ភ្នំពេញៈ អង្គការភ្លែនអន្តរជាតិកម្ពុជានៅថ្ងៃទី ២០ តុលា បានផ្សព្វផ្សាយយុទ្ធសាស្ត្រថ្មីប្រចាំប្រទេសរយៈពេល ៥ ឆ្នាំ (២០២១-២០២៦) លើកទី៤ ក្រោមប្រធានបទ «២,៥ លានហេតុផល» និងអបអរទិវាកុមារីអន្តរជាតិតាមរយៈប្រព័ន្ធអ៊ីនធឺណិត ដើម្បីរក្សានូវការផ្តល់ប្រយោជន៍ដល់ក្មេងស្រី និងស្ត្រីវ័យក្មេង ២,៥ លាននាក់នៅកម្ពុជា។
តាមសេចក្ដីប្រកាសព័ត៌មាន អង្គការនេះបានឱ្យដឹងថា ប្រធានបទថ្មីចម្បងរបស់យុទ្ធសាស្ត្រប្រចាំប្រទេស គឺ ២,៥ លានហេតុផល ដើម្បីរក្សាឱ្យបានតាមមហិច្ឆតាខ្លួន ដោយផ្តល់ប្រយោជន៍ដល់ក្មេងស្រី និងស្ត្រីវ័យក្មេង ២,៥ លាននាក់ ក្នុងនោះប្រហែល ១ លាននាក់ដោយផ្ទាល់ និង ១,៥ លាននាក់ដោយប្រយោល។
អង្គការភ្លែនចង់ឱ្យមានកិច្ចសហការដើម្បីផ្តល់អំណាចដល់ក្មេងស្រីវ័យជំទង់ និងស្ត្រីវ័យក្មេង នៅក្នុងភាពចម្រុះរបស់ពួកគេដើម្បីឱ្យមានសំឡេង និងគាំទ្រពួកគេ ក្នុងការទទួលបានចំណេះដឹង ជំនាញ និងទំនុកចិត្តដែលពួកគេត្រូវការដើម្បីសម្រេចបាននូវសិទ្ធិ និងឈានដល់សក្តានុពលពេញលេញរបស់ពួកគេ។
លោកស្រី គ្វីន នេតវ៉ង តំណាងប្រចាំប្រទេសនៃអង្គការភ្លែនអន្តរជាតិកម្ពុជាថ្លែងថា៖ «ដើម្បីពង្រីកអន្តរាគមន៍ និងជំរុញឱ្យគោលបំណងរបស់យើងកាន់តែទទួលបានជោគជ័យបន្ថែមទៀត លើការអនុវត្តយុទ្ធសាស្ត្រប្រចាំប្រទេសលើកមុន នៅថ្ងៃនេះយើងកំពុងតែប្រារព្ធពិធីផ្សព្វផ្សាយ “យុទ្ធសាស្ត្រប្រចាំប្រទេសថ្មី ២,៥ លានហេតុផល (២០២១-២០២៦)” ជាមួយគ្នា»។
លោកស្រីថ្លែងថា៖ «នៅក្នុងរយៈពេល ៥ ឆ្នាំខាងមុខ អង្គការភ្លែនអន្តរជាតិនឹងបន្តមហិច្ឆតារបស់ខ្លួនក្នុងការលើកកម្ពស់សិទ្ធិកុមារ និងសមភាពក្មេងស្រី ក្នុងប្រទេសកម្ពុជា»។ អង្គការនឹងសហការក្នុងភាពជាដៃគូយុទ្ធសាស្ត្រជាមួយអ្នកពាក់ព័ន្ធជាច្រើនរួមមានកុមារ និងយុវជនក្នុងគោលបំណងលើកកម្ពស់សិទ្ធិអំណាចរបស់ក្មេងស្រី ២,៥ លាននាក់ ជាពិសេសក្មេងស្រីវ័យជំទង់ និងស្ត្រីវ័យក្មេង។
យុទ្ធសាស្ត្រប្រចាំប្រទេស ៥ ឆ្នាំលើកទី៤ របស់អង្គការនេះ មានកម្មវិធីយុទ្ធសាស្ត្រចំនួន ៤ រួមមានទី១ ការចាប់ផ្តើមជាមួយសុខភាពល្អ គឺការរួមបញ្ចូលកម្មវិធីអាហារូបត្ថម្ភ កម្មវិធីការគាំពារ និងអភិវឌ្ឍន៍កុមារតូច និងទឹកស្អាត និងអនាម័យ ដើម្បីធានាថា ក្មេងស្រី និងក្មេងប្រុសមានការចាប់ផ្តើមដោយយុត្តិធម៌ នៅក្នុងជីវិត និងអាចធ្វើការជ្រើសរើសដោយសេរី និងព័ត៌មានអំពីរាងកាយរបស់ពួកគេ។
ទី២ កិច្ចការពារជំនាន់ថ្មី គឺផ្តោតទៅលើ OCSE អ្នកស្រឡាញ់ភេទដូចគ្នា CEFM កុមារដែលទុកចោលរួមទាំងកម្មវិធីឆ្លងដែន ដើម្បីរក្សាកុមារជាពិសេសក្មេងស្រី និងយុវជនឱ្យមានសុវត្ថិភាព។ ទី៣ ការរៀនមួយជីវិតដោយផ្តោតលើ IQE ការអភិវឌ្ឍជំនាញ និងជំនាញជីវិតរួមទាំងសុខភាពផ្លូវភេទ និងសុខភាពបន្តពូជ និងសិទ្ធិដើម្បីធានាថា កុមារជាពិសេសក្មេងស្រី និងស្ត្រីវ័យក្មេងទទួលបានចំណេះដឹងជំនាញ និងទំនុកចិត្តដែលពួកគេត្រូវការ ដើម្បីសម្រេចបាននូវសិទ្ធិរបស់ពួកគេ និងឈានដល់សក្តានុពលពេញលេញ។
ទី៤ ភាពដឹកនាំរបស់ក្មេងស្រី គឺការពង្រឹងសមត្ថភាព និងភាពជាអ្នកដឹកនាំភាពជាពលរដ្ឋសកម្ម និងការចូលរួមរបស់ប្រជាពលរដ្ឋធានាថា ក្មេងស្រី និងស្ត្រីវ័យក្មេងមានចំណេះដឹងជំនាញ និងទំនុកចិត្ត ដើម្បីជោគជ័យ។
លោកស្រី ហ៊ូ និរមិត្តា អនុរដ្ឋលេខាធិការ ក្រសួងកិច្ចការនារី លើកឡើងជាអនុសាសន៍ និងសេចក្ដីសន្និដ្ឋាន ក្នុងពិធីផ្សព្វផ្សាយនេះថា រាជរដ្ឋាភិបាល តាមរយៈយុទ្ធសាស្ដ្រចតុកោណដំណាក់កាលទី ៤ និងផែនការអភិវឌ្ឍន៍ជាតិ ២០១៩- ២០២៣ បានកំណត់តម្លៃ និងសារៈសំខាន់ក្នុងការលើកកម្ពស់សមភាពយេនឌ័រ និងការបង្កើតភាពអង់អាចស្ដ្រី និងក្មេងស្រីគ្រប់រូប ជាពិសេសតាមរយៈការពង្រឹងសមភាពយេនឌ័រនៅគ្រប់វិស័យ គ្រប់កម្រិត និងការពង្រឹងតួនាទីស្ដ្រី និងក្មេងស្រីដែលជាឆ្អឹងខ្នងនៃសេដ្ឋកិច្ច និងសង្គមជាតិ។
ផ្អែកលើមូលដ្ឋាននេះ និងផ្សារភ្ជាប់ជាមួយនឹងគោលការគ្រឹះនៃអនុសញ្ញាស្ដីពីការលុបបំបាត់រាល់ទម្រង់នៃការរើសអើងប្រឆាំងនារីភេទ ក្របខ័ណ្ឌច្បាប់ គោលនយោបាយជាតិ កម្មវិធីកំណែទម្រង់នានារបស់រាជរដ្ឋាភិបាល ជាពិសេសគោលដៅអភិវឌ្ឍន៍ប្រកបដោយចីរភាពដោយមិនទុកអ្នកណាម្នាក់ឱ្យនៅឯកោ។
លោកស្រីបញ្ជាក់ថា៖ «ការប្រកាសផ្សព្វផ្សាយយុទ្ធសាស្ត្រថ្មីប្រចាំប្រទេសរយៈពេល ៥ ឆ្នាំរបស់អង្គការភ្លែនអន្តរជាតិកម្ពុជានេះ គឺជាតម្លៃដ៏ចាំបាច់ និងដែលមានសារៈសំខាន់មួយក្នុងការឆ្លើយតបទៅនឹងក្របខ័ណ្ឌគោលនយោបាយជាតិនានា ពិសេសគឺផែនការយុទ្ធសាស្ដ្រនារីរតនៈទី ៥ របស់ក្រសួងកិច្ចការនារី ក៏ដូចជាការលើកកម្ពស់ស្ថានភាព ជីវភាព និងភាពអង់អាចរបស់ស្ដ្រី និងក្មេងស្រីនៅក្នុងសង្គមយើងផងដែរ»។
កុមារី ថន ជេដ្ឋានី ដែលបានចូលរួមក្នុងកម្មវិធីផ្សព្វផ្សាយនេះនិយាយថា៖ «ក្នុងរយៈពេល ៥ ឆ្នាំខាងមុខ ខ្ញុំពិតជាចង់ឃើញក្មេងស្រីជាច្រើនមានសុខភាពល្អតាំងពីតូចទទួលបានការអប់រំប្រកបដោយគុណភាព ទទួលបានការការពារពេញលេញ និងបំពេញបាននូវសក្ដានុពលរបស់ពួកគេ ដើម្បីក្លាយជាបុគ្គលមួយរូបមានសិទ្ធិអំណាចផ្នែកសេដ្ឋកិច្ច មានសិទ្ធិសម្រេចចិត្តលើរូបរាងកាយរបស់ខ្លួន និងក្លាយជាពលរដ្ឋសកម្មនៅក្នុងសហគមន៍»។
បើតាមសេចក្ដីប្រកាសព័ត៌មានរយៈពេល ៥ ឆ្នាំចុងក្រោយនេះ ចាប់ពីឆ្នាំ ២០១៦ ដល់ ២០២១ អង្គការភ្លែនអន្តរជាតិកម្ពុជាបានអនុវត្តកម្មវិធីយុទ្ធសាស្ត្រចំនួន ៥ គឺកម្មវិធីអាហារូបត្ថម្ភ កម្មវិធីថែទាំ និងអភិវឌ្ឍន៍កុមារតូច កម្មវិធីទឹកស្អាត និងអនាម័យ កម្មវិធីអប់រំ និងបណ្តុះបណ្តាលវិជ្ជាជីវៈ កុមារាកុមារី និងកុមារវ័យជំទង់ ដែលបោះបង់ចោលការសិក្សា និងកម្មវិធីកិច្ចការពារកុមារ៕