កំពតៈ លោក ម៉ៅ ធនិន អភិបាលខេត្តកំពតបានចុះដោះស្រាយ និងទទួលយកសំណូមពររបស់ប្រជាពលរដ្ឋជាលើកដំបូងនៅក្នុងផ្សារសាមគ្គី ខណៈស្នងការដ្ឋាននគរបាលខេត្តនេះបានបើកវេទិកាសាធារណៈជាលើកដំបូង នៅសង្កាត់ក្រាំងអំពិល ក្រុងកំពត នៅថ្ងៃទី ១៩ តុលា ដើម្បីផ្តល់ឱកាសឱ្យពលរដ្ឋរាយការណ៍ពីភាពខ្វះចន្លោះរបស់សមត្ថកិច្ចដែនដី។
កាលពីថ្ងៃទី ១៨ តុលា លោក ម៉ៅ ធនិន អភិបាលនៃគណៈអភិបាលខេត្តកំពតដែលទើបឡើងកាន់តំណែងថ្មី អមដំណើរដោយអភិបាលរងខេត្ត និងថ្នាក់ដឹកនាំមន្ទីរ អង្គភាពពាក់ព័ន្ធមួយចំនួនក្នុងខេត្តបានចុះជួបសំណេះសំណាលសួរសុខទុក្ខ ជាមួយប្រជាពលរដ្ឋ និងអាជីវករក្នុងផ្សារសាមគ្គី ស្ថិតក្នុងសង្កាត់កំពង់បាយ ក្រុងកំពត។
ក្នុងឱកាសនោះលោក ម៉ៅ ធនិន បានថ្លែងថា ការចុះជួបជាមួយប្រជាពលរដ្ឋ និងអាជីវករនាពេលនេះគឺគ្រាន់តែជាជំហានដំបូង ដើម្បីស្វែងយល់ពីសំណូមពរតម្រូវការរបស់អាជីវករក៏ដូចជាប្រជាពលរដ្ឋតែប៉ុណ្ណោះ ក្នុងគោលបំណងដើម្បីបានជាមូលដ្ឋានរួម សម្រាប់ធ្វើការដោះស្រាយឱ្យបានសម្រេចនៅពេលក្រោយបន្តទៀត។
លោកបញ្ជាក់ថា៖ «ក្នុងស្មារតីភាតរភាពជាគ្រួសារតែមួយ ជាពិសេសជាមួយគ្រួសារប្រជាពលរដ្ឋនៅទូទាំងខេត្តកំពត ទាំងមូល ដើម្បីរួមគ្នាគិត រួមសុខរួមទុក្ខ និងរួមគ្នាដោះស្រាយបញ្ញាការលំបាកបញ្ហាប្រឈម សំណូមពរ និងតម្រូវការផ្សេងៗ ក៏ដូចជាជំហាននៃដំណើរកិច្ចការអភិវឌ្ឍន៍មូលដ្ឋានទៅមុខទៀតឱ្យបានកាន់តែរីកចម្រើនថែមទៀត សំដៅកាត់បន្ថយភាពក្រីក្រ និងធ្វើឱ្យប្រជាពលរដ្ឋរស់នៅប្រកបដោយសុខដុមរមនា»។
បើតាមលោក ម៉ៅ ធនិន ក្នុងឱកាសនោះ លោកបានទទួលសំណូមពររបស់អាជីវករជាច្រើនចំណុច ដែលរួមមានសំណូមពរស្នើសុំឱ្យអាជីវករលក់ត្រីឱ្យមានការលក់ដូរប្រមូលផ្ដុំគ្នាតែមួយក្នុងផ្សារ បញ្ឈប់ឱ្យមានការលក់ដូរខាងក្រៅផ្សារតាមចិញ្ចើមផ្លូវបញ្ហាការជួសជុលដំបូលផ្សារដែលបញ្ហានេះ លោកថា ក្រុមការងារនឹងបន្តជួបគ្នាទៀតជាមួយអាជីវករនៅពេលក្រោយ ដើម្បីធ្វើយ៉ាងណា ពិភាក្សាគ្នារកដំណោះស្រាយជូនអាជីវករឱ្យបានសម្រេច។
បន្ថែមពីនេះលោក ម៉ៅ ធនិន ក៏បានណែនាំឱ្យអាជ្ញាធរពាក់ព័ន្ធដោះស្រាយបញ្ហាប្រព័ន្ធបង្ហូរទឹកក្នុងផ្សារឱ្យបានឆាប់ជាបន្ទាន់ និងស្នើដល់ប្រធានផ្សារ និងអាជ្ញាធរក្រុងកំពត ត្រូវចៀសឱ្យបានពីការយកភាស៊ីទៅលើអ្នកលក់ដូរតាមកញ្ច្រែងតូចតាច និងស្រង់ឈ្មោះប្រជាពលរដ្ឋដែលមានមុខរបររត់ម៉ូតូឌុបនៅផ្សារសាមគ្គីនេះឱ្យបានជាក់លាក់ ដើម្បីមានលក្ខណៈងាយស្រួលក្នុងការឧបត្ថម្ភក្នុងស្មារតីវប្បធម៌ចែករំលែកខ្មែរស្រឡាញ់ខ្មែរសម្រាប់ពួកគាត់ ដែលមានជីវភាព និងការខ្វះខាតផងដែរ។
លោក ម៉ៅ ច័ន្ទមធុរិទ្ធ ស្នងការនគរបាលខេត្តកំពតបានប្រាប់ ភ្នំពេញ ប៉ុស្តិ៍ថា ការកំណត់ចុះធ្វើវេទិកាសាធារណៈជាលើកដំបូង នៅក្នុងសង្កាត់ក្រាំងអំពិល នៅថ្ងៃទី ១៩ តុលា គឺមិនមែនបានន័យថា សង្កាត់នេះមានបញ្ហាអសកម្មច្រើននោះទេ។ ប៉ុន្តែ គឺជាការចុះស្រង់ទស្សនៈរបស់ប្រជាពលរដ្ឋនៅក្នុងមូលដ្ឋានខណៈដែលគ្រប់សង្កាត់ ឃុំទូទាំងខេត្តនឹងត្រូវធ្វើវេទិកាសាធារណៈបែបនេះទាំងអស់។
លោកបញ្ជាក់ថា៖ «គោលដៅយើងនេះ គឺពង្រឹងគោលនយោបាយភូមិឃុំមានសុវត្ថិភាព ដើម្បីឱ្យកាន់តែមានប្រសិទ្ធភាពខ្ពស់។ ចឹងពាក់ព័ន្ធនឹងបញ្ហាផ្សេងៗ ដែលប្រជាពលរដ្ឋលោកសំណូមពរខ្ញុំនឹងរាយការណ៍បន្តទៅអភិបាលខេត្ត ដើម្បីរួមគ្នាដោះស្រាយ ហើយចំពោះបញ្ហាផ្សេងៗ ដែលអាចសម្របសម្រួលដោះស្រាយបានភ្លាមៗយើងនឹងធ្វើក្នុងពេលហ្នឹងតែម្តង»។
ទោះយ៉ាងណាលោក ម៉ៅ ច័ន្ទមធុរិទ្ធ បញ្ជាក់ថា អ្វីដែលលោកផ្តោតខ្លាំងបំផុត នៅក្នុងវេទិកាសាធារណៈ គឺរបៀបធ្វើការរបស់កម្លាំងក្រោមបង្គាប់របស់លោកនៅតាមមូលដ្ឋាន ហើយគ្រប់ការលើកឡើងរបស់ប្រជាពលរដ្ឋនឹងត្រូវបានទទួលយកមកពិចារណា និងដោះស្រាយ។
លោកឡើយ វណ្ណារ៉ា ពលរដ្ឋរស់នៅក្នុងខេត្តកំពតបានសាទរ និងស្វាគមន៍ចំពោះការចុះដោះស្រាយ និងការបើកវេទិកាសាធារណៈរបស់អាជ្ញាធរខេត្តនេះ។ លោកយល់ថា ការបង្កើតនូវកម្មវិធីទាំងនេះនឹងអាចូលរួមដោះស្រាយបញ្ហាជាច្រើនរបស់ប្រជាពលរដ្ឋនៅតាមមូលដ្ឋានជាពិសេសបញ្ហាទំនាស់ដីធ្លី ភាពអសកម្មរបស់មន្ត្រី និងបញ្ហាអសន្តិសុខក្នុងមូលដ្ឋាន។
លោកបញ្ជាក់ថា៖ «ឃើញថា នេះគឺជារឿងដែលល្អមួយ ដើម្បីរួមចំណែកដោះស្រាយបញ្ហាប្រជាពលរដ្ឋមួយចំនួនហើយវេទិកាទាំងនេះ គឺអាចឱ្យប្រជាពលរដ្ឋរាយការណ៍ទៅដោយផ្ទាល់។ ខ្ញុំក៏មានសំណូមពរមួយដែរទាក់ទងនឹងផ្លូវលំ ១ ខ្សែនៅក្នុងភូមិរបស់ខ្ញុំដែលក្រុមហ៊ុនឯកជនបានធ្វើឱ្យខូច។ ខ្ញុំសង្ឃឹមថា ពេលវេទិកាទាំងនេះបានមកដល់តំបន់ខ្ញុំ បញ្ហានេះនឹងត្រូវបានដោះស្រាយ»៕
វីដេអូ៖