.jpg)
មន្ត្រីយោធាដែលត្រូវបានវាយសម្លាប់ក្នុងអង្រឹង និងមន្ត្រីយោធាដែលជាជនសង្ស័យត្រូវបានចាប់ខ្លួន កាលពីថ្ងៃទី ១៨ តុលា នៅខេត្តព្រះវិហារ។ រូបថត FB
ភ្នំពេញៈ មន្ត្រីយោធាម្នាក់ត្រូវបានកម្លាំងកងរាជអាវុធហត្ថខេត្តព្រះវិហារ បញ្ជូនទៅតុលាការនាថ្ងៃទី ២០ តុលានេះ ពាក់ព័ន្ធនឹងការវាយសម្លាប់មន្ត្រីយោធានៅក្នុងអង្គភាពជាមួយគ្នាម្នាក់ កាលពីថ្ងៃទី ១៨ តុលា នៅភូមិស្រអែមខាងជើង ឃុំស្រអែម ស្រុកជាំក្សាន្ត។
លោក បូរ៉ា ផុន មេបញ្ជាការរងកងរាជអាវុធហត្ថស្រុកជាំក្សាន្ត ឱ្យដឹងនៅរសៀលថ្ងៃទី ២០ តុលាថា ជនសង្ស័យ ឈ្មោះ នួន វ៉ាន ភេទប្រុស អាយុ ៤៣ ឆ្នាំ ត្រូវបានកម្លាំងកងរាជអាវុធហត្ថខេត្តកសាងសំណុំរឿងបញ្ជូនទៅសាលាដំបូងខេត្ត នៅថ្ងៃទី ២០ តុលាហើយ។
លោកថ្លែងថា៖ «ខ្ញុំដឹងថា ជនសង្ស័យម្នាក់នោះបានបញ្ជូនទៅតុលាការនៅថ្ងៃនេះហើយ (ថ្ងៃទី ២០ តុលា)»។
លោកបន្តថា ជនរងគ្រោះឈ្មោះកែវ ជាថា ភេទប្រុស អាយុ ៤៧ ឆ្នាំ។ ទាំងជនរងគ្រោះ ទាំងជនសង្ស័យ បម្រើការនៅវរសេនាតូចអន្តរាគមន៍លេខ ៣៧១ ជាមួយគ្នា។
ជុំវិញបញ្ហានេះលោក បូរ៉ា ផុន មិនបានប្រាប់លម្អិតពីហេតុការណ៍នោះទេ។ ប៉ុន្តែបើតាមលោក ហ៊ុយ សុផុន នាយនគរបាលប៉ុស្តិ៍ឃុំស្រអែមដែលលោកទទួលបានរបាយការណ៍អំពីករណីឃាតកម្មនេះដែរនោះ ប្រាប់នៅរសៀលថ្ងៃទី ២០ តុលាថា កាលពីវេលារសៀលថ្ងៃទី ១៨ តុលា ជនសង្ស័យបានផឹកស្រាជាមួយជនបង្ក រហូតដល់ស្រវឹងរៀៗខ្លួន។ ពេលនោះពួកគេក៏ទាស់ពាក្យសម្តីគ្នា ហើយបន្ទាប់ពីឈ្លោះគ្នារួច ជនរងគ្រោះបានទៅដេកក្នុងអង្រឹង។ ខណៈកំពុងដេកនោះ ជនសង្ស័យបានយកកំណាត់ឈើប្រវែងប្រហែល៨តឹក វាយចំមុខជនរងគ្រោះរហូតស្លាប់នៅក្នុងអង្រឹងតែម្តង។
លោកបញ្ជាក់ថា ក្រោយបង្កហេតុ ជនសង្ស័យមិនបានរត់គេចខ្លួនទៅណាទេ ពេលនោះខាងកម្លាំងកងរាជអាវុធហត្ថស្រុកជាំក្សាន្តក៏ចុះចាប់ខ្លួនភ្លាមៗតែម្តង៕
វីដេអូ៖
