.jpg)
សកម្មភាពមន្ត្រីចុះបើកសាកល្បងសាលារដ្ឋនៅស្រុកអង្គរធំ ខេត្តសៀមរាបពីថ្ងៃ ១៨ តុលា។ រូបថត មន្ទីរព័ត៌មានខេត្ត
សៀមរាបៈ រដ្ឋបាលខេត្តសៀមរាបកំពុងរៀបចំបើកដំណើរការសាកល្បងសាលាកម្រិតបឋមសិក្សាចំនួន ១២៩ ទៀតនៅថ្ងៃទី ២០ តុលា នេះ បន្ទាប់ពីសាលារៀនរដ្ឋកម្រិតមធ្យមសិក្សាចំនួន ៤៤ សាលានៅស្រុកចំនួន ៨ ទើបបានបើកសាកល្បងកាលពីថ្ងៃទី ១៨ ខែតុលា។
លោក លីវ សុខុន ប្រធានមន្ទីរព័ត៌មានខេត្តសៀមរាបបានឱ្យភ្នំពេញប៉ុស្តិ៍ដឹងកាលពីថ្ងៃទី ១៨ តុលាថា៖ «សាលារៀនបើកនៅថ្ងៃ ១៨ ខែតុលាមាន ៤៤ សាលានៅក្នុង ៨ ស្រុក។
នេះជាការបើកកម្រិតចាប់ពីថ្នាក់ទី ៩ និងថ្នាក់ទី ១២ បើកធ្វើការសាកល្បង។ ថ្ងៃ ២០ [តុលា] ទៅយើងបើកសាលា ១២៩ បន្ថែមទៀតនៅក្នុងកម្រិតបឋម»។
ស្រុកទាំង ៨ នោះរួមមានស្រុកបន្ទាយស្រី ស្រុកស្វាយលើ ស្រុកសូទ្រនិគម ស្រុកប្រាសាទបាគង ស្រុកស្រីស្នំ ស្រុកវ៉ារិន ស្រុកអង្គរធំ និងស្រុកក្រឡាញ់។
សេចក្តីប្រកាសព័ត៌មានរបស់រដ្ឋបាលខេត្តសៀមរាប ដែល ភ្នំពេញ ប៉ុស្តិ៍ ទទួលបានកាលពីថ្ងៃទី ១៨ ខែតុលា បានដកស្រង់សម្ដី លោក ពៅ ពិសិដ្ឋ អភិបាលរងខេត្តសៀមរាបថា៖ «មុននឹងយើងបើកសាលារៀនវិញនៅថ្ងៃនេះ យើងបានឆ្លងកាត់នូវដំណាក់កាលនៃការត្រួតពិនិត្យ និងវាយតម្លៃច្រើនករណីណាស់គឺបើកនៅតាមសាលានៃបណ្ដាស្រុកដែលមានហានិភ័យទាបដោយអនុវត្តការរៀនតាមបណ្ដុំ មិនលើសពី ១៥ នាក់ទៅតាមស្តង់ដាប្រតិបត្តិការក្រសួងអប់រំ យុវជន និងកីឡា និងក្រសួងសុខាភិបាល និងផ្ដល់អាទិភាពដល់សិស្សថ្នាក់ទី ៩ និងថ្នាក់ទី ១២ សម្រាប់តំបន់មានហានិភ័យមធ្យម»។
មុននឹងបើកសាលាឡើងវិញនេះ រដ្ឋបាលខេត្តសៀមរាបបានពិនិត្យលើគ្រូបង្រៀន និងសិស្សទាំងអស់ដែលត្រូវតែបានចាក់វ៉ាក់សាំងកូវីដ ១៩ ទាំង ២ ដូសគ្រប់ៗគ្នា និងបានចុះត្រួតពិនិត្យនៅតាមទីតាំងសាលារៀននៃស្រុកមួយចំនួនដូចជាសាលាត្រូវមានទីកន្លែងសម្រាប់លាងដៃនឹងសាប៊ូ លាងដៃនឹងអាល់កុល ការត្រួតពិនិត្យកម្ដៅ និងសិស្សត្រូវពាក់ម៉ាស់គ្រប់ៗគ្នា និងគ្រប់ពេលវេលា។
សេចក្តីប្រកាសព័ត៌មានបានដកស្រង់សម្ដី លោក លី ប៊ុនណា ប្រធានមន្ទីរអប់រំ ខេត្តសៀមរាបថា ខេត្តសៀមរាបកន្លងមក បើទោះជាការរៀនតាមបណ្តុំមិនទាន់បានដំណើរការនៅឡើយ ក៏ប៉ុន្តែការរៀនពីចម្ងាយត្រូវបានអនុវត្តតាមការណែនាំរបស់ក្រសួងទាំងនៅទីក្រុង ទីប្រជុំជន និងនៅទីជនបទ ដោយបានរៀបចំឱ្យមានក្នុងរូបភាពចម្រុះ ជាបណ្តុំតាមសហគមន៍ ដែលធ្វើឱ្យកិច្ចការទាំងនេះបានបង្កើតឱ្យមានបទពិសោធផងដែរ។
លោកថ្លែងថា៖ «ដូច្នេះការបើកសាលារៀនឡើងវិញ មានវិទ្យាល័យចំនួន ១៤ កន្លែង និងអនុវិទ្យាល័យចំនួន ៣០ កន្លែង ដែលក្នុងថ្នាក់រៀននីមួយៗមានសិស្សមិនលើសពីចំនួន ១៥ នាក់ ហើយលក្ខខណ្ឌ ឬវិធានការសម្រាប់ដំណើរការបើកសាលារៀនឡើងវិញនោះគឺគណៈកម្មការ ឬអាជ្ញាធរមូលដ្ឋាន ដែលមានការចូលរួមពីគ្រប់អ្នកពាក់ព័ន្ធនោះគឺត្រូវតែពិនិត្យស្ថានភាពតំបន់»។
លោក លី ប៊ុនណា បន្ថែមថា ការបើកសាលាឡើងវិញនៅថ្ងៃទី ១៨ តុលា ធ្វើឡើងតាមការណែនាំរបស់ក្រសួងអប់រំ កាលពីដើមខែកញ្ញា ព្រមជាមួយនឹងការណែនាំបន្ថែមស្តីពីស្តង់ដាអនាម័យ ការអនុវត្តវិធានការ៣ការពារ ៣កុំ ការចាក់វ៉ាក់សាំងបង្ការសម្រាប់សិស្ស និងបុគ្គលិកអប់រំ និងការធ្វើតេស្តសំណាកគ្រូបង្រៀន មុនបើកសាលាបង្រៀនសិស្សជាដើម។
លោកបានថ្លែងថា៖ «ដើម្បីឱ្យដំណើរការសិក្សានេះ ប្រកបដោយភាពរលូននោះ ការចូលរួមរបស់មាតាបិតា ឬអាណាព្យាបាលរបស់សិស្ស ក្នុងការត្រួតពិនិត្យសុខភាព និងសកម្មភាពរបស់កូនខ្លួនឯង គឺជាផ្នែកមួយដែលមានសារៈសំខាន់ជាទីបំផុត»។
ខេត្តសៀមរាបមានសាលាមត្តេយ្យសិក្សាចំនួន ២០ កន្លែង និងមានថ្នាក់មត្តេយ្យសិក្សាផ្សេងទៀតដែលស្ថិតក្នុងសាលាបឋមសិក្សាជាង ៤០០ កន្លែង។
ខេត្តនេះមានសាលាបឋមសិក្សា ៥១៤ កន្លែងមានអនុវិទ្យាល័យចំនួន ៨២ កន្លែង និងមានវិទ្យាល័យចំនួន ៤១ កន្លែង៕
