.jpg)
ជនជាប់ចោទពេលត្រូវបានបញ្ជូនទៅតុលាការកំពូល។ រូបថត គឹម សារុំ
បាត់ដំបងៈ តុលាការកំពូលកាលពីថ្ងៃទី ២០ ខែតុលា បានយកសំណុំរឿង ឃាតកម្មប្ដីសម្លាប់ប្រពន្ធ មកជម្រះ តាមបណ្ដឹងសារទុក្ខ ក្រោយពីសាលាឧទ្ធរណ៍ខេត្តបាត់ដំបង ប្រកាសឱ្យជានជាប់ចោទ រួចផុតពីការចោទប្រកាន់ពីបទចោទជាប់ពន្ធនាគារ។
លោកចៅក្រម ឃឹម ប៊ុណ្ណ ប្រធានក្រុមប្រឹក្សាជំនុំជម្រះ បានឱ្យដឹងថា ជនជាប់ចោទឈ្មោះ ព្រំសួស សំណាង អាយុ ៣៤ ឆ្នាំ ត្រូវជាប្តីរបស់ស្ត្រីរងគ្រោះឈ្មោះ អូន ចន្ថា អាយុ ២៥ ឆ្នាំ ជាគ្រូបង្រៀនសាលាមត្តេយ្យនៅភូមិអំពិលលើឃុំសំឡូត ស្រុកសំឡូត ខេត្តបាត់ដំបង។ នៅក្នុងបន្ទប់សវនាការតុលាការកំពូល ជនជាប់ចោទនិយាយប្រាប់ចៅក្រមជំនុំជម្រះថាគាត់មិនបានសម្លាប់ប្រពន្ធរបស់គាត់ទេ។ ព្រោះនៅចន្លោះម៉ោង ១០ ទៅ ១១ ព្រឹកគាត់កំពុងមើលកូនតូចរបស់គាត់។
ជនជាប់ចោទថា៖ «ខ្ញុំសូមតុលាការកំពូលរកយុត្តិធម៌សម្រាប់ខ្ញុំនិងសពប្រពន្ធខ្ញុំផង»។
នៅថ្ងៃទី ១៦ ខែ ធ្នូ ឆ្នាំ ២០១៩ ស្ត្រីម្នាក់ ត្រូវបានគេប្រទះឃើញស្លាប់នៅក្នុងព្រៃក្នុងភូមិបឹងរុន ឃុំ-ស្រុកសំឡូត ខេត្តបាត់ដំបង។នៅទីកន្លែងកើតហេតុគេបានឃើញសម្ភារបង្រៀនរបស់ស្ត្រីរងគ្រោះរាយប៉ាយនៅជុំវិញខ្លួនជាមួយនឹងម៉ូតូរបស់ជនរងគ្រោះ ១ គ្រឿងផង។ ក្រោយពីសមត្ថកិច្ចធ្វើការស្រាវជ្រាវរហូតដល់ថ្ងៃទី ១៨ ខែ តុលា ឆ្នាំ ២០២១ សមត្ថកិច្ចចាប់ខ្លួនប្តីរបស់ស្ត្រីរងគ្រោះ(ជនជាប់ចោទ) ព្រោះមូលហេតុនៃការសម្លាប់នោះ គឺដោយសារជនជាប់ចោទប្រចណ្ឌនឹងស្ត្រីរងគ្រោះជាមួយបុរសដែលជាសង្សារចាស់របស់នាង។
គួររំឭកថា ក្នុងសំណុំរឿងនេះត្រូវបានសាលាដំបូងខេត្តបាត់ដំបងបើកសវនាការជំនុំជម្រះ និងប្រកាសសាលក្រមនៅថ្ងៃទី ១ កក្កដា ឆ្នាំ ២០១៩ ផ្តន្ទាទោសឈ្មោះ ព្រំសួស សំណាង ដាក់ពន្ធនាគារ១ជីវិតក្នុងបទឃាតកម្មគិតទុកជាមុនតាមមាត្រា ២០០ នៃក្រមព្រហ្មទណ្ឌ ប៉ុន្តែជនជាប់ចោទបានប្តឹងទាស់ទៅសាលាឧទ្ធរណ៍តំបន់ខេត្តបាត់ដំបង។
សាលាឧទ្ធរណ៍បានបើកសវនាការជំនុំជម្រះ និងប្រកាសសាលដីកានៅថ្ងៃទី ១៩ មករា ឆ្នាំ ២០២១ សម្រេចដោះលែងជនជាប់ចោទ។
បើតាមអង្គហេតុថា ការដែលសាលាឧទ្ធរណ៍សម្រេចដោះលែងនេះដោយសំអាងថា ស្ត្រីរងគ្រោះចេញពីបង្រៀនក្មេងនៅចន្លោះម៉ោង ១០ ទៅម៉ោង ១១ ព្រឹក ប៉ុន្តែបាត់មិនឃើញទៅផ្ទះ។ ចំណែកជនជាប់ចោទនៅចន្លោះពេលនោះក៏កំពុងមើលកូនស្រីអាយុ ២ ខួប របស់ស្ត្រីរងគ្រោះដែរ។ ដូច្នេះជនជាប់ចោទគ្មានពេលទៅសម្លាប់ជនរងគ្រោះកើតទេ។ អង្គហេតុបង្ហាញថាការដែលសាលាឧទ្ធរណ៍ដោះលែងជនជាប់ចោទនេះធ្វើឱ្យម្តាយបង្កើតរបស់ស្ត្រីរងគ្រោះ និងអគ្គព្រះរាជអាជ្ញាសាលាឧទ្ធរណ៍ខេត្តបាត់ដំបងមិនសុខចិត្តប្តឹងសារទុក្ខមកតុលាការកំពូលទៀត។
លោក ឌុច គឹមសន តំណាងមហាអយ្យការបានសន្និដ្ឋានថា លោកបានសិក្សាអង្គហេតុនេះឃើញថាសំណុំរឿងនេះនៅមិនច្បាស់លាស់ត្រង់ពេលវេលា។ ព្រោះដោយសារនៅព្រឹកថ្ងៃកើតហេតុជនជាប់ចោទបានខ្ចីម៉ូតូគេជិះទៅសេពគ្រឿងញៀន។ដូច្នេះទើបមានការពាក់ព័ន្ធនឹងពេលម៉ោងដែលជនជាប់ចោទចេញពីផ្ទះ។
លោកថ្លែងថា៖ «ខ្ញុំស្នើដល់ក្រុមប្រឹក្សាជំនុំជម្រះបង្វិលសំណុំរឿងទៅសាលាឧទ្ធរណ៍បាត់ដំបងដើម្បីស៊ើបឡើងវិញ»។
ទោះយ៉ាងណា បើតាមលោក លី សុវណ្ណា មេធាវីការពារសិទ្ធិឱ្យជនជាប់ចោទបានសន្និដ្ឋានថា នៅចន្លោះម៉ោង ១០ ទៅ ១១ ព្រឹក ថ្ងៃទី ១៦ ធ្នូ ឆ្នាំ ២០១៩ គឺកូនក្តីរបស់លោកនៅផ្ទះមើលកូនរបស់គាត់។លុះម៉ោងជាង ១១ ព្រឹកដោយមិនឃើញកូនស្រីត្រឡប់មកផ្ទះម្តាយរបស់ស្ត្រីរងគ្រោះបានឱ្យជនជាប់ចោទទូរស័ព្ធទៅប្រពន្ធហៅចូលតែគ្មានអ្នកលើក។
លុះក្រោយមកទើបគេប្រទះឃើញជនរងគ្រោះស្លាប់នៅតាមផ្លូវក្នុងព្រៃ។
លោកប្រាប់ដល់អង្គជំនុំជម្រះថា៖ «ខ្ញុំសូមតុលាការដោះលែងកូនក្តីខ្ញុំវិញ ព្រោះគាត់មិនបានសម្លាប់ប្រពន្ធគាត់ទេ។ ខ្ញុំស្នើក្រុមប្រឹក្សាកុំបង្វិលទៅសាលាឧទ្ធរណ៍វិញអីព្រោះរឿងនេះចៅក្រមសាលាឧទ្ធរណ៍បាត់ដំបងស៊ើបល្អិតល្អន់ហើយ»។ ក្រោយជំនុំជម្រះលោកចៅក្រមឃឹម ប៊ុនថ្លែងថា សាលដីការឿងនេះប្រកាសនៅថ្ងៃទី ៣ វិច្ឆិកា៕
