.jpg)
លោក កើត រិទ្ធ ចូលរួមក្នុងមហាសន្និបាតលើកទី២៦ នៃគណៈមេធាវីកម្ពុជា ពីថ្ងៃទី ១៦ តុលា។ ហេង ជីវ័ន
ភ្នំពេញៈ សមាជិកក្រុមប្រឹក្សាគណៈមេធាវីអាណត្តិថ្មីចំនួន ៣៣ រូប ត្រូវបានប្រកាសជាផ្លូវការ ក្រោយការបោះឆ្នោត ដែលក្រុមប្រឹក្សាថ្មីនេះ រដ្ឋមន្ត្រីក្រសួងយុត្តិធម៌ លោក កើត រិទ្ធ សង្ឃឹមថា ពួកគេនឹងខិតខំបំពេញការងារឱ្យកាន់តែមានប្រសិទ្ធភាពក្នុងការលើកកម្ពស់ វិស័យយុត្តិធម៌នៅកម្ពុជា។
ការបោះឆ្នោតជ្រើសតាំងសមាជិកក្រុមប្រឹក្សាគណៈមេធាវីអាណត្តិថ្មី ឆ្នាំ ២០២១ ដល់ឆ្នាំ ២០២៤ ត្រូវបានធ្វើឡើងស្របជាមួយនឹងមហាសន្និបាតគណៈមេធាវីកម្ពុជាលើកទី២៦ ដែលមានរយៈពេល ៣ ថ្ងៃចាប់ពីថ្ងៃទី ១៥ ដល់ថ្ងៃទី ១៨ តុលា នៅទីស្នាក់ការគណៈមេធាវី រាជធានីភ្នំពេញ។
លោក លី ច័ន្ទតុលា ប្រធានគណៈមេធាវីកម្ពុជាបានប្រាប់ ភ្នំពេញ ប៉ុស្តិ៍ នៅថ្ងៃទី ១៨ តុលា ថា បេក្ខភាពចំនួន ៣៣ រូបត្រូវបានជាប់ឆ្នោតដោយមានសំឡេង ច្រើនជាងគេក្នុងចំណោមបេក្ខភាព ចំនួន ១១០ រូប ដែលបានឈរឈ្មោះឱ្យគេបោះឆ្នោត ដើម្បីក្លាយជាសមាជិកក្រុមប្រឹក្សាគណៈមេធាវីអាណត្តិទី១០។
លោករំពឹងថា សមាជិកក្រុមប្រឹក្សា ដែលបានជាប់ឆ្នោតថ្មីនេះនឹងចូលរួមយ៉ាងសកម្មជាមួយគណៈមេធាវី ដើម្បីលើកកម្ពស់វិស័យច្បាប់ និងយុត្តិធម៌នៅក្នុងប្រទេស ជាពិសេសជួយឱ្យការងាររបស់គណៈមេធាវីប្រព្រឹត្តទៅមុខយ៉ាងសកម្ម ខណៈមេធាវីនៅតែជួបប្រទះនូវបញ្ហាជាច្រើន។
លោកបានបញ្ជាក់ក្នុងពិធីប្រកាសលទ្ធផលថា៖ «ខ្ញុំត្រៀមខ្លួនរួចជាស្រេចរួមគ្នាធ្វើការងារជាមួយបងប្អូនសហភាតាដែលជាប់ឆ្នោតដើម្បីឧត្តមភាព និងកិត្យានុភាពនៃវិជ្ជាជីវៈមេធាវីរបស់យើង។ សូមរួមគ្នាជាមួយខ្ញុំដើម្បីឧត្តមភាព និងកិត្យានុភាពគណៈមេធាវី»។
បើតាមលោក លី ច័ន្ទតុលា ក្រុមប្រឹក្សាគណៈមេធាវីរួមគ្នាពិនិត្យ ដោះស្រាយគ្រប់បញ្ហាដែលពាក់ព័ន្ធទៅនឹងការអនុវត្តវិជ្ជាជីវៈមេធាវី និងធានាដល់ការបំពេញភារកិច្ច និងការពារសិទ្ធិរបស់មេធាវី។ សមាជិកគណៈមេធាវីក៏មានសិទ្ធិធ្វើបទបញ្ជាផ្ទៃក្នុងក្រមសីលធម៌សម្រេចលើការស្នើសុំការអនុញ្ញាតទាំងឡាយដែលធ្វើឡើងដោយមេធាវី រួមទាំងកិច្ចការជាច្រើនទៀតដោយ ៥០ បូក ១ ឬសំឡេងភាគច្រើន។
លោក កើត រិទ្ធិ រដ្ឋមន្ត្រីក្រសួងយុត្តិធម៌បានថ្លែងថា មេធាវី គឺជាបុគ្គលដែលចូលរួម និងមិនអាចខ្វះបានក្នុងការលើកកម្ពស់វិស័យយុត្តិធម៌នៅកម្ពុជា។ ស្ថាប័ននេះក៏បានចូលរួមផ្តល់ការការពារសិទ្ធិ និងផលប្រយោជន៍នៅចំពោះមុខច្បាប់ផងដែរ។
លោកបង្ហាញនូវក្តីរំពឹងថា៖ «ក្រុមប្រឹក្សាគណៈមេធាវីថ្មីនេះនឹងបំពេញតួនាទីដ៏មានសារៈសំខាន់របស់ខ្លួនឱ្យកាន់តែមានប្រសិទ្ធភាពថែមទៀត ដើម្បីជាឧត្តមប្រយោជន៍ដល់គណៈមេធាវីសម្រាប់មេធាវី។ សមត្ថភាពខាងវិជ្ជាជីវៈរបស់មេធាវី គឺជាកត្តារួមចំណែកមិនអាចខ្វះបាន និងដំណើរការលើកកម្ពស់ ដល់វិស័យយុត្តិធម៌នៅកម្ពុជា»។
បន្ថែមពីនេះ លោក កើត រិទ្ធ ក៏លើកទឹកចិត្តឱ្យមេធាវីគ្រប់រូបចូលរួមបន្ថែមទៀត ដើម្បីផ្តល់ជំនួយផ្នែកច្បាប់ និងផ្តល់ការការពារក្តីជូនជនក្រីក្រឱ្យបានកាន់តែច្រើន។ លោកថាការចូលរួមរបស់មេធាវីចំពោះបញ្ហានេះ ពួកគេនឹងទទួលបាននូវកិត្តិយស កេរ្តិ៍ឈ្មោះ និងសេចក្តីគោរពនៅក្នុងសង្គមជាតិ។
លោកបញ្ជាក់ថា៖ «សូមមេធាវីគ្រប់រូបបន្តចូលរួម និងគាំទ្របន្ថែម ដល់យន្តការប្រឹក្សាផ្នែកច្បាប់ និងការផ្តល់ជំនួយផ្នែកច្បាប់ ដោយ [ឥត] គិតថ្លៃ។ ជាក់ស្តែងមេធាវីដែល ទទួលបានការការពារជូនជនក្រីក្រ កាន់តែច្រើននឹងប្រកបដោយការទទួលខុសត្រូវខ្ពស់ មេធាវីរូបនោះនឹងទទួលបាននូវកិត្តិយស កេរ្តិ៍ឈ្មោះ និងសេចក្តីគោរពនៅក្នុងសង្គមជាតិផងដែរ»។
លោក ទូច ធីរិទ្ធ មេធាវី ដែលទទួលបានសំឡេងឆ្នោតច្រើនក្នុងលំដាប់ទី៣ ក្នុងចំណោមមេធាវីជាប់ឆ្នោតទាំង ៣៣ រូបបានប្រាប់ ភ្នំពេញ ប៉ុស្តិ៍ នៅថ្ងៃទី ១៨ តុលាថា លោកពេញចិត្តនឹងការបំពេញការងារជាសមាជិកក្រុមប្រឹក្សាគណៈមេធាវីក្នុងអាណត្តិថ្មីនេះ។
លោកបញ្ជាក់ថា៖ «សម្រាប់ខ្ញុំ ខ្ញុំមាន ២ ចំណុចក្នុងការប្តេជ្ញាចិត្ត គឺខ្ញុំមានពេលវេលាគ្រប់គ្រាន់ ដើម្បីបំពេញការងារ និងចូលរួមកិច្ចប្រជុំរបស់គណៈមេធាវី។ ទី២ គឺ ខ្ញុំនឹងបន្តនិរន្តរភាពចូលរួមសកម្មភាពក្នុងការចូលរួមជាមួយការដឹកនាំរបស់គណៈមេធាវីលើគោលការណ៍ ៨ ចំណុច ដើម្បីឧត្តមភាព និងកិត្យានុភាពនៃវិជ្ជាជីវៈមេធាវី»។
លោកមើលឃើញថា ការបោះឆ្នោតក្នុងអាណត្តិថ្មីនេះ គឺមានលក្ខណៈល្អ និងត្រឹមត្រូវ ដែលបង្ហាញតម្លាភាព និងភាពច្បាស់លាស់ក្នុងការជ្រើសរើសសមាជិក ដែលមានសមត្ថភាពដើម្បីបំពេញការងារក្នុងវិស័យនេះឱ្យកាន់តែរីកចម្រើន៕
