នៅយប់នោះយើងចាប់ក្រុមជនសង្ស័យបាន ៦ នាក់ និងតាមចាប់នៅភ្នំពេញបាន ៣ នាក់ទៀត»៕
វីដេអូ៖
