.jpg)
ជនសង្ស័យ និងវត្ថុតាងគ្រឿងញៀនដែលចាប់បានពីខែកញ្ញា។ រូប នគរបាល
ភ្នំពេញៈ ពេញ ១ ខែកញ្ញា ឆ្នាំ ២០២១ កន្លងទៅសមត្ថកិច្ចបានបង្ក្រាបបទល្មើសគ្រឿងញៀនសរុបចំនួន ៥៣៩ ករណីក្នុងនោះឃាត់ខ្លួនជនសង្ស័យសរុបចំនួន ១ ០៣៩ នាក់ស្រី ៧៣ នាក់ និងចាប់យកគ្រឿងញៀនសរុបជាង ២៦ គីឡូក្រាម ធៀបនឹងខែសីហាមានជាង ៥៧ គីឡូក្រាមថយចុះជាង ៣១ គីឡូក្រាមស្មើនឹងជាង ៥៤ ភាគរយ។
យោងតាមរបាយការណ៍លើហ្វេសប៊ុកលោក ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃចេញផ្សាយនៅថ្ងៃទី ១៩ តុលាបង្ហាញថា លទ្ធផលនៃកិច្ចប្រតិបត្តិការបង្ក្រាបគ្រឿងញៀនក្នុងខែកញ្ញាឆ្នាំ ២០២១ គឺក្នុងរយៈពេលពេញ ១ ខែនោះ សមត្ថកិច្ចបង្ក្រាបបានបទល្មើសគ្រឿងញៀនសរុបចំនួន ៥៣៩ ករណីធៀបនឹងខែសីហា ឆ្នាំ ២០២១ មាន ៤៤០ ករណី កើនលើស ៩៩ ករណីស្មើនឹង ២២,៥ ភាគរយ។
ក្នុងកិច្ចប្រតិបត្តិការបង្ក្រាបគ្រឿងញៀនក្នុងខែកញ្ញាសមត្ថកិច្ចបានចាប់យកគ្រឿងញៀនសរុបចំនួនជាង ២៦ គីឡូក្រាមធៀបនឹងខែសីហា ឆ្នាំ ២០២១ មានជាង ៥៧ គីឡូក្រាមថយចុះជាង ៣១ គីឡូក្រាម ស្មើនឹងជាង ៥៤ ភាគរយ។ គ្រឿងញៀនបង្ក្រាបបានរួមមានមេតំហ្វេតាមីនក្រាមម្សៅជាង ១៣ គីឡូក្រាមមេតំហ្វេតាមីនគ្រាប់ជាង ១៣១ ក្រាមអ៊ិចស្តាស៊ីជាង ៨ គីឡូក្រាមកេតាមីនជាង ១ គីឡូក្រាម Nimetazepam ជាង ១ គីឡូក្រាម សាធាតុគីមីផ្សំជាង ៤ គីឡូក្រាម និងកញ្ឆាស្ងួតជាង ៤ គីឡូក្រាម។
ក្នុងចំណោមបទល្មើសគ្រឿងញៀននោះ មានករណីជួញដូររក្សាទុក ៤៦៣ ករណីប្រើប្រាស់ ៧៥ ករណី ករណីសំយោគកែច្នៃ ១ ករណី និងបានឃាត់ខ្លួនជនសង្ស័យសរុបចំនួន ១ ០៣៩ នាក់ស្រី ៧៣ នាក់ធៀបនឹងខែសីហាឆ្នាំ ២០២១ មាន ៨៦១ នាក់ កើន ១៧៨ នាក់ស្មើនឹង ២០,៦ ភាគរយក្នុងនោះជនសង្ស័យជួញដូររក្សាទុក ៨៣២ ករណី ជនសង្ស័យប្រើប្រាស់គ្រឿងញៀន ២០៥ នាក់ ជនសង្ស័យសំយោគកែច្នៃ ២ នាក់។ មានជនបរទេស ៤១ នាក់ស្ថិតក្នុងចំណោមជនសង្ស័យទាំងនោះដែរ។ នេះបើតាមរបាយការណ៍។
របាយការណ៍ឱ្យដឹងថា ក្នុងចំណោមបទល្មើសគ្រឿងញៀន ៥៣៩ ករណីនោះ ករណីគ្រឿងញៀនធំៗ ដែលមានប្រភពចរាចរណ៍ឆ្លងកាត់តាមច្រកព្រំដែនគោកក្នុងភូមិសាស្ត្ររាជធានីភ្នំពេញ ត្រូវបានសមត្ថកិច្ចជំនាញស្រាវជ្រាវឃើញ និងបង្ក្រាបបានចាប់ពី ១ គីឡូក្រាមឡើងទៅ មានចំនួន ៤ ករណីស្មើនឹង ៤ ក្រុមឃាត់ខ្លួនជនសង្ស័យ ៦ នាក់ និងរឹបអូសគ្រឿងញៀនសរុបបានជាង ១៦ គីឡូក្រាម និងសារធាតុគីមីផ្សំបានជាង ៤ គីឡូក្រាម។
ក្នុងខែកញ្ញានោះដែរ សមត្ថកិច្ចក៏បានអនុវត្តវិធានការរដ្ឋបាលបានចំនួន ១៣១ លើក បានអញ្ជើញម្ចាស់អាជីវកម្ម និងអ្នកពាក់ព័ន្ធមកស្ដាប់ការណែនាំចំនួន ២៨ លើក ស្មើនឹង ៦៥៧ នាក់ ចុះអប់រំម្ចាស់ទីតាំងអាជីវកម្មចំនួន ១០៣ លើក និង ១ គោលដៅចុះធ្វើតេស្តរកសារធាតុញៀនលើក្មេងទំនើងជនមានតម្រុយប្រើប្រាស់គ្រឿងញៀន និងឆ្មក់ត្រួតពិនិត្យអ្នកបើកបររថយន្តដឹកទំនិញដឹកកម្មករដឹកអ្នកដំណើរបុគ្គលិកកម្សាន្តកាស៊ីណូសណ្ឋាគារខារ៉ាអូខេសរុប ៥០ លើក ស្មើនឹង ១៣៤ នាក់ រកឃើញអ្នកផ្ទុកសារធាតុញៀន ៤៨ នាក់ យកទៅទទួលសេវាបន្សាប និងព្យាបាល។
លោក ស ខេង បញ្ជាក់ថា៖ «ក្នុងនាមសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជាក្នុងនាមក្រសួងមហាផ្ទៃ និងខ្លួនខ្ញុំផ្ទាល់ជាប្រធាននៃយុទ្ធនាការប្រយុទ្ធប្រឆាំងគ្រឿងញៀនខុសច្បាប់ លើកទី ៦ ខ្ញុំសូមសម្ដែងនូវការកោតសរសើរ និងការលើកទឹកចិត្តខ្ពស់ ជូនចំពោះថ្នាក់ដឹកនាំនិងមន្ត្រីពាក់ព័ន្ធទាំងអស់ ទាំងស៊ីវិល នគរបាល និងកងរាជអាវុធហត្ថ ដែលបានរួមសហការគ្នាយ៉ាងល្អក្នុងកិច្ចប្រតិបត្តិការបង្ក្រាបគ្រឿងញៀន ដើម្បីរួមចំណែកការពារសន្តិសុខសណ្ដាប់ធ្នាប់សាធារណៈសុវត្ថិភាពសង្គមជូនជាតិ និងប្រជាជន»។
លោកបានផ្ញើសារជូនជនរួមជាតិគ្រប់មជ្ឈដ្ឋានសង្គម និងកម្លាំងអនុវត្តច្បាប់ទាំងអស់ឱ្យចូលរួមគាំទ្រ និងអនុវត្តពាក្យស្លោកជាតិ ៣ការពារ ១រាយការណ៍ គឺកុំពាក់ព័ន្ធ៖ កុំជួញដូរ កុំចែកចាយ កុំធ្វើខ្នងបង្អែក កុំឃុបឃិត និងកុំប្រើប្រាស់គ្រឿងញៀន។ កុំអន្តរាគមន៍៖ កុំរារាំងការអនុវត្តច្បាប់ចំពោះឧក្រិដ្ឋជនគ្រឿងញៀន ទោះបីជាក្រុមគ្រួសារសាច់ញាតិ ឬមិត្តភក្តិក៏ដោយ។ កុំលើកលែង៖ កុំបន្ធូរបន្ថយការអនុវត្តច្បាប់ចំពោះឧក្រិដ្ឋជនគ្រឿងញៀន។ សមត្ថកិច្ចពាក់ព័ន្ធត្រូវអនុវត្តច្បាប់ដោយម៉ឺងម៉ាត់ និងស្មោះត្រង់ទៅតាមវិជ្ជាជីវៈរបស់ខ្លួន ហើយជនគ្រប់រូបត្រូវគោរព និងអនុវត្តច្បាប់។
១ រាយការណ៍ គឺត្រូវរាយការណ៍ផ្តល់ព័ត៌មានដល់សមត្ថកិច្ចអំពីមុខសញ្ញាជួញដូរចែកចាយប្រើប្រាស់ ទីតាំងកែច្នៃផលិត និងទីតាំងស្តុកទុកគ្រឿងញៀនខុសច្បាប់ដល់សមត្ថកិច្ច...ដើម្បីយើងអាចបន្តរួមកម្លាំងសាមគ្គីជាតិ ប្រយុទ្ធប្រឆាំងគ្រឿងញៀន ដែលជាសត្រូវនៃការអភិវឌ្ឍសេដ្ឋកិច្ចសង្គម និងធនធានមនុស្ស ជាពិសេសធនធានយុវជន ដែលជាសសរទ្រូងប្រទេសជាតិ៕
