ភ្នំពេញៈ ភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្ដុះបណ្ដាលវិជ្ជាជីវៈ សហកាជាមួយក្រសួងស្ថាប័នក្រុមហ៊ុនសហគ្រាស គ្រឹះស្ថានអប់រំបណ្ដុះបណ្ដាល និងអង្គការជាតិ-អន្ដរជាតិប្រមាណ ៨០ នឹងរៀបចំពិព័រណ៍ការងារ និងផលិតភាពជាតិប្រចាំឆ្នាំ តាមអនឡាញនៅថ្ងៃទី ៤-៥ ខែវិច្ឆិកា ខាងមុខនេះដោយផ្ដល់ព័ត៌មានជ្រើសរើសកម្លាំងពលកម្មប្រមាណជាង ១១ ៥០០ កន្លែងដល់យុវជន និងសិស្ស និស្សិត។
លោក ហៃ ហ៊ុនឡេង ប្រធាន NEA ថ្លែងប្រាប់ ភ្នំពេញ ប៉ុស្ដិ៍ នៅថ្ងៃទី ២០ តុលា ថា នៅក្នុងពិព័រណ៍អនឡាញឆ្នាំនេះនឹងមានក្រុមហ៊ុន សហគ្រាស ក្រសួង ស្ថាប័ន និងគ្រឹះស្ថានអប់រំបណ្តុះបណ្តាលចំនួនប្រមាណ ៨០ ដែលក្នុងនោះមានព័ត៌មានជ្រើសរើសកម្លាំងពលកម្មប្រមាណជាង ១១ ៥០០ កន្លែង។
ជាការរំពឹងទុកអ្នកចូលរួមទស្សនាមានចំនួន ៥៤ ៥០០ នាក់ ដែលមានអ្នកស្វែងរកការងារ (CVs) ប្រមាណជា ៤ ពាន់នាក់។ ពិព័រណ៍នេះនឹងត្រូវបានរៀបចំធ្វើឡើងតាមប្រព័ន្ធអនឡាញនៅលើគេហទំព័រ www.careerfair.nea.gov.kh រយៈពេល ២ ថ្ងៃ គឺថ្ងៃទី ៤-៥ ខែវិច្ឆិកា ឆ្នាំ ២០២១។
លោកបន្តថា ពិព័រណ៍ការងារនេះរៀបចំដោយ NEA និង បានសហការជាមួយសហភាពសហព័ន្ធយុវជនកម្ពុជា (UYFC) រាជធានីភ្នំពេញ សមាគមរោងចក្រកាត់ដេរនៅកម្ពុជា (GMAC) និងកម្មវិធីអភិវឌ្ឍន៍សហប្រជាជាតិ (UNDP) និងមានការចូលរួមគ្រាំទ្រពីក្រសួង ស្ថាប័ន ក្រុមហ៊ុន សហគ្រាស គ្រឹះស្ថានអប់រំបណ្ដុះបណ្ដាល និងអង្គការជាតិ និងអន្ដរជាតិ។
លោកថ្លែងថា៖ «ក្រុមហ៊ុន សហគ្រាស ក្រសួង ស្ថាប័ន និងគ្រឹះស្ថានអប់រំបណ្តុះបណ្តាលចំនួនប្រមាណ ៨០ ដែលយើងអាចវាយតម្លៃថានឹងចូលរួម ក្នុងនោះមានវិស័យចម្រុះមានខាងធនាគារ មីក្រូហិរញ្ញវត្ថុ អប់រំ ដឹកជញ្ជូន និងសេវាកម្មផ្សេងៗមួយចំនួនទៀត»។
លោក ហ៊ុនឡេង បានឱ្យដឹងថា ផលប៉ះពាល់ពីការរីករាលដាលជំងឺកូវីដ ១៩ ប៉ះពាល់ធ្ងន់ដល់វិស័យទេសចរណ៍ និងបដិសណ្ឋារកិច្ច ប៉ុន្ដែមកដល់បច្ចុប្បន្ន វិស័យកម្មន្តសាល វិស័យធនាគារ គ្រឹះស្ថានមីក្រូហិរញ្ញវត្ថុ ជាដើម គឺនៅដំណើរការជាធម្មតា ដូច្នេះឱកាសការងារគឺនៅត្រូវជ្រើសរើសជាបន្តបន្ទាប់។
លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នាព្រឹកថ្ងៃទី ២០ ខែ តុលា ឆ្នាំ ២០២១ សរសរលើហ្វេសប៊ុកថា សូមចូលរួមស្វែងរកការងារ និងរើសកម្លាំងពលកម្មក្នុងពិព័រណ៍ការងារអនឡាញដែលរៀបចំឡើង នៅថ្ងៃទី ៤-៥ ខែវិច្ឆិកា ខាងមុខ។ លោកលើកឡើងបែបនេះ ក្នុងពេលអនុញ្ញាតឱ្យក្រុមការងាររបស់ NEA ចូលថតវីដេអូ ថ្លែងសុន្ទរកថារបស់លោកក្នុងពិធីបើកពិព័រណ៍ការងារ និងផលិតភាពជាតិអនឡាញនេះ។
លោកបានថ្លែថា៖ «ពិព័រណ៍ការងារអនឡាញនេះត្រូវបានរៀបចំឡើងក្នុងគោលដៅផ្ដល់នូវជម្រើសដែលមានភាពបត់បែនកាន់តែងាយស្រួល ព្រមទាំងបង្ការនូវសុវត្ថិភាព សុខភាព និងអនាម័យពីជំងឺកូវីដ ១៩ ស្របពេលដែលទីផ្សារការងារកម្ពុជាកំពុងមានសម្ទុះតម្រូវការកម្លាំងពលកម្មឡើងវិញនៅតាមវិស័យមួយចំនួន ជាពិសេសជួយគាំទ្រដល់យុវជន និងអ្នកស្វែងរកការងារអាចដាក់ពាក្យ និងសម្ភាសជាមួយក្រុមហ៊ុនតាមអនឡាញ»។
លោក អ៊ិត សំហេង បានឱ្យដឹងថា នៅក្នុងពិព័រណ៍ការងារ និងផលិតភាពជាតិអនឡាញឆ្នាំនេះនឹងមានរួមបញ្ជូលសិក្ខាសាលាផលិតភាពតាមរយៈប្រព័ន្ធអនឡាញ (Zoom) ដែលត្រូវបានរៀបចំឡើងក្នុងគោលបំណងចែករំលែកចំណេះដឹង បទពិសោធគន្លឹះសំខាន់ៗ និងផ្សព្វផ្សាយលើកកម្ពស់ការយល់ដឹងពីសារៈសំខាន់នៃការបង្កើនផលិតភាពការងារ និងបង្ហាញពីការវិវត្តបច្ចេកវិទ្យាថ្មីៗ ដែលប្រទេសជឿនលឿន និងប្រទេសកំពុងអភិវឌ្ឍន៍មួយចំនួនប្រើប្រាស់ដើម្បីគ្រប់គ្រងការងារ និងខ្សែចង្វាក់ផលិតកម្មជាពិសេសបំផុសស្មារតី និងពង្រីកប្រសិទ្ធភាពការងារក្នុងបរិបទការងារតាមគន្លងថ្មីនៃការរីករាលដាលជំងឺកូវីដ ១៩។
លោក ហៃ ហ៊ុនឡេង បានឱ្យដឹងថា ការធ្វើពិព័រណ៍ការងារ និងផលិតភាពជាតិអនឡាញតាមអនឡាញឆ្នាំនេះ គឺជា ឆ្នាំទី ២ ហើយក្រោយមានការរីករាលដាលជំងឺកូវីដ ១៩។ ប៉ុន្ដែការធ្វើតាមអនឡាញបែបនេះចំនួនក្រុមហ៊ុន សហគ្រាស រោងចក្រ បានកើនឡើងស្ទើរ ៣ ដងដែលចំណុចនេះបង្ហាញពីចំណាប់អារម្មណ៍របស់វិស័យឯកជន ដោយគិតថា ការរៀបចំពិព័រណ៍តាមអនឡាញនេះបានផ្ដល់អត្ថប្រយោជន៍ និងមានភាពងាយស្រួលក្នុងការជ្រើសរើសបុគ្គលិក។
ការរៀបចំពិព័រណ៍ NEA បានរៀបចំគេហទំព័រមេមួយ www.careerfair.nea.gov.kh ដោយបានអនុញ្ញាតឱ្យក្រុមហ៊ុន សហគ្រាស រៀបចំគេហទំព័រតូចៗដូចជាបញ្ជរ ដូចជាស្ដង់របស់ខ្លួននៅក្នុងទំព័រ ដើម្បីផ្សព្វផ្សាយពីការជ្រើសរើសបុគ្គលិក និងអាចអនុញ្ញាតដល់បេក្ខជនដែលចង់ស្វែងរកការងារចូលទៅមើល ឬដាក់ពាក្យ ធ្វើការងារ នៅតាមគេហទំព័រតូចៗទាំងនោះបានតែម្ដង៕