រតនគិរីៈ ក្រុមការងារអង្គការជីវិតសត្វស្លាបអន្តរជាតិនៅកម្ពុជា (BirdLife in Cambodia) បាន ធ្វើកំណត់ត្រាដំបូង សម្រាប់កម្ពុជាពីវត្តមានបក្សីសមុទ្របុលវ័រនៅដែនជម្រកសត្វព្រៃលំផាត់ ខេត្តរតនគិរីកាលពីល្ងាចថ្ងៃទី ១៧ ខែ តុលា ឆ្នាំ ២០២១ ដែលនៅចម្ងាយរហូតដល់ប្រមាណជាង ២០០ គីឡូម៉ែត្រពីឆ្នេរសមុទ្រ ដែលមិនធ្លាប់មានពីមុនមក។
លោក ប៊ូ វរសក្ស តំណាងអង្គការ BirdLife in Cambodia បានឱ្យដឹងនៅថ្ងៃទី ១៩ ខែតុលាថា បក្សីសមុទ្របុលវ័រ (Bulwer’s Petrel) គឺជាសត្វស្លាបសមុទ្រ ១ ប្រភេទ ដែលធម្មតាត្រូវបានគេប្រទះឃើញនៅលើផ្ទៃសមុទ្របើកចំហឆ្ងាយពីតំបន់ដីគោក។
លោកបានបញ្ជាក់ថា បក្សី ១ ក្បាលនេះ ត្រូវបានកត់ត្រាដោយក្រុមការងារអង្គការ BirdLife in Cambodia នៅដែនជម្រកសត្វព្រៃលំផាត់ខេត្តរតនគិរីនៅល្ងាចថ្ងៃទី ១៧ ខែតុលាឆ្នាំនេះ ដែលមានចម្ងាយរហូតដល់ជាង ២០០ គីឡូម៉ែត្រពីឆ្នេរសមុទ្រ ដែលទំនងមកព្យុះបោកបក់។
បើតាមលោក ប៊ូ វរសក្ស កំណត់ត្រានេះអាចនឹងតំណាងឱ្យកំណត់ត្រាដំបូងបង្អស់នៃប្រភេទសត្វស្លាបនេះមានវត្តមាននៅកម្ពុជា។ លោកថ្លែងថា៖ «យើងសង្ស័យថាព្យុះទីហ្វុង “Kompasu” ដែលកំពុងធ្វើដំណើរឆ្លងកាត់ភាគខាងត្បូងប្រទេសចិន ចូលទៅក្នុងតំបន់ឥណ្ឌូចិនភាគខាងជើងបានបក់បោកនាំយកបក្សីមួយនេះពីដែនសមុទ្រឆ្ងាយមកកាន់តំបន់ដីគោក»។
តំណាងអង្គការ BirdLife in Cambodia រូបនេះបានបន្ថែមថា បក្សីសមុទ្របុលវ័រ គឺជាសត្វដែលគេកម្រប្រទះឃើញនៅក្នុងដែនទឹកអាស៊ីអាគ្នេយ៍ ហើយត្រូវបានគេកត់ត្រាទុកតែមួយចំនួនតូចប៉ុណ្ណោះនៅក្នុងសមុទ្រជុំវិញអាស៊ីអាគ្នេយ៍ដីគោក។
បក្សីសមុទ្រនេះត្រូវបានគេដឹងថា ជាប្រភេទដែលបន្តពូជនៅតំបន់កោះតូចៗនៅសមុទ្រចិនខាងកើត និងប៉ាស៊ីហ្វិកខាងលិច រួមទាំងនៅទីតាំងមួយចំនួននៅ កោះរីយូឃ្យូភាគខាងត្បូងប្រទេសជប៉ុន។
លោកបានបញ្ជាក់ថា៖ «យើងសូមអរគុណលោក ផល្លី ណាក់ (កសិករនៅលំផាត់ដែលបានជូនដំណឹងអំពីបក្សីនេះបានហើរចូលទៅបរិវេណគេហដ្ឋានរបស់គាត់ និងបានដោះលែងទៅវិញ) និងអរគុណសហការីរបស់យើង ដែលបានជួយក្នុងការកំណត់អត្តសញ្ញាណប្រភេទសត្វដែលមិនធ្លាប់បានស្គាល់ពីអត្តសញ្ញាណនេះ»។
លោក សុខ វិជ្ជា អ្នកស្រាវជ្រាវជីវចម្រុះនៅកម្ពុជាបានថ្លែងនៅថ្ងៃទី ១៩ ខែតុលាថា ចំពោះប្រភេទបក្សីនេះ ជាករណីថ្មីដែលលោកមិនដែលបានសិក្សាស្រាវជ្រាវពីមុនមកទេ ប៉ុន្តែលោកបញ្ជាក់ថា បក្សីនេះអាចកំពុងហើរផ្លាស់ទីឆ្លងទ្វីប ហើយបានចុះសម្រាកស្លាប ដើម្បីរកចំណី។
លោកថ្លែងថា៖ «ជួនកាលវាហើរឆ្លងទ្វីប ហើយបានចុះសម្រាកស្លាបដោយសារវាហើរឆ្ងាយ។ លក្ខណៈវាហើរឆ្ងាយ ធម្មតាវាអត់ខុសពីមនុស្សទេ តែកាលណាហត់វាចៀសមិនផុតពីត្រូវការឈប់សម្រាកសិន ហើយជួនកាលវារកចំណីនៅបឹង អ៊ីចឹងទៅបាន ១ ថ្ងៃ ២ ថ្ងៃ វាក៏ហើរទៅរកសមុទ្រវិញ វាអាចឆ្លងពីសមុទ្រចិន មកសមុទ្រ នៅខ្មែរអ៊ីចឹងទៅណា»៕