.jpg)
កាកបាទក្រហមខេត្តកំពង់ចាមរៀបចំពិធីផ្សព្វផ្សាយលុបបំបាត់ជំងឺអេដស៍។ រូប CRC's page
កំពង់ចាមៈ ក្រុមការងារឥស្សរជនឆ្នើមថ្នាក់ជាតិនៃកាកបាទក្រហមកម្ពុជា សហការជាមួយកាកបាទក្រមហមកម្ពុជាខេត្តកំពង់ចាម ធ្វើការផ្សព្វផ្សាយស្តីពី «ការលុបបំបាត់ការចម្លងមេរោគអេដស៍ និងស្វាយពីម្តាយទៅកូន ក្នុងអំឡុងពេលការរាតត្បាតជាសកលនៃជំងឺកូវីដ ១៩» ដើម្បីចូលរួមជាចរន្តជាតិមួយឈានឆ្ពោះទៅបញ្ចប់បញ្ហាអេដស៍ នៅឆ្នាំ ២០២៥។
លោកស្រី ប៉ាង ដានី អនុប្រធានអចិន្រៃ្តយ៍គណៈកម្មាធិការសាខាកាកបាទក្រហមកម្ពុជាខេត្តកំពង់ចាមថ្លែងនៅថ្ងៃទី ១៩ តុលា ថាក្រុមការងារឥស្សរជនឆ្នើមថ្នាក់ជាតិនៃកាកបាទក្រហមកម្ពុជា និងក្រុមការងារឥស្សរជនឆ្នើមនៃសាខាកាកបាទក្រហមកម្ពុជា ខេត្តកំពង់ចាម បានរៀបចំពិធីផ្សព្វផ្សាយស្តីពី «ការលុបបំបាត់ការចម្លងមេរោគអេដស៍ និងស្វាយពីម្តាយទៅកូនក្នុងអំឡុងពេលការរាតត្បាតជាសកលនៃជំងឺកូវីដ ១៩» នៅស្នាក់ការសាខាកាកបាទក្រហមខេត្តកំពង់ចាមនាថ្ងៃទី ១៨ ខែតុលា។
លោកស្រីថ្លែងថា ការផ្សព្វផ្សាយនេះធ្វើឡើង ដើម្បីចូលរួមជាចរន្តជាតិមួយ ឈានឆ្ពោះទៅរកការបញ្ចប់បញ្ហាអេដស៍នៅឆ្នាំ ២០២៥។ ក្រៅពីការផ្សព្វផ្សាយលើកនេះ សាខាកាកបាទក្រហម កម្ពុជាខេត្តកំពង់ចាមគ្រោងនឹងចុះផ្សព្វផ្សាយជាបន្តបន្ទាប់ទៀត នៅតាមបណ្តា ឃុំ ស្រុក ក្រុង ក្នុងគោលបំណង បញ្ជ្រាបការយល់ដឹងឱ្យបានកាន់តែទូលំទូលាយ។
លោក ទូច ឆៃ នាយកប្រតិបត្តិសាខាកាកបាទក្រហមខេត្តកំពង់ចាមថ្លែងនៅថ្ងៃទី ១៨ តុលាថា ក្រុមការងារឥស្សរជនឆ្នើមថ្នាក់ជាតិបានធ្វើការផ្សព្វផ្សាយឱ្យប្រជាពលរដ្ឋមានការយល់ដឹងអំពីមេរោគអេដស៍ ជំងឺអេដស៍។ ផ្សព្វផ្សាយអំពីស្ថានភាពជំងឺកូវីដ ១៩ ដែលកំពុងវាយលុកយ៉ាងសកម្មនៅកម្ពុជា។ ពង្រីកការយល់ដឹងវិធានការទប់ស្កាត់កុំឱ្យឆ្លងរាលដាលដល់គ្រួសារ និងសហគមន៍ និងលើកកម្ពស់ការយល់ដឹងអំពីសុខភាព មាតា ទារក និងកុមារ។
បើតាមលោក ទូច ឆៃ ក្រុមការងារឥស្សរជនឆ្នើមថ្នាក់ជាតិបានផ្តាំផ្ញើដល់អ្នកចូលរួមទាំងអស់បន្តផ្សព្វផ្សាយចំណេះដឹងឱ្យបានទូលំទូលាយ ដើម្បីលុបបំបាត់ការចម្លងមេរោគអេដស៍ និងស្វាយពីម្តាយទៅកូន ឈានឆ្ពោះទៅបញ្ចប់បញ្ហាអេដស៍នៅឆ្នាំ ២០២៥ ក៏ដូចជាចូលរួមទទួលខុសត្រូវក្នុងការទប់ស្កាត់ការចម្លងមេរោគកូវីដ ១៩ ហើយអនុវត្តការរស់នៅធម្មតាតាមគន្លងប្រក្រតីភាពថ្មី។
លោកនាយកប្រតិបត្តិសាខាកាកបាទក្រហមប្រាប់ថា ប្រជាពលរដ្ឋជាអ្នកចូលរួមក្នុងពិធីផ្សព្វផ្សាយនេះមានស្ត្រីមានផ្ទៃពោះ ៩ នាក់ ស្ត្រីផ្ទុកមេរោគអេដស៍ ៧ នាក់ និងស្ត្រីក្នុងវ័យបន្តពូជ ៥ នាក់ សរុបទាំងអស់ ២១ នាក់ ដែលបានជ្រើសរើសចេញមកពី ៩ ភូមិនៃសង្កាត់ទាំង ៤ ក្នុង ក្រុងកំពង់ចាម។
លោក ទូច ឆៃ បានថ្លែងថា៖ «ជាលទ្ធផល អ្នកចូលរួមបានថ្លែងអំណរគុណដល់ក្រុមការងារ ឥស្សរជនឆ្នើមថ្នាក់ជាតិដែលបានជួយរំឭកដាស់តឿនពួកគាត់ឱ្យបានយល់ដឹងបន្ថែម ហើយគាត់បានសន្យាថា នឹងពាំនាំយកចំណេះដឹងទាំងនេះទៅផ្សព្វផ្សាយដល់គ្រួសារ ដល់បងប្អូន មិត្តភក្តិ អ្នកជិតខាង និងសហគមន៍ឱ្យបានយល់ដឹង ដូចពួកគាត់ដែរ ដើម្បីរួមគ្នាទប់ស្កាត់ មិនឱ្យមានការឆ្លងដល់គ្រួសារ និងសហគមន៍»៕
