.jpg)
ឧត្តរមានជ័យៈ អាជ្ញាធរខេត្តឧត្តរមានជ័យសម្រេចបន្តវិធានការរដ្ឋបាល ដោយហាមឃាត់ជាបណ្តោះអាសន្ននូវការធ្វើសកម្មភាពមុខរបរ និងអាជីវកម្មក្លិបកម្សាន្តគ្រប់ប្រភេទ ដើម្បីប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ ១៩ ក្នុងភូមិសាស្ត្រខេត្តឧត្តរមានជ័យរហូតដល់ថ្ងៃទី ៣១ ខែតុលា។
លោក ប៉ែន កុសល្យ អភិបាលខេត្តឧត្តរមានជ័យចេញលិខិតសម្រេចបន្តវិធានការរដ្ឋបាលបែបនេះ នៅថ្ងៃទី ១៨ តុលា ដោយលោកបញ្ជាក់ថា រាល់ការបម្រើសេវាកម្មរបស់តូបអាហារ អាហារដ្ឋាន ភោជនីយដ្ឋាន ភេសជ្ជដ្ឋាន និងភោជនីយដ្ឋាននៅតាមសណ្ឋាគារជាដើម ត្រូវតែគោរពឱ្យខាងតែបាននូវវិធានការអនាម័យ ដូចជា ការរៀបចំជែល អាល់កុលបាញ់សម្លាប់មេរោគ និងការរក្សាគម្លាតសុវត្ថិភាពបុគ្គលជាដើម ស្របតាមការណែនាំ និងវិធានសុខាភិបាលក្នុងការបម្រើសេវាកម្មរបស់ខ្លួន។ ជាមួយគ្នានោះត្រូវហាមឃាត់សកម្មភាពមុខរបរ និងអាជីវកម្មក្លិបកម្សាន្តគ្រប់ប្រភេទ។
លោកបញ្ជាក់ថា៖ «ហាមឃាត់ជាបណ្តោះអាសន្នការធ្វើសកម្មភាពមុខរបរ និងអាជីវកម្ម ក្លិបកម្សាន្តគ្រប់ប្រភេទ ជាអាទិ៍ ខារ៉ាអូខេ រង្គសាល ឌីស្កូតែក បៀរហ្គាឌិន អាជីវកម្មម៉ាស្សា រោងសម្តែងសិល្បៈ និងសកម្មភាពមុខរបរ អាជីវកម្មដែលនឹងបង្កឱ្យមានស្ថានភាពប្រឈម ដើម្បីប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ ១៩»។
លោកអភិបាលខេត្តបន្ថែមថា ចំពោះរាល់សកម្មភាពការងារមុខរបរ និងអាជីវកម្ម ដែលមិនត្រូវបានហាមឃាត់ត្រូវអនុវត្តវិធានការ សុវត្ថិភាពផ្នែកសុខាភិបាលឱ្យបានម៉ឺងម៉ាត់ ជាអាទិ៍ ការរៀបចំជែល អាល់កុល បាញ់សម្លាប់មេរោគ ការវាស់កម្តៅ ការប្រើប្រាស់ប្រព័ន្ធ QR Code “ទប់ស្កាត់កូវីដ” និងការរក្សាគម្លាតសុវត្ថិភាពបុគ្គលជាដើម ពិសេសត្រូវប្រកាន់ខ្ជាប់ជានិច្ចនូវវិធានការ ៣ការពារ ៣កុំ។
អាជ្ញាធរខេត្តនេះក៏បន្តផ្អាកជាបណ្តោះអាសន្ននូវការរៀបចំពិធីមង្គលការ ពិធីជប់លៀង ការជួបជុំតាមបែបសាសនា និងការប្រមូលផ្តុំ ឬការជួបជុំគ្នាដែលពុំមានភាពជាចាំបាច់ លើកលែងតែចំពោះករណីមួយចំនួន ដូចជា ការជួបជុំសមាជិកគ្រួសារ ការធ្វើបុណ្យសពតាមការណែនាំរបស់អាជ្ញាធរ បុណ្យជាតិ អន្តរជាតិ ដែលអនុញ្ញាតដោយរដ្ឋាភិបាល។
ការប្រមូលផ្តុំមនុស្សដើម្បីអនុវត្តវិធានការសុខាភិបាល ដូចជាការយកសំណាក និងចាក់វ៉ាក់សាំង ការជួបជុំរបស់អាជ្ញាធរមានសមត្ថកិច្ច កម្លាំងប្រដាប់អាវុធ ក្នុងការថែរក្សាសន្តិសុខ សណ្តាប់ធ្នាប់ របៀបរៀបរយសាធារណៈ និងការជួបជុំមនុស្សដែលមានភាពចាំបាច់សម្រាប់បម្រើផលប្រយោជន៍សាធារណៈ ឬក្នុងគោលបំណងផ្សេងទៀត ត្រូវធ្វើតាមការកំណត់របស់អាជ្ញាធរមានសមត្ថកិច្ច។
លោកអភិបាលខេត្តបានបញ្ជាក់ថា៖ «បុគ្គលគ្រប់រូប មានកាតព្វកិច្ចពាក់ម៉ាស់ និងគោរពអនុវត្តវិធានការរក្សាគម្លាតសុវត្ថិភាព ស្របតាមស្មារតីនៃប្រកាសលេខ ០៨១ ស.នក.ប្រក ចុះថ្ងៃទី ២២ ខែមីនា ឆ្នាំ ២០២១ របស់ក្រសួងសុខាភិបាលជាកំហិត»។
បើតាមលោក ប៉ែន កុសល្យ បុគ្គល ឬនីតិបុគ្គលទាំងឡាយណា ដែលមិនអនុវត្តខ្លឹមសារនៃសេចក្តីប្រកាសនឹងត្រូវទទួលទោសដូចមានកំណត់ក្នុងច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ ១៩ និងជំងឺកាចសាហាវ និងប្រកបដោយគ្រោះថ្នាក់ធ្ងន់ផ្សេងទៀត៕
