.jpg)
ស្ត្រីជាប់ឃុំ កំពុងចាក់វ៉ាក់សាំងបង្ការជំងឺកូវីដ ១៩ នៅពន្ធនាគារព្រៃសកាលពីថ្ងៃទី ១៦ សីហា។ រូបថត DGP
ភ្នំពេញៈ ក្នុងចំណោមជនជាប់ឃុំទូទាំងប្រទេសសរុបជាង ៣៧ ០០០ នាក់ គឺបានចាក់វ៉ាក់សាំងដូសទី ២ រួចរាល់ស្ទើរ ១០០ ភាគរយ ក្នុងនោះមានតែជនជាប់ឃុំតិចតួចប៉ុណ្ណោះដែលមិនបានចាក់ដោយសារបញ្ហាសុខភាព ខណៈដែលលោកនាយករដ្ឋមន្ត្រី ហ៊ុន សែន បានវាយតម្លៃថា ការចាក់វ៉ាក់សាំងកូវីដ ១៩ បានប្រព្រឹត្តទៅយ៉ាងល្អប្រសើរ។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារបានឱ្យដឹងថា មកដល់បច្ចុប្បន្ននេះ ក្នុងចំណោមជនជាប់ឃុំសរុបជាង ៣៧ ០០០ នាក់ គឺបានចាក់វ៉ាក់សាំងដូសទី ២ រួចរាល់ស្ទើរ ១០០ ភាគរយហើយ ក្នុងនោះមានជនជាប់ឃុំតិចតួចប៉ុណ្ណោះមិនបានចាក់ ដោយសារបញ្ហាសុខភាពដែលមិនអាចចាក់វ៉ាក់សាំងបាន និងជនជាប់ឃុំខ្លះទើបចូលថ្មីដែលទើបចាប់ផ្ដើមចាក់ដូសទី ១។
ជនជាប់ឃុំទាំងអស់បានទទួលការចាក់វ៉ាកសាំងប្រភេទផ្សេងៗក្នុងនោះមានប្រភេទ ស៊ីណូវ៉ាក់ ស៊ីណូហ្វាម Johnson & Johnson និង AstraZeneca។
ជាមួយគ្នានេះ តាមរយៈសារជាសំឡេងពិសេសនៅថ្ងៃទី ១៩ ខែតុលា របស់លោកនាយករដ្ឋមន្ត្រី ហ៊ុន សែន អំពីស្ថានភាពកូវីដ ១៩ បន្ទាប់ពីបុណ្យភ្ជុំបិណ្ឌ និងការត្រៀមរៀបចំបើកប្រទេសឡើងវិញ លោកបានបញ្ជាក់ថា បច្ចុប្បន្នកម្ពុជាកំពុងមានវ៉ាក់សាំងបង្ការជំងឺកូវីដ ១៩ ជាង ១០ លានដូសនៅក្នុងឃ្លាំង ដើម្បីបម្រើឱ្យការចាក់ដល់ប្រជាពលរដ្ឋដែលមិនទាន់បានចាក់ដូសទី ៣។
លោកនាយករដ្ឋមន្ដ្រីថ្លែងថា ការចាក់វ៉ាក់សាំងរបស់កម្ពុជាបានប្រព្រឹត្ដទៅយ៉ាងល្អប្រសើរ ដែលមកដល់ពេលនេះប្រជាជនជាង ១៣ លាន ៦ សែននាក់បានចាក់ ដែលគិតជាអត្រាគ្របដណ្ដប់មានរហូតទៅដល់ជាង ៨៥ ភាគរយនៃចំនួនប្រជាជនសរុប ដែលកត្ដានេះ ធ្វើឱ្យអ្នកឆ្លងជំងឺកូវីដ ១៩ នៅកម្ពុជាមួយចំនួនមិននាំទៅរកភាពធ្ងន់ធ្ងរនោះទេ។ ចំណែកអ្នកដែលបានទទួលមរណភាពដោយសារកូវីដ ១៩ ភាគច្រើនជាអ្នកដែលមានជំងឺធ្ងន់កាលពីពេលមុន។
លោកនាយករដ្ឋមន្ដ្រីបញ្ជាក់ថា៖ «ស្ថានភាពទាំងអស់នេះ គឺយើងអាចនិយាយបានថា វ៉ាក់សាំង គឺជាគ្រឹះការពារដ៏រឹងមាំ សម្រាប់ការពារអាយុជីវិតរបស់ប្រជាជនយើង កាត់បន្ថយការឆ្លង ហើយបើសិនមានការឆ្លងហើយ ក៏មិននាំទៅដល់គ្រោះថ្នាក់»។
ឥឡូវនេះបន្ទាប់ពីការចាក់ដូសទី២ ដល់ពេលវេលាដែលត្រូវចាក់ដូសទី៣ ទៅតាមតំបន់ទៅតាមទីកន្លែងដែលបានចាក់មុន ចាក់ក្រោយ ហើយកំពុងធ្វើយុទ្ធនាការ នៅក្នុងទីក្រុងភ្នំពេញ ដែលការចាក់នេះត្រូវប្រើរយៈពេលពីដូសទី២ ទៅដូសទី៣ ក្នុងរង្វង់ ៤ ទៅ ៦ ខែ។
លោកនាយករដ្ឋមន្ដ្រីថ្លែងថា ជាគុណបុណ្យរបស់កម្ពុជាដែលមានវ៉ាក់សាំងគ្រប់គ្រាន់ សម្រាប់ការចាក់ជូនប្រជាពលរដ្ឋ តាមរយៈជំនួយពីប្រទេសជាមិត្ត ពិសេសគឺសាធារណរដ្ឋប្រជាមានិតចិន សហរដ្ឋអាមេរិក ជប៉ុន អង់គ្លេស និងមណ្ឌលខូវ៉ាក់។ កម្ពុជាក៏បានបញ្ជាទិញវ៉ាក់សាំងដោយខ្លួនឯងនូវចំនួនច្រើនដែលរហូតមកដល់ពេលនេះទទួលបានចំនួន ៣៨ លានដូស ដើម្បីចាក់ជូនប្រជាពលរដ្ឋ។
លោកបញ្ជាក់ថា ជាទូទៅចំនួនអ្នកដែលបានទទួលមរណភាព ដោយសារមិនបានចាក់វ៉ាក់សាំងនេះ គឺជាចំនួនដ៏ធំ ហើយអ្នកដែលមិនបានចាក់វ៉ាក់សាំងមានមូលហេតុខុសៗគ្នា។ លោកថ្លែងថា៖ «ខ្ញុំសូមស្នើសម្រាប់ក្រុមគ្រូពេទ្យរបស់យើង អាជ្ញាធរ ក៏ដូចជាពលរដ្ឋរបស់យើង គឺខិតខំដើម្បីទទួលបាននូវវ៉ាក់សាំង ហើយដែលយើងទោះបីបិទបញ្ចប់នៃការចាក់វ៉ាក់សាំងនៅតាមខេត្ដមួយចំនួនរួចទៅហើយក៏ដោយ ក៏ប៉ុន្ដែយើងទុកវ៉ាក់សាំងសម្រាប់ចាក់ជូនប្រជាពលរដ្ឋរបស់យើង»។
លោកបន្តថា៖ «យើងអាចមានកម្មវិធីដើម្បីទៅចាក់វ៉ាក់សាំងជូនដល់ប្រជាពលរដ្ឋនៅតាមភូមិ តាមផ្ទះតែម្ដង ក្នុងករណីដែលប្រជាពលរដ្ឋរបស់យើងមិនអាចធ្វើដំណើរ មកកាន់ទីកន្លែងចាក់វ៉ាក់សាំងបាន។ នេះសូមឱ្យអាជ្ញាធរគ្រប់លំដាប់ថ្នាក់ គ្រូពេទ្យរបស់យើង យកចិត្ដទុកដាក់សម្រាប់ការអនុវត្ដនៅឯមូលដ្ឋាន»។
លោក នុត សវនា ថ្លែងថា បើសិនលោកនាយករដ្ឋមន្ត្រីបើកអនុញ្ញាតឱ្យមានចាក់ដូសទី៣ ដល់ជនជាប់ឃុំនោះ ខាងពន្ធនាគារនឹងអនុវត្ដតាមប្រសាសន៍របស់លោក ដើម្បីឱ្យជនជាប់ឃុំបានទទួលវ៉ាក់សាំងដូសទី៣ ឱ្យដូចពលរដ្ឋទូទៅដែរ។
លោកបញ្ជាក់ថា៖ «គ្រាន់តែថា ការចាត់ចែង ការចាក់នោះយ៉ាងម៉េចគឺអាស្រ័យខាងកម្លាំងពីមន្ទីរពេទ្យ ១៦ ឧសភា។ យើងនឹងរៀបចំស្នើទៅតាមហ្នឹង ព្រោះវ៉ាក់សាំងយើងអត់ទុកទេឱ្យតែត្រូវចាក់ គឺយើងចាក់ឱ្យទាំងអស់»។
បើតាមលោក សវនា ស្ថានភាពការឆ្លងរីករាលដាលជំងឺកូវីដ ១៩ នៅក្នុងពន្ធនាគារ ចំពោះជនជាប់ឃុំចាស់ៗ ដែលបានចាក់វ៉ាក់សាំង ២ ដូសរួចហើយនោះ គឺមិនមានការឆ្លងថ្មីទេ។ ប៉ុន្ដែមានករណីឆ្លង ១ ទៅ ២ ករណីដែលជនជាប់ឃុំថ្មីនាំចូលមក។ ទោះយ៉ាងណាពន្ធនាគារអាចគ្រប់គ្រងស្ថានការណ៍កូវីដនេះបាន ដោយមិនមានការឆ្លងរីករាលដាលដូចកាលពីកើតមានព្រឹត្ដិការណ៍ ២០ កុម្ភៈដំបូងនោះទេ។
បើតាមសារសំឡេងពិសេសរបស់លោកនាយករដ្ឋមន្ដ្រី បច្ចុប្បន្នការចាក់វ៉ាក់សាំងបង្ការជំងឺកូវីដ ១៩ ដូសទី៣ គឺកម្ពុជាចាក់ដល់ប្រជាពលរដ្ឋ និងមន្ដ្រីរាជការបានជាង ១ លាននាក់រួចហើយ នៅក្នុងក្របខ័ណ្ឌទូទាំងប្រទេស។ ដោយឡែកនៅរាជធានីភ្នំពេញមានពលរដ្ឋ និងមន្ដ្រីរាជការ ជិតកន្លះលាននាក់ ដែលបានចាក់វ៉ាក់សាំងដូសទី ៣ រួចស្រេចទៅហើយ។
លោក អំ សំអាត នាយករងអង្គការលីកាដូ សង្កេតឃើញពន្ធនាគារនាពេលបច្ចុប្បន្ន គឺស្ថិតនៅក្នុងភាពចង្អៀតណែនខ្លាំងដដែល។ លោកថ្លែងថា កន្លងមកមានជាង ១០ ពន្ធនាគារដែលត្រូវបានឆ្លងជំងឺកូវីដ និងមានអ្នកស្លាប់ខ្លះ ព្រោះពួកគាត់មានជំងឺរ៉ាំរ៉ៃជាប់ខ្លួនស្រាប់។ ដូច្នេះស្ថានភាពអ្នកជាប់ឃុំនៅក្នុងពន្ធនាគារ គឺស្ថិតនៅក្នុងហានិភ័យខ្ពស់ បើសិនមានការឆ្លងជំងឺកូវីដ ១៩ ចូល ដែលងាយនឹងចម្លងបន្តគ្នាដោយសារតែភាពចង្អៀតណែន អនាម័យបរិស្ថានមិនសូវល្អ។
លោកបញ្ជាក់ថា៖ «វិធានការការពារ និងទប់ស្កាត់ការរីករាលដាលជំងឺកូវីដ ១៩ ក្នុងពន្ធនាគារ ជារឿងចាំបាច់។ កន្លងមកខាងអគ្គនាយកដ្ឋានពន្ធនាគារ ខាងពន្ធនាគារ និងស្ថាប័នពាក់ព័ន្ធ បានការពារ និងទប់ស្កាត់ រួមទាំងការចាក់វ៉ាក់សាំងដល់អ្នកជាប់ឃុំ។ ប៉ុន្តែយើងឃើញហើយនៅតែមានការឆ្លងជំងឺកូវីដ ១៩ ទៅក្នុងពន្ធនាគារ»។
លោកបន្តថា ដូច្នេះរឿងការចាក់វ៉ាក់សាំងដោយស្ម័គ្រចិត្តដូសជំរុញដល់អ្នកជាប់ឃុំជារឿងសំខាន់មួយ តែរឿងសំខាន់មួយទៀតដែរ គឺការរកមធ្យោបាយដើម្បីកាត់បន្ថយភាពចង្អៀតណែននៃអ្នកជាប់ឃុំក្នុងពន្ធនាគារ តាមរយ:សេចក្តីសម្រេចរបស់ក្រសួងយុត្តិធម៌ថ្មីៗនៃការដោះលែងអ្នកជាប់ឃុំដោយមានលក្ខខណ្ឌ។
លោកលើកឡើងថា ការដោះលែងនៅក្រៅឃុំបណ្តោះអាសន្នតាមលក្ខខណ្ឌ និងការពិនិត្យលទ្ធភាពដោះលែងលើជនជាប់ឃុំងាយរងគ្រោះ ដូចជាស្ត្រីមានផ្ទៃពោះស្ត្រីមានកូនរស់នៅតាមម្តាយ អនីតិជន អ្នកមានជំងឺរ៉ាំរ៉ៃ ...ជាដើម អាចនឹងជួយកាត់បន្ថយភាពចង្អៀតណែនក្នុងពន្ធនាគារ៕
វីដេអូ៖
