កណ្ដាលៈ ចៅក្រមស៊ើបសួរនៃតុលាការខេត្តកណ្ដាល កាលពីថ្ងៃទី ១៨ ខែតុលា បានសម្រេចចោទប្រកាន់បុរសវ័យ ៣៨ ឆ្នាំម្នាក់ ឈ្មោះ ស្រេង តាយ ពីបទឃាតកម្មគិតទុកជាមុន ហើយបានបញ្ជូនឃុំខ្លួនក្នុងពន្ធនាគារខេត្តជាបណ្ដោះអាសន្ន មុនជម្រះក្ដី។
លោក សូ សារិន អ្នកនាំពាក្យតុលាការខេត្តកណ្តាលប្រាប់នៅរសៀលថ្ងៃទី ១៩ តុលា បានឱ្យដឹងថា ឈ្មោះ ស្រេង តាយ ភេទប្រុស អាយុ ៣៨ ឆ្នាំ។
លោក សារិន ប្រាប់ថា៖ «លោកចៅក្រមស៊ើបសួរ ថោង ផល្លារង្សី បានចេញដីកាឃុំតាមការចោទរបស់តំណាងអយ្យការពីបទឃាតកម្មគិតទុកជាមុន។ បទចោទនេះតាមមាត្រា ២០០ នៃក្រមព្រហ្មទណ្ឌ»។
ពាក់ព័ន្ធបទចោទឃាតកម្មគិតទុកជាមុនតាមមាត្រា ២០០ នៃក្រមព្រហ្មទណ្ឌនេះបានចែងពីទណ្ឌកម្មទោស គឺត្រូវដាក់ពន្ធនាគារអស់មួយជីវិត។ នេះប្រសិនបើតុលាការរកឃើញថា ជនត្រូវចោទពិតជាបានប្រព្រឹត្តដូចការចោទប្រកាន់របស់តំណាងអយ្យការមែន។
ពាក់ព័ន្ធដំណើររឿងនៃអំពើឃាតកម្មនេះត្រូវបានលោក ទូច អ៊ីណាន មេបញ្ជាការរងកងរាជអាវុធហត្ថខេត្តកណ្តាលប្រាប់នៅរសៀលថ្ងៃទី ១៩ តុលាថា ជនរងគ្រោះឈ្មោះ ង្វៀង ដាងជុង ភេទប្រុស អាយុ ៤០ ឆ្នាំ ជាជនជាតិវៀតណាម មានរបរជាអ្នកម៉ៅការសំណង់រស់នៅភូមិ ៦ ឃុំ ព្រែកខ្សាយ (ខ) ស្រុកពាមរក៍ ខេត្តព្រៃវែង។ ជនរងគ្រោះស្នាក់នៅបណ្តោះអាសន្ននៅរាជធានីភ្នំពេញ។
កាលពីថ្ងៃទី ១៤ ខែតុលា ឆ្នាំ ២០២១ ប្រជាពលរដ្ឋបានប្រទះឃើញជនរងគ្រោះស្លាប់ដោយនៅលើខ្លួនមានស្នាមចាក់លើទ្រូង និងខ្នងផង។ ការសម្លាប់នេះ កើតឡើងនៅយប់ថ្ងៃទី ១៣ តុលា ស្ថិតក្នុងភូមិអំពិលទឹក ឃុំសំបួរមាស ស្រុកមុខកំពូល។ នៅថ្ងៃទី ១៤ តុលាដដែលនោះ ក្រោយប្រទះឃើញសាកសពជនរងគ្រោះប្រជាពលរដ្ឋបានរាយការណ៍ទៅកម្លាំងកងរាជអាវុធហត្ថមូលដ្ឋានស្រុកមុខកំពូលហើយសមត្ថកិច្ចបានរាយការណ៍បន្តមកទីបញ្ជាការដ្ឋានកងរាជអាវុធហត្ថខេត្តកណ្តាល។
បន្ទាប់មកលោក និងកម្លាំងជំនាញ និងដោយមានការបញ្ជាពីលោកមេបញ្ជាការកងរាជអាវុធហត្ថខេត្តកណ្តាល សំ តុលា នោះលោកបានដឹកនាំកម្លាំងចុះធ្វើការស្រាវជ្រាវដល់ទីតាំងកើតហេតុស្ថិតក្នុងភូមិអំពិលទឹក ឃុំសំបួរមាស ស្រុកមុខកំពូល។
លោកបន្តទៀតថា រហូតដល់ថ្ងៃទី ១៥ តុលា សមត្ថកិច្ចរបស់លោកបានតាមទៅដល់ស្រុកកំណើតរបស់ជនសង្ស័យនៅភូមិ ៦ ឃុំ ព្រែក ខ្សាយ (ខ) ស្រុកពាមរក៍ ខេត្តព្រៃវែង ចាប់ខ្លួនជនសង្ស័យបានដោយសហការជាមួយកម្លាំងអាវុធហត្ថខេត្តព្រៃវែង ចាប់ខ្លួនបានតែម្តង។ ការសម្លាប់ជនរងគ្រោះនេះដោយសារទំនាស់ពាក្យសម្តីគ្នា៕